Die wetenskap en die Bybel het my gehelp om die sin van die lewe te vind

SOOS VERTEL DEUR BERND OELSCHLÄGEL

My soeke na die sin van die lewe het 20 jaar geduur. Twee dinge het my gehelp om dit te vind: die wetenskap en die Bybel. My studie van die wetenskap het my oortuig dat die lewe sin moet hê. Maar die Bybel het die sin van die lewe aan my geopenbaar en my gehelp om dit te verstaan.

JY HET dalk al gehoor dat sommige mense sê dat die wetenskap die Bybel weerspreek. Ek het albei bestudeer, en ek kan nie met hulle saamstem nie. Miskien stel jy belang om te weet waarom.

Ek is in 1962 in Stuttgart, ’n stad in die suide van Duitsland, gebore. My pa was ’n masjienontwerper, en hy en my ma was baie betrokke by die kerk. Karin, my suster, is vier jaar voor my gebore. ’n Opwindende gebeurtenis in my kinderdae was toe my pa vir my ’n wetenskapstelletjie gegee het waarmee ek eksperimente kon doen. Dit was groot pret om basiese natuur- en skeikundige eksperimente te doen. Ja, ek het dit geniet om te leer.

Later is my wetenskapstelletjie met ’n rekenaar vervang. Selfs as ’n tiener kon ek sien dat die brein die beste rekenaar is. Maar ek het gewonder: ‘Waar kom die brein vandaan? Wie het dit vir ons gegee? En wat is die sin van die lewe?’

Die najaging van hoër onderwys

Ek het op 16 die skool verlaat en met ’n vakleerlingskap as ’n assistent in ’n fotografiese laboratorium begin. Aangesien dit vir my die lekkerste was om dinge te leer, wou ek fisika op universiteit gaan studeer. Maar ’n universiteitskursus het ver in die toekoms gelê. Dit het my vyf jaar geneem net om aan die toelatingsvereistes te voldoen. Ek het in 1983 my universiteitsopleiding in Stuttgart begin en my studies in München voortgesit. Uiteindelik het ek in 1993 ’n doktor in die fisika aan die universiteit van Augsburg geword.

My vroeë dae op universiteit was nie maklik nie. Die lesingsaal was gewoonlik gevul met ongeveer 250 studente, waarvan baie binne ’n paar maande hulle studies gestaak het. Ek was vasbeslote om nie tou op te gooi nie, maar om klaar te maak waarmee ek begin het. Ek het in ’n studentekoshuis gebly en het in aanraking gekom met baie studente wat blykbaar net in pret belanggestel het. Assosiasie met hierdie mense was nie altyd ’n goeie ding nie. Gevolglik het ek begin om partytjies by te woon en dwelms te gebruik.

My soeke neem my na Indië

My studie van fisika het my ’n dieper begrip van die natuurwette in die heelal gegee. Ek het gehoop dat die wetenskap uiteindelik die sin van die lewe aan my sou openbaar. My soeke na die sin van die lewe het my egter verder as fisika geneem. In 1991 het ek saam met ’n groep na Indië gereis om Oosterse meditasie te leer. Wat ’n wonderlike ondervinding was dit tog om die land en sy mense self te sien! Maar die kontras tussen ryk en arm was vir my ’n groot skok.

Naby die stad Pune het ons byvoorbeeld ’n ghoeroe besoek wat beweer het dat die regte meditasietegnieke ’n mens kan help om ryk te word. Ons het elke oggend as ’n groep gemediteer. Die ghoeroe het ook medisyne ten duurste verkoop. Ons kon uit sy lewenstyl sien dat hy goed geld gemaak het. Ons het ook monnike gesien wat, in teenstelling met die ghoeroe, gelyk het asof hulle in armoede lewe. Ek het gewonder: ‘Waarom het meditasie hulle nie ook ryk gemaak nie?’ My reis na Indië het blykbaar net soveel vrae laat ontstaan as wat dit beantwoord het.

