Bybelverhale in ys en sneeu
DEUR ONTWAAK!-MEDEWERKER IN DUITSLAND
“ABSOLUUT fantasties!” Dit is hoe Anja haar indrukke beskryf het. Georg het gesê: “Dit is verbasend wat ’n mens van ys en sneeu kan maak.” Dit het ons nuuskierigheid geprikkel, en ’n groep van ons het na Lübeck in Noord-Duitsland gegaan om na Ice World, ’n ysbeeldhoufees, te gaan kyk. Die tema was “Die Bybel—verhale uit die Ou Testament en die Nuwe Testament”.
Toe ons in Lübeck aankom, het reënwolke oor die beroemde Holstentor gehang. Net ’n paar treë daarvandaan het ’n gewone markiestent gestaan. Maar binne is ons begroet deur ’n kleurvolle, glinsterende wêreld van sneeu en ys wat bestaan het uit deurskynende ysfigure wat skitter onder gekleurde ligte.
Selfs voordat ons ons toer begin het, het ons gedink aan die advies wat ons gekry het om warm aan te trek—dit was koud in die tent! Hoewel minus tien grade Celsius dalk matig is vir inwoners van koue streke, was ’n paar van ons bekommerd toe ons besef dat ons ons serpe en handskoene vergeet het. Maar die kleurvolle, betowerende ysfigure het vir ons ongerief vergoed.
Bybeltonele in ys
Ons het ’n engel, met fyn voue in sy kleed, gesien wat ’n trompet blaas. Dit het gelyk of die standbeeld bo die sneeubedekte grond hang. Daar was ’n ysuitstalling van die verskillende stadiums van die skepping, insluitende die skepping van Adam. Verderaan het ons by Noag se ark gekom. Ons het geglimlag toe ons die seekoei sien wat sy maat deur die ark se deur probeer stoot terwyl dit lyk of ’n knaagdiertjie van ys onderdeur die voorste seekoei se maag in die ark insluip. Noag het daar naby, langs ’n stapel “hout”, gestaan.
Ons het toe by ’n toneel in die tuin van Eden gekom wat Adam en Eva se sonde uitbeeld. Daarna het ons by ’n reusagtige figuur gaan staan wat ons graag van nader wou ondersoek: Moses met die twee tafels van die Wet in sy hand. Waarom het veral hierdie standbeeld ons aandag getrek?
Dit was nie die Tien Gebooie wat op die ystafels was nie, maar die Tetragrammaton—God se persoonlike naam, Jehovah! Ons was verheug om God se naam in sy Hebreeuse vorm op so ’n opsigtelike plek te sien. Die brosjure van die uitstalling het selfs hierdie Moses-figuur op die voorblad vertoon, met die Tetragrammaton reg in die middel waar dit maklik gesien kan word. Ons het heelwat foto’s van die toneel geneem. Nie ver hiervandaan nie was ’n standbeeld van ’n glinsterende kalf onder ’n goue kollig. Vir ons was dit ’n herinnering aan die onsedelike afgodediens waarby die Israeliete betrokke was kort nadat hulle uit Egipte verlos is.
Ongelukkig was die muurkunswerke van Jakob en Esau en die een van Josef en Farao wat van sneeu gemaak is, nie maklik herkenbaar nie. Dit is te verstane, want van die muurkunswerke het begin smelt aangesien sowat 100 000 mense die uitstalling binne die eerste drie weke besoek het. Tog was dit nie die geval met die groot beeld van Simson nie, wat besig was om die pilare van die Filistynse tempel om te stoot. In ’n ander toneel word hy uitgebeeld waar Delila sy hare laat sny het.
Daar was ook standbeelde van die Bybelkarakter Dawid, eers waar hy Goliat verslaan en daarna waar hy nie die versoeking kon weerstaan om na Batseba te kyk terwyl sy bad nie. In ’n ander hoek was ’n afbeelding van Jesus se geboorte. Dit was oorkant die sneeutoneel wat die Laaste Avondmaal uitgebeeld het.
Nadat ons na al hierdie standbeelde gekyk het, was ons yskoud. Daarom het ons buitentoe gestap na die kafee in die aangrensende Holstein-saal. ’n Video oor hoe die standbeelde gemaak is, het op verskeie skerms in die saal gewys.
Hoe die beelde gemaak is
Aanvanklik is 350 ton kristalhelder ys in blokke van omtrent 2 meter by 1 meter by 0,6 meter per vragmotor van België vervoer en op mekaar gestapel volgens die grootte van die standbeelde wat daaruit gemaak sou word. Sneeumasjiene het 200 ton sneeu vervaardig en dit in groot houers ingeblaas. Die beeldhouers het kettingsae, beitels, tandeborsels en strooitjies gebruik om die ys en sneeu in Bybeltonele te omskep.
Om die geskikte klimaatstoestande te skep en te handhaaf, was volgens die projekleier Jana Kürbis, die grootste uitdaging van die projek. Maar al die werk wat gedoen is, is grootliks waardeer. Een vrou het uitgeroep: “Ongelooflik!” ’n Man het gesê dat die uitstalling “regtig wonderlik” was. Sy vrou was egter spyt dat sy so min van die Bybel weet.
Baie mense, insluitende jonges, het van die een beeld na die volgende gegaan en ’n beskrywing van die agtergrond van die spesifieke Bybeltoneel gelees. Ons het Ice World verlaat, nie net met ’n hele paar rolle opgebruikte film nie, maar ook met blywende indrukke van Bybelverhale in sneeu en ys.
[Prent op bladsy 16]
Die Hebreeuse vorm van God se persoonlike naam, Jehovah, het op die uitstalling se brosjure verskyn
[Prent op bladsy 16, 17]
Die skepping van Adam
[Prent op bladsy 17]
Simson stoot die pilare van die Filistynse tempel om
[Prent op bladsy 17]
Dawid en Goliat
[Prent op bladsy 17]
Noag se ark
[Foto-erkennings op bladsy 16]
Moses in ys: Foto von: Nils Bergmann; sneeukristal: snowcrystals.net; die skepping van Adam: Foto von: Nils Bergmann