‘Ek wens ek het dit vroeër gedoen’

Dit is al ’n verslawing genoem, en met goeie rede. ’n Opname in die Verenigde State het getoon dat seuns in graad agt (omtrent 13 jaar oud) gemiddeld sowat 23 uur per week aan videospeletjies bestee. Baie volwassenes is ook verslaaf. Neem die voorbeeld van ’n Christen met die naam Charles.a “Vir my was videospeletjies ’n ontsnapping, ’n manier om te ontspan en weg te breek van alles”, sê hy. “Maar ek was verslaaf. Ek was afhanklik van videospeletjies soos wat mense van dwelms of alkohol afhanklik is.”

Charles sê dat hy “aanhoudend” begin speel het toe hy omtrent 11 was. “Ek het nie demoniese of gewelddadige speletjies gespeel nie”, sê hy, “maar ek het heeltemal te veel gespeel. Ek het soms weke lank aan niks anders gedink nie as hoe om ’n sekere probleem in ’n speletjie op te los, of ek nou by die skool was of aan Christelike bedrywighede deelgeneem het.”

Die voorbladreeks van die Ontwaak! van 22 Desember 2002, “Elektroniese speletjies—Is daar ’n donker kant?” het ’n impak op Charles gehad. “Nadat ek dit gelees het, het ek minder probeer speel”, sê hy. “Maar na ’n ruk het ek maar weer in my ou gewoontes verval.”

Charles het voor sy troue en ’n ruk daarna daarin geslaag om minder te speel. “Maar toe”, vertel hy, “het ’n nuwe speletjie uitgekom waarvoor ek al lank gewag het. Ek het skuld gemaak om ’n rekenaar te koop wat die stelselvereistes vir die speletjie gehad het. Dit was die tydrowendste videospeletjie wat ek nog ooit gespeel het. Dit het my beroof van my tyd vir Jehovah. Ek het ook my vrou verwaarloos.” Charles het spoedig besef dat drastiese optrede nodig was. “Ek het besluit om al my videospeletjies te vernietig”, sê hy. “Ek het dit van my rekenaar verwyder en dit alles op die munisipale vullishoop gaan gooi.”

Is Charles spyt oor sy besluit? Nie in die minste nie! “Woorde kan nie beskryf hoe verlig ek gevoel het nadat ek dit uiteindelik gedoen het nie”, sê hy. “Dit was ’n groot las van my skouers af. Ek voel nader aan Jehovah as ooit, en ek praat gereeld met hom in gebed. Ek gee ook meer aandag aan my vrou. Ek is so dankbaar dat ek my verslawing kon oorkom. Ek is net spyt dat ek dit nie vroeër gedoen het nie.”

[Voetnoot]