Een van die aandenkings wat ek uit Indië teruggebring het, was ’n meditasieklok. Daar is vir my gesê dat, indien die klok reg geslaan word, dit ’n musikale toon voortbring wat my sal help om reg te mediteer. Terug in Duitsland het ek ’n horoskoop gekoop wat deur iemand opgestel is wat glo my toekoms kon vooruitsien. Maar meditasie het niks oor die lewe aan my geopenbaar nie. Ek was teleurgesteld toe ek ontdek het dat ’n horoskoop net ’n waardelose stuk papier is. My vrae oor die sin van die lewe het dus onbeantwoord gebly.

Ek vind antwoorde in die Bybel

In 1993 het my lewe ’n onverwagte wending geneem. Ek het my studies en navorsing voltooi en was besig om my doktorstesis oor kwantumfisika te skryf. Ek het byna dag en nag gewerk om dit betyds klaar te kry, ten koste van alle ander dinge. Een middag was daar onverwags ’n klop aan die deur. Ek het oopgemaak en twee vroue daar sien staan.

“Het jy geweet dat die jaar 1914 volgens die Bybel ’n baie spesiale jaar was?” het hulle gevra. Die vraag het my oorbluf. Ek het nog nooit van so iets gehoor nie; ek het ook nie die tyd gehad om dit te ondersoek nie. Die vraag het nogtans my nuuskierigheid geprikkel. Hoe kon hulle beweer dat die Bybel lank gelede na 1914 as ’n spesiale jaar gewys het?

“Sal jy meer hieroor wil weet?” het hulle vervolgens gevra. Ek het gedink: ‘Ek sal beslis ’n teenstrydigheid in hulle argumente kan vind as ek luister na wat hulle te sê het.’ Ek het egter nie teenstrydighede gevind nie, maar wel oortuigende bewys dat die Bybel betroubaar is. Ek het geleer dat Bybelprofesieë duidelik toon dat God se Messiaanse Koninkryk—’n hemelse regering wat mettertyd oor die hele aarde sal heers—in 1914 opgerig is.a

Die vroue was Jehovah se Getuies, en hulle het vir my ’n eksemplaar van die boek Jy kan vir ewig in die Paradys op aarde lewe gegee.b Ek het dit binne ’n paar dae deurgelees en gevind dat alles daarin logies en redelik is. Die Getuies het my uit die Bybel gewys dat dit Jehovah se wil vir die mensdom is om vir ewig in ’n paradys op aarde te lewe. Volgens Bybelprofesieë sal hierdie belofte binnekort verwesenlik word. Wat ’n wonderlike hoop vir die toekoms! Hierdie hoop het my hart geraak en trane in my oë laat opwel. Kon dit wees waarna ek die afgelope 20 jaar gesoek het?

Ek het vinnig besef wat my doel in die lewe is: om Jehovah God te leer ken en hom heelhartig te dien. Ek het my studie van die Bybel saam met Jehovah se Getuies voortgesit omdat ek besef het dat ek die waarheid leer. My dors na geestelike dinge kon skaars geles word. Ek het in drie maande, terwyl ek my doktorstesis afgehandel het, die Bybel halfpad deurgelees.

Ek vind meer as net antwoorde

In Mei 1993 het ek my eerste vergadering by die plaaslike gemeente van Jehovah se Getuies by ’n Koninkryksaal in Augsburg bygewoon. Die leringe wat ek gehoor het, het na die waarheid geklink. Wat meer is, ek het op my gemak gevoel by die Getuies. Hulle het my hartlik gegroet en my welkom laat voel, al was ek ’n vreemdeling. ’n Bejaarde vrou het naby my gesit en die moeite gedoen om vir my ’n liedereboek in die hande te kry. Gedurende die volgende paar weke het ’n Getuie en sy jong seun my in hulle motor kom oplaai en my saamgeneem na die Koninkryksaal. Hierdie nuwe vriende het my kort voor lank begin oornooi. Mettertyd wou ek graag vir ander vertel wat ek oor die sin van die lewe geleer het.

Ek het wat ek uit die Bybel geleer het, ernstig opgeneem, en dit het my beweeg om sekere veranderinge in my lewe aan te bring. Ek wou byvoorbeeld nie meer voorwerpe hê wat met die okkulte verband gehou het nie. Ek het dus ontslae geraak van my horoskope asook die meditasieklok en ander godsdiensaandenkings uit Indië. My studie van die Bybel het goed gevorder, en ek het my aan Jehovah God toegewy, waarna ek in Junie 1994 as een van Jehovah se Getuies in München gedoop is. Sodoende het ek die ware sin van die lewe heelhartig aangeneem.

