Aan ons lesers

VANAF hierdie nommer sal die formaat van die Ontwaak! effens verander. Hoewel dit merendeels dieselfde sal bly, sal daar ’n paar veranderinge wees.

Ontwaak! het nog steeds dieselfde oogmerk as wat dit al dekades lank het. Soos verduidelik word op bladsy 4, word “hierdie tydskrif . . . uitgegee om die hele gesin in te lig”. Ontwaak! ondersoek wêreldgebeure, vertel van mense in verskillende kulture, beskryf die wonders van die skepping, bespreek gesondheid of verduidelik wetenskap vir die niewetenskaplike, en ons sal voortgaan om ons lesers in te lig en hulle bewus te maak van dinge in die wêreld om ons.

In die nommer van November 1946 het Ontwaak! belowe: “Getrouheid aan die waarheid sal die hoogste strewe van hierdie tydskrif wees.” In ooreenstemming met hierdie belofte het Ontwaak! nog altyd daarna gestreef om feitelike inligting te publiseer. Met hierdie doel word artikels deeglik nagevors en versigtig nagegaan om akkuraatheid te verseker. Maar hierdie tydskrif het “getrouheid aan die waarheid” op ’n selfs belangriker manier geopenbaar.

Ontwaak! het nog altyd lesers na die Bybel gerig. Maar vanaf hierdie nommer sal Ontwaak! selfs meer Bybelse artikels bevat as in die verlede (Johannes 17:17). Ontwaak! sal ook steeds artikels bevat wat toon hoe die Bybel se praktiese raad ons kan help om vandag betekenisvolle en suksesvolle lewens te lei. Byvoorbeeld, baie Bybelraad word voorsien in die reekse “Jongmense vra . . . ” en “Die Bybel se beskouing”, wat nog steeds in hierdie tydskrif sal verskyn. Daarbenewens sal Ontwaak! voortgaan om lesers te rig na die Bybel se belofte van die vreedsame nuwe wêreld wat binnekort die huidige wettelose stelsel van dinge gaan vervang.—Openbaring 21:3, 4.

Watter ander veranderinge gaan daar wees? Vanaf hierdie nommer sal die Ontwaak! maandeliks uitgegee word in die meeste van die 82 tale waarin dit verskyn (voorheen is dit in baie tale halfmaandeliks uitgegee).a “Ons beskou die wêreld”, ’n gereelde rubriek sedert 1946, sal steeds in elke nommer verskyn, maar sal van twee bladsye na een verkort word. Op bladsy 31 stel ons ook ’n opwindende, nuwe kenmerk bekend wat gereeld sal verskyn, naamlik “Hoe sal jy antwoord?” Wat sal dit bevat, en hoe kan jy dit gebruik?

Neem ’n oomblik om na bladsy 31 van hierdie tydskrif te kyk. Jong lesers sal sommige gedeeltes op hierdie bladsy interessant vind; ander dele sal die geheue van meer gevorderde Bybelstudente toets. Die gedeelte “Wanneer in die geskiedenis?” sal jou help om ’n tydlyn te maak wat toon wanneer Bybelkarakters gelewe het en wanneer belangrike gebeure plaasgevind het. Die antwoorde op die gedeelte “In hierdie nommer” sal êrens in die tydskrif gevind kan word, maar die antwoorde op die meeste van die ander vrae sal op ’n gegewe bladsy in dieselfde tydskrif verskyn, waar dit onderstebo gedruk sal wees. Jy kan gerus navorsing doen voordat jy daardie antwoorde lees, en dan kan jy ander daarvan vertel. Jy kan selfs hierdie nuwe rubriek, “Hoe sal jy antwoord?” gebruik vir gesins- of groepbesprekings van die Bybel.

Sowat 60 jaar gelede het Ontwaak! hierdie belofte gemaak: “Wat die materiaal betref wat gedek sal word, sal hierdie tydskrif daarna streef om liewer inligting uit ’n wêreldwye standpunt te behandel as uit ’n plaaslike. Dit sal spreek tot eerlike mense uit alle lande. . . . Die materiaal en inhoud van die tydskrif sal . . . leersaam, opvoedkundig en interessant wees vir die meeste mense, jonk sowel as oud.” Lesers van regoor die wêreld stem saam dat Ontwaak! daardie belofte nagekom het. Ons verseker jou dat ons sal voortgaan om dit te doen.

Die Uitgewers

[Voetnoot]

[Prente op bladsy 3]

In 1919 is dit “The Golden Age” genoem, in 1937 is die naam na “Consolation” (“Vertroosting”) verander en in 1946 na “Awake!” (“Ontwaak!”)

[Prente op bladsy 4]

“Ontwaak!” rig lank reeds sy lesers na die Bybel

[Erkennings]

Gewere: U.S. National Archives photo; honger kind: WHO photo by W. Cutting