Die Ontwaak!—’n Tydskrif met tets vir almal

Hierdie tydskrif se oorspronklike naam was The Golden Age. Die eerste nommer was dié van 1 Oktober 1919. Dit was ’n tydskrif wat verslag gedoen het oor mensestrewes op baie gebiede. Dit het mense ingelig oor wat in die wêreld aangaan en hulle daarop gewys dat die ware oplossing vir die mensdom se probleme in Christus se Duisendjarige Heerskappy lê, wat waarlik ’n “goue eeu” gaan inlui. Die voorbladontwerp van die tydskrif is verander, maar die boodskap het dieselfde gebly. The Golden Age was bedoel vir openbare verspreiding, en baie jare lank het sy sirkulasie dié van Die Wagtoring ver oortref.

Van die nommer van 6 Oktober 1937 af is die naam na Vertroosting verander. Dit was baie gepas met die oog op die verdrukking wat soveel mense gely het en die chaos waarin die wêreld gedurende die Tweede Wêreldoorlog gedompel is. Die soort vertroosting wat die tydskrif gebied het, het egter net ingang gevind by mense wat ’n opregte liefde vir die waarheid het.

Van die nommer van 22 Augustus 1946 af is die tydskrif Ontwaak! genoem. Die klem word daarop geplaas om mense wakker te hou vir die betekenis van wêreldgebeure. Die tydskrif maak gebruik van gewone nuuskanale, maar het ook sy medewerkers oor die hele aarde. Die gebalanseerde, praktiese diepteartikels in die Ontwaak! wat ’n breë spektrum van onderwerpe bespreek, moedig lesers aan om hierdie tydskrif se belangrikste boodskap te ondersoek, naamlik dat wêreldgebeure Bybelprofesieë vervul, wat toon dat ons in die laaste dae lewe en dat God se Koninkryk eerlank ewige seëninge gaan uitstort oor diegene wat God se wil leer ken en dit dan doen. Hierdie tydskrif was en is ’n doeltreffende instrument in die wêreldwye verkondiging van die goeie nuus van God se Koninkryk en lei mense na dieper studiemateriaal, soos in Die Wagtoring en die boeke bespreek word.

Teen vroeg in 1993 is die Ontwaak! in 67 tale gedruk, 13 240-000 eksemplare per nommer.