In September 1995 het ek ’n gewone pionier geword, ’n voltydse bedienaar van Jehovah se Getuies. Dit het beteken dat ek meer tyd daaraan bestee het om met mense oor God se voornemens te praat. Ek het dit gedoen deur staat te maak op die krag wat Jehovah gee. Saans, wanneer ek ná etlike ure in die bediening tuisgekom het, het ek dikwels ’n vreugde en tevredenheid ervaar wat ek nooit gehad het voordat ek Jehovah leer ken het nie. In Januarie 1997 is ek genooi om my voltydse diens voort te sit by die Duitse takkantoor van Jehovah se Getuies in Selters, wat Bethel genoem word en waar ek nou woon. My ouers het my al verskeie kere besoek, en al glo hulle nie soos ek nie, respekteer hulle Bethel en is hulle bly dat ek hier is.

Die wetenskap en die Bybel

Dalk wonder party mense hoe iemand wat jare lank die wetenskap bestudeer het, kan glo wat die Bybel sê. Wel, ek vind geen teenstrydigheid tussen die wetenskap en die Bybel nie. As ’n fisikus het ek die wette bestudeer waarvan lewe afhanklik is, en hierdie wette getuig van die feit dat hulle deur ’n bomenslike intelligensie ontwerp is.

Daar is byvoorbeeld talle teorieë in die fisika, skeikunde en biologie. En hoewel die teorieë dalk redelik eenvoudig is, kan die wiskunde wat daarmee verband hou, nietemin baie ingewikkeld wees. Briljante wetenskaplikes kom met teorieë vorendag en ontvang die Nobelprys vir hulle werk. Hoeveel briljanter moet die intelligente Wese tog wees wat die heelal, wat wetenskaplikes so hard probeer om te verstaan, ontwerp en geskep het!

Om soos baie evolusioniste te beweer dat lewe per toeval ontwikkel het, is ’n bietjie vergesog. Ter toeligting: Plaas tien sokkerballe ’n meter van mekaar af in ’n reguit ry op ’n sokkerveld. Probeer om die eerste bal te skop sodat dit die volgende een in die ry tref en al tien balle getref word. Probeer daarbenewens om die finale posisie van elke bal te voorspel. Dit is so onwaarskynlik dat jy dit sal regkry, dat die meeste mense sal dink dat dit onmoontlik is.

As dit die geval is, hoe kan enigiemand beweer dat die ontwikkeling van die mensesel—wat prosesse behels wat baie ingewikkelder is as om sokkerballe te skop—bloot toevallig was? Die redelikste verduideliking is dat ’n superintelligente Wese mense en alle ander lewensvorme op die aarde geskep het. Sou hierdie Wese, wat die Skepper is, so iets doen sonder om ’n voorneme daarmee te hê? Natuurlik nie. Hy moes ’n voorneme gehad het, en daardie voorneme word in die Bybel geopenbaar en verduidelik.

Soos jy kan sien, het die wetenskap sowel as die Bybel my gehelp om antwoorde te vind op die vrae oor die lewe wat ek so lank gehad het. Kan jy jou die groot verligting en vreugde voorstel wat ’n mens ervaar wanneer jy iets vind waarna jy meer as 20 jaar lank gesoek het? Dit is my hartsbegeerte om soveel mense moontlik te help om te vind wat ek uiteindelik gevind het—nie net antwoorde op my vrae nie, maar nog belangriker, die regte manier om die enigste ware God, Jehovah, te aanbid!

[Voetnote]

[Lokteks op bladsy 14]

As ’n fisikus het ek die wette bestudeer waarvan lewe afhanklik is, en hierdie wette getuig van die feit dat hulle deur ’n bomenslike intelligensie ontwerp is

[Prent op bladsy 12]

Toe ek 12 was

[Prent op bladsy 13]

In my soeke na die sin van die lewe, het ek my tot Oosterse meditasie gewend

[Prent op bladsy 15]

Om vir ander te getuig, laat my waarlik gelukkig en tevrede voel

[Erkenning]

Voorblad van boek: J. Hester and P. Scowen (AZ State Univ.), NASA