Volmaakte gesondheid vir almal

SOOS gedrag, die omgewing en gesondheidsorg, beïnvloed ons biologiese samestelling ook ons gesondheid. Daardie samestelling word beïnvloed deur oorerwing en deur siektes wat ons later kan opdoen omdat daar ’n genetiese verband is.

“Die biologiese verpakking waarin jy in die wêreld aankom”, sê een gesondheidsdeskundige, “bepaal oor die algemeen of jy goed gaan lewe, lank gaan lewe of enigsins gaan lewe.”

Hoe ons hulle ook al gekry het, hoofpyne, stywe spiere, uitgeputte senuwees, bros bene, swak harte en ander kwale herinner ons daagliks daaraan dat ons gesondheid deur ’n verswakte liggaam en verstand benadeel word. Wat is die grondoorsaak van hierdie gesondheidsprobleme wat so algemeen voorkom?

Die grondoorsaak

’n Dokter met die naam Lukas wat in die eerste eeu G.J. geleef het, beantwoord hierdie vraag in ’n geïnspireerde biografie wat hy oor Jesus Christus geskryf het. Eendag, skryf Lukas, is ’n verlamde man na Jesus gebring in die hoop dat hy genees sal word. Jesus het vir die verlamde gesê: “Jou sondes is jou vergewe.” Toe, om te toon dat hy wel die mag het om sondes te vergewe, het Jesus die man beveel: “Staan op en tel jou bedjie op en gaan huis toe.” Die man het! Gevolglik “het ekstase almal”, wat die genesing aanskou het, “sonder uitsondering aangegryp, en hulle het God begin verheerlik”.—Lukas 5:17-26.

Na watter sonde het Jesus verwys? Die antwoord help ons om te verstaan waarom ons siek word, oud word en sterf. Omdat ons die versekering het dat ‘die hele Skrif deur God geïnspireer is’, kan ons na die Bybel gaan om daardie antwoord te kry (2 Timoteus 3:16; 2 Petrus 1:21). Dit sê vir ons dat die eerste man, Adam, met volmaakte gesondheid geskep is. Hy het blakende gesondheid geniet solank hy aan sy Skepper gehoorsaam was.

Adam het egter verkies om God se wet te verbreek. Deur ongehoorsaam te wees en opsetlik teen sy Skepper in opstand te kom, het hy gesondig. Gevolglik het hy onvolmaak geword, vir siektes kwesbaar geword en het hy mettertyd gesterf. Sonde was derhalwe die oorsaak van Adam se siekte en dood.

Net soos party siektes van ouers na kinders oorgedra word weens die werking van die wette van die genetika, is onvolmaaktheid en die gevolglike siektes van Adam na sy nageslag, die mensdom, oorgedra. Alle siektes is dus die gevolg van Adam se oorspronklike sonde (Genesis 2:17; 3:1-19; Romeine 5:12). Is daar ’n uitweg?

Die uitweg

Die verandering van volmaakte gesondheid na swak gesondheid is veroorsaak deur sonde—Adam se opstand teen God se wet. Die verandering van swak gesondheid na volmaakte gesondheid is net moontlik deur die verwydering van sonde (Romeine 5:18, 19). Hoe? ’n Volmaakte mens, die presiese eweknie van Adam toe hy volmaak was, sou sy lewe as ’n losprys moes offer. God se wet sê “lewe vir lewe”.—Deuteronomium 19:21.

Maar nie een van Adam se sondige nakomelinge kon so ’n losprys voorsien nie. Daarom het Jehovah uit liefde sy Seun, Jesus, as ’n volmaakte mens voorsien om sy lewe te gee as “’n losprys in ruil vir baie” sodat “ons deur hom die lewe kan verkry”.—Matteus 20:28; 1 Johannes 4:9; Psalm 49:8.

Terwyl Jesus op die aarde was, het hy getoon dat sy Vader, Jehovah, hom die mag gegee het om sondes weg te neem toe hy vir die verlamde gesê het: “Jou sondes is jou vergewe”, en die geneesde man huis toe geloop het. Jesus het keer op keer hierdie mag van God af gebruik om die blindes, die dowes en baie ander met verskillende siektes oombliklik te genees.

Aangaande hierdie wonderdadige genesings wat Jesus verrig het, sê die Bybel: “Toe het ’n groot skare na hom toe gekom wat kreupeles, verminktes, blindes, stommes en baie ander by hulle gehad het, en hulle het hulle as ’t ware voor sy voete gegooi, en hy het hulle genees; sodat die skare verbaas was toe hulle sien dat die stommes praat en die kreupeles loop en die blindes sien” (Matteus 15:30, 31). Selfs merkwaardiger nog, Jesus kon dooie mense lewend maak. Die Bybel praat van ’n hele paar van hierdie opstandings.—Lukas 7:11-16; 8:49-56; Johannes 11:14, 38-44.

