Huise met “pelsjasse”
Deur Ontwaak!-medewerker in die Oekraïne
ORAL in die Oekraïne word winkels, huise en kantoorgeboue met ’n bedekking versier wat sjoeba genoem word. Sjoeba beteken “pelsjas” en is ’n tradisionele stukadoorsafwerking (stucco) van geboue wat soos die wollerige binnekant van ’n skaapvelbaadjie lyk. Rykes wat in paleisagtige huise woon waardeer die prag van sjoeba, en selfs arm boere sal baie geld uitgee om hulle huisies met so ’n “pelsjas” te versier.
Die tegnieke wat gebruik word om hierdie stukadoorsafwerking aan te bring, kan gewoonlik binne omtrent twee jaar aangeleer word. ’n Sjoebavakman gebruik net ’n paar eenvoudige stukke gereedskap. Dit bestaan uit ’n emmer om nat sement in te hou, ’n kort besem en ’n houtstok of metaalstaaf. Maar dit is nie maklik om sjoeba te skep nie.
Sjoeba is meer as net ’n stukadoorsafwerking—dit behels ’n verskeidenheid patrone, ontwerpe, kleure en diktes. Slegs wanneer ’n vakman ’n oog vir die kunstige moontlikhede van die gebou voor hom het, kan hy die kuns bemeester om ’n huis met sjoeba te bedek.
Die verskillende ontwerpe of geometriese patrone wat gebruik gaan word, kan op die muur geteken word voordat die sement daarop aangebring word. Kontraste in die ontwerp word verkry deur donker en ligte sement in verskillende diktes aan te bring. Nadat die sjoeba droog geword het, word dit gespuitverf sodat dit nog mooier en interessanter lyk.
Die vakman hou sy besem in die een hand en druk dit in die sement. Dan kap hy die besem hard teen sy stok of staaf, wat hy in sy ander hand vashou. Die sement skiet deur die lug en beland op die muur. ’n Vakman wat teen ’n goeie pas werk, kan tussen 20 en 25 vierkante meter muur per dag bedek.
Hoewel dit arbeidsintensief is om sjoeba op huise aan te bring, vereis dit baie min instandhouding. Die huisbewoner moet net die stof verwyder deur die mure een keer per jaar liggies met water af te spuit en daarna die dele verf wat verdof het. As hierdie stappe gevolg word, sal die sjoeba beslis lank hou. Om die waarheid te sê, baie huise lyk nog steeds nuut in hulle 20 jaar oue “jasse”.
Een vakman het die geleentheid gehad om sy vaardighede in die buiteland te gebruik. Toe hy ’n vriend in Balingen, Duitsland, besoek het, is hy gevra om sjoeba op sy vriend se huis aan te bring. Hoewel sjoeba in die Oekraïne iets alledaags is, was dit in hierdie dorp ’n nuwigheid.
Terwyl die vakman die sjoeba aangebring het, het hy die aandag van die hele buurt getrek. ’n Boukontrakteur het grootoog toegekyk en kon nie glo dat iets so moois met sulke eenvoudige gereedskap geskep word nie. Motorbestuurders het hulle nekke gerek om te kan sien wat aangaan terwyl hulle stadig verbygery het, en ’n joernalis het foto’s hiervan vir die plaaslike koerant geneem. Toe die huis klaar was, het dit ’n prys van die stad ontvang.
Sal sjoeba goed lyk in jou buurt? Miskien sal ’n pragtige nuwe “pelsjas” jou huis sommer ’n heel nuwe voorkoms gee.
[Prent op bladsy 23]
Die huis in Balingen, Duitsland, wat met sjoeba bedek is en ’n prys gewen het
[Prent op bladsy 23]
’n Sjoebavakman se gereedskap sluit ’n kort besem en ’n houtstok in
[Prent op bladsy 23]
Dit verg groot vaardigheid om sjoeba op ’n huis aan te bring