Ons beskou die wêreld

Versorgers onder stres

Volgens ’n studie deur Statistics Canada “moet drie uit 10 mense tussen die ouderdomme van 45 en 64 ’n bejaarde familielid versorg terwyl hulle ook na kinders omsien wat jonger as 25 is, en in baie gevalle werk hulle ook nog voltyds”, sê die Kanadese koerant die National Post. In die studie is bevind dat onder diegene wat vir bejaardes sorg terwyl hulle ook nog kinders grootmaak, meer vroue as mans aan depressie ly. Werkende vroue wy omtrent 29 uur per maand aan bejaardesorg en werkende mans sowat 13 uur per maand. Dit is ook waarskynliker dat vroue meer versorging sal bied, soos om vir die bejaardes te kook en hulle te bad. Meer as die helfte van die respondente het gevoel dat hulle “hulle beter van hulle taak sal kwyt as hulle nou en dan ’n blaaskans kry”, sê die Post.

Hoe lank moet ’n middagslapie wees?

“Wetenskaplikes vind dat die tradisionele middagslapie produktiwiteit kan verhoog”, berig Australië se Sydney Morning Herald. Die lengte van die middagslapie is egter belangrik. Nadat professor Leon Lack, slaapdeskundige van die Flinders-universiteit, die uitwerking ondersoek het wat middagslapies van verskeie lengtes op ’n mens het, het hy gesê: “’n Middagslapie van een minuut het blykbaar geen voordele ingehou nie. Vyf minute se slaap het blykbaar vir sommige mense voordele ingehou, maar nie besondere groot voordele nie. Dit het egter gelyk of 10 minute se slaap betekenisvolle verbeteringe voortgebring het op amper al die gebiede wat ons getoets het.” In teenstelling hiermee het mense wat langer uiltjies geknip het—tot 30 minute lank—gesê dat hulle tot ’n uur later nog moeg gevoel het.

’n Ateïs keer hom tot God

’n Britse professor in die filosofie wat al “die wêreld se invloedrykste ateïs” genoem is, sê nou dat hy in God glo. In ’n voorskou op die Internet van ’n onderhoud wat later in die tydskrif Philosophia Christi sal verskyn, het die 81-jarige dr. Antony Flew gesê dat hy hom “deur die bewyse moes laat lei”. Volgens Flew sluit hierdie bewyse onlangse wetenskaplike ontdekkings op die gebied van die kosmologie en die fisika in. Daarbenewens “het die bevindinge van meer as vyftig jaar se DNS-navorsing feite opgelewer wat ’n nuwe en geweldige sterk argument ten gunste van ontwerp steun”, het hy verduidelik. Selfs die “Bybelverslag [in Genesis hoofstuk een] kan wetenskaplik akkuraat wees”, sê hy. Is hy dus gereed om ’n belydende Christen te word? “Dit is baie onwaarskynlik”, sê hy. Maar “as ek enige toekomstige lewe wou hê, sal ek een van Jehovah se Getuies moet word”.

Gesonde tandvleis, gesonde hart?

As jy jou tande gereeld borsel, waardeur periodontale siekte voorkom word, kan jy die risiko van ’n beroerte of ’n hartaanval verminder, berig die koerant Milenio van Mexikostad. Navorsers van die Universiteit van Minnesota het gevind dat mense met hoë vlakke van bakterieë wat periodontale siekte veroorsaak, ook vernoude nekslagare het. Een moontlike verduideliking is dat “die mikro-organismes wat periodontale siekte veroorsaak, na die bloedstroom migreer en daarin versprei, wat die immuunstelsel stimuleer en ontsteking veroorsaak”, sê die koerant. Navorsers meen dat die ontsteking dan die opbou van vetneerslae in die slagare verhoog of bydra tot die vorming van bloedklonte wat tot hartaanvalle kan lei. Daarom “kan goeie mondhigiëne ’n noemenswaardige uitwerking op jou kardiovaskulêre gesondheid hê”, sê Milenio.

Herinneringe aan Auschwitz vervaag

Tydens die Tweede Wêreldoorlog het meer as eenmiljoen mense in die berugte Auschwitz-doodskamp in Pole gesterf. Maar volgens The Daily Telegraph van Londen “het byna die helfte van die volwasse bevolking [van Engeland] nog nooit van Auschwitz gehoor nie”. Die meningsopname onder 4 000 mense is in opdrag van die Britse Uitsaaikorporasie gedoen om die 60ste herdenking van die bevryding van die doodskamp te vier.

’n Pop om braille te leer

Die Spaanse Nasionale Organisasie vir Blindes (ONCE) het ’n pop bekend gestel met die naam Braillín. Die pop, wat bedoel is om jong kinders braille te leer, het ’n paneel op die voorkant met ses groterige knoppies wat ooreenstem met die groep van ses knoppies wat in braille gebruik word. Selfs seuns of meisies wat kan sien, kan braille leer terwyl hulle met Braillín speel. Dertig deskundiges het die pop verfyn en getoets, en omtrent 50 kinders het gehelp om die ontwerp daarvan te verbeter. ONCE beplan om meer as 1 100 Braillín-poppe in sy skole vir blindes te versprei. Volgens María Costa van die Vereniging vir Navorsing in die Speelgoedbedryf “is Braillín ’n uitstekende leermiddel. Daarbenewens bied dit [kinders] ’n nuwe manier om met poppe te speel, een wat dit pret maak om te leer.”

Dodelike lugbesoedeling

“Elke jaar veroorsaak lugbesoedeling 310 000 sterftes in Europa”, berig die Spaanse koerant El País. Deskundiges is baie bekommerd oor twee besoedelstowwe: atmosferiese osoon op lae vlakke en swewende deeltjies in die lug. Hierdie deeltjies word vrygestel tydens die verbranding van fossielbrandstowwe, hoofsaaklik deur motors, kragstasies en nywerheidsaanlegte. Die ergste vlakke in Europa word gevind in die Benelux-gebied, gevolg deur Noord-Italië en Oos-Europa. Die koerant voeg by: “Benewens die feit dat lugbesoedeling mense se gesondheid aantas, is dit ook nadelig vir die omgewing. Dit veroorsaak dat sure in woude, mere en ander ekosisteme opbou. Osoon is skadelik vir gesaaides, en lugbesoedeling beskadig geboue in stede.”

Katolieke bisdomme bankrot

Teen die einde van 2004 het drie Katolieke bisdomme in die Verenigde State aansoek gedoen om bankrot verklaar te word. Al drie moes noodgedwonge hierdie stap neem weens die finansiële koste van skandale waarin geestelikes hulle aan seksuele molestering skuldig gemaak het. ’n Aantal bisdomme het gesê dat hulle moontlik sal moet aansoek doen om bankrot verklaar te word, maar die Aartsbisdom van Portland, Oregon, was in Julie 2004 die eerste wat dit gedoen het. Dit het twee hofsake tot ’n einde gebring waarin eisers altesaam $155 miljoen (R1,1 miljard) as skadevergoeding vir molestering wou hê. Volgens die National Catholic Reporter “het die aartsbisdom en sy versekeraars alreeds meer as $53 miljoen [R364 miljoen] betaal om meer as 130 eise deur mense wat sê dat hulle deur priesters gemolesteer is, af te handel”. In September 2004 het die bisdom van Tucson, Arizona, die tweede bisdom geword wat bankrotskapbeskerming gesoek het teen multimiljoendollareise wat teen hulle ingestel is. In Desember 2004 het die bisdom van Spokane, Washington, die derde een geword wat hierdie stap geneem het.