Hierdie wonderdadige genesings verseker ons dat Jesus die mag het om alle siektes te genees. Sal hy hierdie godgegewe mag weer gebruik? Kan ons daarby baat vind?

Volmaakte gesondheid ’n werklikheid

Bybelprofesieë toon dat Jesus reeds in die hemel as die Koning van God se hemelse regering heers. God het hom die mag gegee om alle menslike regerings wat nou bestaan te vernietig en om oor die hele aarde te heers (Psalm 110:1, 2; Daniël 2:44). Die gebed wat Jesus sy volgelinge geleer het, sal dan vervul wees: “Laat u koninkryk kom. Laat u wil geskied, soos in die hemel, so ook op die aarde” (Matteus 6:10). Onder die heerskappy van daardie hemelse Koninkryk sal ’n deel van God se wil vir hierdie aarde wees om gesondheidstoestande vir die mensdom dramaties te verbeter.

Dan, in ’n letterlike sowel as in ’n geestelike sin, “sal die oë van die blindes geopen en die ore van die dowes ontsluit word. Dan sal die lamme spring soos ’n takbok, en die tong van die stomme sal jubel.” “En geen inwoners sal sê: Ek is siek nie.”—Jesaja 33:24; 35:5, 6.

Onder God se hemelse Koninkryk sal volmaakte gesondheid beteken dat mense nie hoef te sterf soos ons nou sterf nie. God se Woord beloof: ‘Elkeen wat geloof in hom beoefen, sal die ewige lewe kan hê.’ “Die gawe wat God gee, is die ewige lewe deur Christus Jesus, ons Here” (Johannes 3:16; Romeine 6:23). Ja, die geïnspireerde psalm het lank gelede beloof: “Die regverdiges sal die aarde besit en vir ewig daarop woon” (Psalm 37:29). Jesus sal dan die dooies opwek, soos hy gedoen het toe hy op die aarde was, en aan hulle die geleentheid gee om volmaakte gesondheid te geniet. Die Bybel beloof: ‘Daar gaan ’n opstanding van die regverdiges sowel as die onregverdiges wees.’—Handelinge 24:15.

Die aarde self sal onder Koninkryksheerskappy floreer sodat honger, wat tot slegte gesondheid bydra, nooit weer sal bestaan nie. Bybelprofesieë sê vir ons: “Die bome van die veld sal hulle vrugte gee, en die land sal sy opbrings gee, en hulle sal veilig wees in hul land” (Esegiël 34:27). “Die aarde het sy opbrings gelewer; God, onse God, sal ons seën” (Psalm 67:7). “Daar sal ’n oorvloed koring op die aarde wees” (Psalm 72:16, NW). “Die woestyn en die dor land sal bly wees, en die wildernis sal juig en bloei soos ’n narsing.”—Jesaja 35:1.

Die profetiese laaste boek van die Bybel som die situasie op wat in God se nuwe wêreld sal bestaan en sê: “[God] sal elke traan van hulle oë afvee, en die dood sal daar nie meer wees nie, en ook verdriet en geskreeu en pyn sal daar nie meer wees nie.”—Openbaring 21:4.

Sê jy dalk: ‘Dis moeilik om te glo’? Dink dan hieraan. Voordat Adam ’n sondaar geword het, het hy volmaakte gesondheid gehad. Stel jou voor dat dit vir iemand moontlik was om op daardie tydstip met hom te praat en vir hom te sê dat die aarde eendag gevul sou word met mense wat pyn verduur, sieklik is en oud word. Dink jy nie dat Adam dit moeilik sou vind om te glo nie? Tog is dit nou die werklikheid.

Aan die ander kant sal volmaakte gesondheid onder God se Koninkryk ’n werklikheid word. Jehovah se Woord verseker ons: “Hierdie woorde is betroubaar en waaragtig” (Openbaring 21:5). Wat God sê gaan gebeur, sal gebeur, want ‘dit is vir God onmoontlik om te lieg’.—Hebreërs 6:18.

Wat kan jy nou doen om te verseker dat jy hierdie komende seëninge sal geniet? Die weg na volmaakte gesondheid en ewige lewe is duidelik gemaak deur wat Jesus in gebed tot sy Vader gesê het: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus.”—Johannes 17:3.

Vra Jehovah se Getuies om ’n gratis Bybelkurses in jou huis. Hulle sal jou graag wil help om meer oor die wonderlike beloftes van God te leer. Dit sal jou eerste tree op die weg na volmaakte gesondheid wees!

[Prent op bladsy 14]

In God se nuwe wêreld sal alle mense volmaakte gesondheid geniet