Hoofstuk 30

Moet ek elektroniese speletjies speel?

“REKENAARSPELETJIES is opwindend en cool”, sê ’n seun met die naam Brian. “Jy kan in die speletjie dinge doen wat jy nooit in die werklike lewe sou doen nie—ten minste nie sonder om in groot moeilikheid te beland nie.” Deborah sê dat sy dit ook geniet om rekenaarspeletjies te speel. Maar sy voeg ’n woordjie van waarskuwing by: “Dit kan baie tydrowend, amper verslawend, wees.”

Elektroniese speletjies is ongetwyfeld meer as net hipertegnologiese vermaak. Ja, dit toets jou vaardigheid en keer dat jy verveeld raak. Maar dit doen meer. Elektroniese speletjies kan jou reflekse verskerp. Party kan selfs jou wiskundige en leesvaardighede verbeter. Buitendien sal die nuutste elektroniese speletjie heel moontlik die onderwerp wees waaroor daar by die skool gepraat word. As jy die speletjie gespeel het, het jy iets waaroor jy met jou skoolmaats kan gesels.

As jy versigtig kies, sal jy sekerlik ’n speletjie kan vind wat opwindend én aanvaarbaar is. Maar waarom moet jy versigtig wees?

Die donker kant

Ongelukkig is nie alle elektroniese speletjies onskadelike pret nie. Baie van vandag se vermaaklikheidsagteware bevorder openlik wat die Bybel “werke van die vlees” noem—onrein gebruike wat deur God veroordeel word.—Galasiërs 5:19-21.

Adrian, 18, beskryf een besonder gewilde speletjie en sê dat “bendeoorloë, dwelmmisbruik, eksplisiete seks, vuil taal, intense geweld, bloedvergieting en grusame tonele” daarin voorkom. Party speletjies verheerlik okkulte gebruike. En elke nuwe vrystelling laat die vorige speletjies mak lyk. Baie van hierdie gewelddadige speletjies kan met ander mense oor die Internet gespeel word. Dít gee aan speletjies ’n heel nuwe dimensie. “Van jou tuisrekenaar af”, sê die 19-jarige James, “kan jy teen mense speel wat aan die ander kant van die wêreld woon.”

Karakterspeletjies (role-playing games) oor die Internet het uiters gewild geword. Wanneer mense hierdie speletjies speel, skep hulle aanlynkarakters—hetsy ’n mens of ’n dier of ’n kombinasie van die twee—wat ’n virtuele wêreld bewoon waarin daar duisende ander spelers is. In hierdie aanlynwêreld is daar winkels, karre, huise, dansklubs, bordele—dit is in baie opsigte ’n replika van die werklike wêreld. Die spelers in hierdie speletjies kan vir mekaar kitsboodskappe stuur wanneer daar kontak is tussen hulle virtuele karakters, wat avatars genoem word.

Mafia-lede, koppelaars (pimps), prostitute, afpersers, vervalsers en sluipmoordenaars is maar net ’n paar van die ongure karakters wat hierdie kuberwêreld bewoon. Spelers kan dinge doen wat hulle nooit in die werklike lewe sou doen nie. Deur net ’n paar knoppies te druk, kan avatars met mekaar seks hê terwyl die werklike spelers deur middel van kitsboodskappe oor seks praat. Party speletjies laat spelers se avatars toe om seks te hê met avatars wat soos kinders lyk. Dis te verstane dat kritici besorg is oor die feit dat mense sulke perverse dade in ’n speletjie sou toelaat.

Waarom jou keuse saak maak

Mense wat hierdie gewelddadige of seksueel eksplisiete speletjies speel, sê dalk: “Niemand kry seer nie. Dis nie werklik nie. Dis net ’n speletjie.” Maar moenie jou deur hierdie valse redenasie om die bos laat lei nie!

Die Bybel sê: “Deur sy handelinge laat ’n seun hom tog ken, of sy optrede suiwer en reg is” (Spreuke 20:11). Kan jou optrede as suiwer en reg beskryf word as jy gewelddadige, onsedelike speletjies speel? Studies toon keer op keer dat mense wat na gewelddadige vermaak kyk, aggressiewer word. Om die waarheid te sê, volgens party deskundiges is die uitwerking van elektroniese speletjies kragtiger as dié van TV, aangesien dit interaktief is.

As jy gewelddadige of onsedelike elektroniese speletjies speel, is dit soos om met radioaktiewe afval te speel—die skadelike gevolge word dalk nie onmiddellik gesien nie, maar dis onvermydelik. Hoe so? Blootstelling aan hoë vlakke van straling kan die maagvlies vernietig en toelaat dat bakterieë van die ingewande die bloedstroom binnedring, wat siekte veroorsaak. Net so kan blootstelling aan eksplisiete seks en grusame geweld jou “sedelikheidsgevoel” beskadig en toelaat dat vleeslike begeertes jou denke en gedrag binnedring en oorheers.—Efesiërs 4:19; Galasiërs 6:7, 8.

