Van ons lesers
Hoe om werk te kry en dit te behou (8 Julie 2005) Ek het julle wenk waardeer om vir elke werkgeleentheid aansoek te doen, al lyk dit dalk na minderwaardige werk. Ek wou onlangs oorskakel na deeltydse werk sodat ek meer tyd aan my Christelike bediening kon bestee. Maar ek was te kieskeurig oor die soort werk wat ek sou aanvaar. Ek is toe ’n ander werk aangebied, wat ek aanvaar het. Dit is ’n nederige werk, maar ek lê my daarop toe om tevrede te wees. Ten minste is ek nie verstandelik uitgeput wanneer ek by die huis kom nie, en ek kan op my persoonlike Bybelstudie konsentreer.
M. I., Japan
Meidag—Wat beteken dit vir jou? (22 April 2005) Ek is ’n seniorleerling op hoërskool, en daar is elke jaar ’n Meidagviering by ons skool. Hulle hou ’n kleedrepetisie, en al die junior- en seniorleerlinge word gevra om daarna te kom kyk. Ek het dit in die verlede bygewoon, maar die viering het my suster se gewete gepla. Hierdie artikel het my help besef dat sy reg was! Baie dankie. Die artikel het net op die regte tyd gekom!
C. C., Verenigde State
Verduur siekte met ’n sin vir humor (22 April 2005) Ek voer al ses jaar lank ’n stryd teen kanker van die ovaria, en ek het al verskeie kere chirurgie en chemoterapie ondergaan. Soos Conchi probeer ek om gemeentelike reëlings te ondersteun en om al die vergaderinge en byeenkomste by te woon wanneer ek kan. Kanker is ’n uitmergelende siekte; daarom waardeer ek Conchi se kommentare oor hoe om die slegte nuus te hanteer wat ons as kankerpasiënte voortdurend van dokters kry. Conchi se ondervinding was regtig bemoedigend vir my!
B. F., Verenigde State
Ek ly aan lupus, en eenkeer het ek selfs ’n tyd lank aan geheueverlies gely. Terwyl ek aangesterk het, het ek probeer om ’n sin vir humor te behou. Toe ek onlangs in die hospitaal was met maagvliesontsteking het ek dieselfde probeer doen. Ek stem saam met Conchi se woorde: “Dit is nie ’n grap om siek te wees nie, maar jy moet ’n sin vir humor probeer behou.”
M. A., Venezuela
Ons beskou die wêreld (8 Julie 2005) Wat die nuusbrokkie “Vitamienaanvullings en kanker” betref, wil ek julle graag daarop wys dat baie voedingkundiges nie dr. Sullivan se mening, soos aangehaal, deel nie. Volgens verslae in tallose wetenskappublikasies en ’n menigte studies is die stowwe wat julle meld, nuttig in die voorkoming—en behandeling—van sekere soorte kanker. Om sulke eensydige inligting te publiseer, kan na my mening die neutrale standpunt van die Ontwaak! in gevaar stel.
A. B., Nederland
“Ontwaak!” antwoord: Soos hierdie leser meld, is daar wel studies wat toon dat die stowwe wat in ons nuusbrokkie gemeld is, kankerpasiënte in sommige gevalle gehelp het. Ons is jammer oor enige misverstand wat die publisering van hierdie brokkie dalk veroorsaak het. “Ontwaak!” neem ’n neutrale standpunt in wanneer dit by mediese behandeling kom. Die feit dat ons vir ons lesers inligting oor gesondheid verskaf, beteken nie dat ons dit ondersteun nie. Wanneer ons eweneens ’n publikasie of ’n deskundige op die een of ander gebied aanhaal, besef ons—soos dikwels die geval is—dat ander publikasies en ander deskundiges ’n ander beskouing kan huldig. Ons laat dit aan ons lesers oor om ingeligte besluite te maak wat hulle gesondheid betref.