Van ons lesers

Samewerking—noodsaaklik vir lewe (8 September 2005) Ek moet erken dat ek nie gedink het dat ek in dié onderwerp sou belangstel toe ek die voorblad van hierdie nommer vir die eerste keer gesien het nie. Maar ek het die hele reeks gelees en het dit baie geniet! Ek het dikwels opgehou lees sodat ek Jehovah kon dank vir die wonderlike wyse waarop hy dinge geskep het. Dit was merkwaardig om te sien hoe die diere saamwerk.

B. K., Verenigde State

Jongmense vra . . . Hoe kan ek dit vermy om met die verkeerde mense deurmekaar te raak? (22 Augustus 2005) Ek was aangetrokke tot ’n “verkeerde” persoon wat nooit regtig goed in Bybelwaarheid gewortel was nie. Die inligting het my gehelp om te verstaan watter gevaar dit inhou om met ’n geestelik swak persoon te assosieer. Dit is goed om te weet dat Jehovah vir ons omgee. Dankie vir die tydige hulp.

A.B.K., Zambië

Hierdie artikel het my gehelp om te besef dat ek ander vriende moet kies. Al was dit moeilik, versterk die artikel—wat ek byderhand hou—my voortdurend. Dankie vir die hulp en aanmoediging wat julle aan ons as jongmense gee.

L. R., Verenigde State

Die Bybel se beskouing—Moet jy tot die Maagd Maria bid? (8 September 2005) Ek bewonder Jehovah se Getuies omdat julle gedrag onberispelik is en julle tydskrifte my baie help. Maar hoe kan julle sê dat ons nie gunste van Maria moet vra nie? Sy is ’n middelaar tussen ons en die Vader, sodat ons vrede kan geniet.

E. R., Spanje

“Ontwaak!” antwoord: Soos die artikel verduidelik het, gee die Bybel ons nêrens toestemming om tot enigeen behalwe God te bid nie. Volgens die Katolieke priester en skrywer Andrew Greeley “verbind die Maria-simbool die Christendom regstreeks met die antieke godsdienste van moedergodinne”. Die verering van Maria het dus meer met die heidendom te doen as met die Christelike geloof. Dit is dalk ’n nuwe gedagte vir baie van ons lesers, en ons moedig hulle aan om die Bybel te ondersoek om uit te vind wat dit werklik leer. Baie van Jehovah se Getuies was voorheen Katolieke, maar nadat hulle God se Woord begin studeer het, het hulle geleer dat God nie wil hê dat ons deur enigiemand behalwe Jesus Christus, ons enigste middelaar, moet bid nie (Hebreërs 7:25). Vir meer inligting, sien die boek “Wat leer die Bybel werklik?”a Hoofstuk 15, met die titel “Aanbidding wat God se goedkeuring wegdra”, bespreek hoe belangrik dit is dat ons opvattings met die Heilige Skrif strook.

Verduur siekte met ’n sin vir humor (22 April 2005) My vrou het in Desember 2002 weens lewerversaking gesterf. Sy het omtrent agt maande lank gely. Maar sy het nogtans net oor positiewe dinge gepraat en ondervindinge vertel wat ’n mens laat lag het. Sy het tot die einde toe opgewek gebly. Nadat ek hierdie artikel gelees het, het ek verstaan waarom. Sy het ’n positiewe gesindheid net so nodig gehad as ons. Dit het haar sekerlik beter laat voel, net soos dit die geval met Conchi was. Dankie dat julle my gehelp het om te sien waarom my vrou so opgetree het.

D. H., Verenigde State

Van ons lesers Ek sien altyd uit na die rubriek “Van ons lesers”. Partykeer lees ek ’n brief wat iemand ingestuur het en dink: ‘Ek voel net so!’ Ander kere vra ek my: ‘Het ek daardie punt in die artikel gemis?’ Dan lees ek die artikel weer, en ek is dikwels beïndruk en voel aangemoedig wanneer ek dit doen.

M. T., Japan

[Voetnoot]