Watter speletjie moet ek kies?

As jou ouers jou toelaat om elektroniese speletjies te speel, hoe kan jy besluit watter speletjies om te speel en hoeveel tyd jy daaraan sal bestee? Vra jou die volgende vrae af:

Watter uitwerking sal my keuse hê op hoe Jehovah my beskou? “Jehovah ondersoek die regverdige sowel as die goddelose, en Sy siel haat beslis elkeen wat geweld liefhet”, sê Psalm 11:5. God se Woord sê aangaande diegene wat aan okkulte gebruike deelneem: “Elkeen wat hierdie dinge doen, is vir Jehovah verfoeilik” (Deuteronomium 18:10-12). As jy ’n vriend van God wil wees, moet jy die raad volg wat in Psalm 97:10 opgeteken is: “Haat die kwaad.”

Hoe sal die speletjie my denke beïnvloed? Vra jou af: ‘Sal hierdie speletjie dit vir my makliker of moeiliker maak om te “vlug vir die hoerery”?’ (1 Korintiërs 6:18). Speletjies wat jou aan seksueel prikkelende beelde of gesprekke blootstel, sal jou nie help om net aan regverdige, kuis en deugsame dinge te dink nie.—Filippense 4:8.

Hoeveel tyd sal ek aan die speletjie bestee? Selfs die onskuldigste speletjies kan baie tyd in beslag neem. Hou dus ’n rekord van hoeveel tyd jy aan speletjies bestee. Neem dit tyd in beslag wat jy vir belangriker dinge nodig het? As jy bewus bly van hoe jy jou tyd gebruik, sal dit jou help om jou prioriteite in orde te kry.—Efesiërs 5:16.

Die Bybel vereis natuurlik nie dat jy die hele tyd net moet studeer of werk nie. Inteendeel, dit herinner ons almal daaraan dat daar “’n tyd [is] om te lag . . . en ’n tyd om rond te huppel” (Prediker 3:4). Dis interessant dat die uitdrukking “om rond te huppel” nie net na speel verwys nie, maar ook na fisiese aktiwiteit. Daarom kan jy gerus van jou vrye tyd gebruik om speletjies te speel wat fisiese aktiwiteit behels, eerder as om net voor ’n skerm te sit.

Kies wyslik

Dit kan ongetwyfeld pret wees om elektroniese speletjies te speel, veral as jy dit goed kan doen. En dis juis waarom jy jou speletjies wyslik moet kies. Vra jou af: ‘Wat is my beste vakke op skool?’ Is dit nie gewoonlik dié wat jy geniet nie? Om die waarheid te sê, dis net logies dat die vakke waarvan jy die meeste hou, die grootste impak op jou sal hê. Vra jou nou af: ‘Van watter speletjie hou ek die meeste? Watter sedelike lesse leer ek uit hierdie speletjie?’

Pleks van ’n speletjie te speel net omdat jou maats daarvan hou, moet jy die moed hê om jou eie ingeligte keuse te maak. Pas bowenal die Bybel se raad toe: “Hou aan om seker te maak van wat vir die Here aanneemlik is.”—Efesiërs 5:10.

SLEUTELTEKSTE

“Julle wat Jehovah liefhet, haat die kwaad.”—Psalm 97:10.

WENK

Skryf ’n kort opsomming van elkeen van die speletjies wat jy wil speel, met ’n beskrywing van die doel van die speletjie en die metodes wat gebruik word om dit te bereik. Vergelyk jou beskrywing met die Bybelbeginsels wat in hierdie hoofstuk genoem word, en besluit dan of die speletjie gepas is.

HET JY GEWEET . . . ?

Die wêreld se eerste rehabilitasiekliniek uitsluitlik vir mense wat aan aanlynspeletjies verslaaf is, is in 2006 in Amsterdam, Nederland, geopen.

AKSIEPLAN!

As ’n vriend my vra om ’n gewelddadige of onsedelike elektroniese speletjie te speel, sal ek sê ․․․․․

Ek sal die tyd wat ek aan elektroniese speletjies bestee, beperk tot ․․․․․ per week, en ek kan dit doen deur ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Watter uitwerking kan elektroniese speletjies op ’n mens se denke en emosies hê?

● Waarom is dit belangrik om Jehovah se sedelike standaarde in gedagte te hou wanneer jy ’n speletjie kies?

● Hoe sou jy jou jonger broer of suster help wat gedurig ’n speletjie speel wat jy weet sleg is?

[Lokteks op bladsy 249]

Baie speletjies maak jou ongevoelig vir dinge soos geweld, vuil taal en onsedelikheid, en dit kan maak dat jy jou waaksaamheid in ander aspekte van die lewe laat verslap. Jy moet baie versigtig wees wanneer jy ’n speletjie kies.’’—Amy

[Prent op bladsy 250]

Om gewelddadige of onsedelike speletjies te speel, is soos om met radioaktiewe afval te speel—die gevolge word dalk nie onmiddellik gesien nie, maar dis onvermydelik