Goeie gesondheid vir almal—Binnekort!
“DIE idee om nooit weer siek te wees nie, . . . is tans baie gewild”, berig die Duitse nuustydskrif Focus. Maar die idee is nie nuut nie. Toe menselewe begin het, het die Skepper glad nie bedoel dat mense siek moet word nie. Sy voorneme met die mensdom was nie net “’n aanvaarbare vlak van gesondheid vir die hele wêreldbevolking” nie. (Ons kursiveer.) Ons Skepper wou hê dat almal volmaakte gesondheid moes geniet!
Waarom ly ons almal dus weens siekte? Die Bybel sê vir ons dat Jehovah God die ouers van die hele mensdom, Adam en Eva, volmaak geskep het. Toe hy sy skeppingswerke voltooi het, ‘het God alles gesien wat Hy gemaak het, en—dit was baie goed’. Dit was nooit ons liefdevolle Skepper se voorneme dat menselewe deur siekte en die dood geteister moet word nie. Maar toe Adam en Eva gekies het om af te wyk van die lewenswyse wat hulle veronderstel was om te lei, het hulle in sonde verval. Die gevolg van Adamitiese sonde was die dood, wat aan alle mense oorgedra is.—Genesis 1:31; Romeine 5:12.
Jehovah het nie die mensdom eenvoudig verwerp nie. Hy het ook nie afgesien van sy oorspronklike voorneme met hulle en die aarde nie. Regdeur die Bybel maak hy sy voorneme bekend om gehoorsame mense in hulle oorspronklike toestand van goeie gesondheid te herstel. Toe Jesus Christus, die Seun van God, op die aarde was, het hy getoon dat God die krag het om siektes te genees. Jesus het byvoorbeeld blindheid, melaatsheid, doofheid, watersug, epilepsie en verlamming genees.—Matteus 4:23, 24; Lukas 5:12, 13; 7:22; 14:1-4; Johannes 9:1-7.
God gaan binnekort sy Messiaanse Koning, Jesus Christus, opdrag gee om beheer oor die aangeleenthede van die mensewêreld oor te neem. Onder sy bewind sal die profesie van Jesaja vervul word: “Geen inwoner sal sê: Ek is siek nie; aan die mense wat daarin woon, is die skuld vergewe” (Jesaja 33:24). Hoe sal dit gebeur?
Let op dat die profeet skryf van mense wie se ‘skuld vergewe is’. Gevolglik sal die oorspronklike oorsaak van siekte—die mensdom se oorgeërfde sonde—weggeneem word. Hoe? Die waarde van Jesus se losprysofferande sal ten behoewe van die gehoorsame mensdom aangewend word, en sodoende sal die oorsaak van siekte en die dood verwyder word. Paradysagtige toestande sal regoor die aarde heers. Die Christenapostel Johannes het geskryf: “[God] sal elke traan van hulle oë afvee, en die dood sal daar nie meer wees nie, en ook verdriet en geskreeu en pyn sal daar nie meer wees nie. Die vorige dinge het verbygegaan.” Dit gaan binnekort gebeur!—Openbaring 21:3, 4; Matteus, hoofstuk 24; 2 Timoteus 3:1-5.
Behou ’n gebalanseerde beskouing
Intussen is siekte die lot van miljoene mense. Daarom is dit net natuurlik dat mense besorg sal wees oor hulle gesondheid en die gesondheid van hulle geliefdes.
Hedendaagse Christene het groot waardering vir die werk van die mediese beroep. Hulle tref redelike voorsorgmaatreëls om gesond te word of te bly. Die Bybel se belofte van ’n toekoms sonder siekte help ons egter om ’n gebalanseerde beskouing in hierdie verband te behou. Totdat die Messiaanse Koning beheer oor die mensdom se aangeleenthede oorneem, is volmaakte gesondheid eenvoudig onmoontlik. Soos ons gesien het, kon selfs die ongelooflikste ontdekkings nie die geneeskunde in staat stel om die sappigste appel bo in die boom—goeie gesondheid vir almal—by te kom nie.
Die doelwit van “’n aanvaarbare vlak van gesondheid vir die hele wêreldbevolking” sal binnekort bereik word. Maar nie deur die VN of die Wêreldgesondheidsorganisasie of omgewingsbeplanners of maatskaplike hervormers of geneeshere nie. Jesus Christus sal dit ’n werklikheid maak. Wat ’n vreugde sal dit tog wees wanneer die mensdom uiteindelik “van die slawerny van die verderflikheid vrygemaak sal word en die glorieryke vryheid van die kinders van God sal hê”!—Romeine 8:21.
[Prente op bladsy 10]
Almal sal goeie gesondheid in God se nuwe wêreld geniet