Wanneer siekte iets van die verlede is!
BAIE mense hoop dat hulle in ’n hemelse hiernamaals verligting sal vind van pyn en siekte. Maar in teenstelling met wat algemeen geglo word, is die hoop wat die Bybel in werklikheid vir die grootste deel van die mensdom bied, om op ’n aardse paradys te lewe (Psalm 37:11; 115:16). Hierdie beloofde toekoms sluit volmaakte gesondheid, geluk en die ewige lewe in.
Waarom word ons siek en sterf ons? En hoe sal ’n wêreld sonder siekte tot stand gebring word? Die Bybel beantwoord hierdie vrae.
◼ Die werklike oorsaak van siekte Adam en Eva, ons eerste menseouers, is geskep met volmaakte, gesonde liggame (Genesis 1:31; Deuteronomium 32:4). Hulle is ontwerp om vir ewig op die aarde te lewe. Dit was slegs toe hulle moedswillig teen God in opstand gekom het dat hulle liggame vatbaar vir siekte geword het (Genesis 3:17-19). Deur God se gesag te verwerp, het hulle hulle bande verbreek met die Skepper, die Bron van hulle volmaakte lewe. Hulle het onvolmaak geword. As gevolg daarvan het hulle siek geword en gesterf, net soos God hulle gewaarsku het.—Genesis 2:16, 17; 5:5.
Nadat Adam en Eva in opstand gekom het, kon hulle slegs onvolmaaktheid aan hulle kinders oordra (Romeine 5:12). Soos in die vorige artikel genoem is, besef wetenskaplikes vandag dat daar oorgeërfde defekte is wat bydra tot siekte en die dood. Ná uitvoerige navorsing het ’n groep wetenskaplikes onlangs tot hierdie slotsom gekom: “Dit is ’n onafwendbare biologiese werklikheid dat die liggaam uiteraard, sodra die enjin van die lewe aangeskakel word, die proses begin wat tot sy eie vernietiging sal lei.”
◼ Nie deur mensepogings nie Die wetenskap bereik wonderlike dinge in die stryd teen siekte. Maar die oorsaak van siekte is te kompleks vir die wetenskap om dit heeltemal uit die weg te ruim. Dít is nie verbasend vir Bybelstudente wat met God se geïnspireerde woorde vertroud is nie: “Moenie julle vertroue in edeles stel nie, ook nie in die mensekind, aan wie geen redding behoort nie.”—Psalm 146:3.
Maar die Bybel sê: “Die dinge wat onmoontlik is by mense, is moontlik by God” (Lukas 18:27). Jehovah God kan die oorsaak van siekte ongedaan maak. Hy sal al ons kwale genees (Psalm 103:3). Sy geïnspireerde Woord belowe: “Kyk! Die tent van God is by die mensdom, en hy sal by hulle woon, en hulle sal sy volke wees. En God self sal by hulle wees. En hy sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie. Die vorige dinge het verbygegaan.”—Openbaring 21:3, 4.
◼ Wat jy moet doen Jesus Christus het presies verduidelik wat ons moet doen om lewe in ’n toekomstige wêreld sonder siekte te geniet. Hy het gesê: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus.”—Johannes 17:3.
Die kennis van God en die leringe van sy Seun, Jesus, word in die Bybel gevind. Sulke kennis sluit praktiese raad in wat jou lewe nou al kan verbeter. Bowendien belowe God ’n wêreld sonder pyn vir sy gehoorsame aanbidders. Ja, God bied jou ’n toekoms waarin “geen inwoner sal sê: ‘Ek is siek’ nie”!—Jesaja 33:24.
[Venster/Prente op bladsy 11]
’n Gebalanseerde beskouing van gesondheid
Die Bybel bevorder respek vir lewe. Jehovah se Getuies toon hierdie respek deur na hulle gesondheid te probeer omsien. Hulle vermy skadelike gewoontes, soos dwelmmisbruik en die gebruik van tabak. God verwag dat sy aanbidders matig in hulle drink- en eetgewoontes moet wees (Spreuke 23:20; Titus 2:2, 3). Sulke praktiese stappe tesame met voldoende rus en oefening kan talle fisiese kwale teëwerk of voorkom. Diegene wat aan ’n siekte ly, het moontlik die hulp van betroubare gesondheidspesialiste nodig.
Die Bybel moedig ons aan om redelikheid en “gesonde verstand” aan die dag te lê (Titus 2:12; Filippense 4:5). Vandag is baie mense ongebalanseerd en raak hulle behep met hulle soeke na kure, selfs ten koste van hulle geestelikheid. Party wend hulle tot twyfelagtige terapieë wat hulle skade kan aandoen. Ander mors geld en tyd op behandelings en geneesmiddels wat ondoeltreffend of selfs skadelik is.
Die werklikheid is dat dit nog nie moontlik is om volmaakte gesondheid te geniet nie. Die wysheid en die redelike raad wat in die Bybel gevind word, kan jou help om gebalanseerd te bly in jou strewe na goeie gesondheid terwyl jy op die tyd in die toekoms wag wanneer daar nie meer siekte sal wees nie.