Die Bybel se beskouing

Het die Christelike godsdiens gefaal?

OMTRENT ’n derde van die aarde se bevolking sê dat hulle Christene is. Tog lyk dit asof die wêreld polities meer verdeeld en gewelddadiger is as ooit tevore. Beteken dit dat die Christelike godsdiens soos Jesus dit aan ander geleer het, op die een of ander manier te kort skiet? Of lê die fout eerder by die manier waarop baie mense Christus se leringe toepas?

Hierdie artikel sal bespreek wat Christus in werklikheid aan ander geleer het, en die voorbeeld ondersoek wat hy vir sy volgelinge gestel het. Dit sal ook ’n algemene beskouing onder verklaarde Christene bespreek wat eintlik strydig is met die ware betekenis van die Christelike godsdiens.

’n Verdraaide vorm van die Christelike godsdiens

Honderde jare ná Christus se dood is ’n verdraaide vorm van die Christelike godsdiens ’n prominente plek in die Romeinse Ryk gegee. Lede van hierdie groep verklaarde Christene het gou gevind dat hulle nie meer onwelkome buitestanders was nie, maar die middelpunt van die politieke en maatskaplike hoofstroom van die Romeinse samelewing. Kerkleiers, soos Augustinus, het op hierdie verandering gereageer deur te leer dat die verwagte Koninkryk van God op daardie stadium gekom het. Hierdie leiers het geleer dat hulle nuutgevonde politieke en godsdienstige invloed die middel was waardeur God se wil op die aarde verwesenlik sou word. Die waarde van mensepogings om aardse aangeleenthede te rig, is dus beklemtoon.

Gevolglik het baie begin glo dat ’n Christen ’n rol moet speel in die politieke struktuur van die samelewing. Om dit te doen, glo die meeste mense, moet ’n Christen by tye sekere aspekte van sy geloof ondergeskik maak aan die wil van die gemeenskap waarin hy woon. Byvoorbeeld, baie mense bewys lippediens aan Christus se leringe van liefde en vrede, terwyl hulle terselfdertyd wrede oorloë ondersteun. Om dieselfde rede sal kerke moontlik hulle volgelinge aanmoedig om vir die Koninkryk van God te bid maar terselfdertyd hulle ondersteuning gee aan heersers wat onderdrukkend optree.

Hierdie valse vorm van die Christelike godsdiens is nie die godsdiens wat Jesus begin het nie. Dit is eerder ’n mensgemaakte weergawe daarvan en word vandag deur die meeste verklaarde Christene beoefen. Hierdie weergawe van die Christelike godsdiens het inderdaad gefaal, soos gesien kan word in die wydverspreide minagting vir Bybelbeginsels wat vandag deur die hele Christendom bestaan.

Wat het Christus in werklikheid geleer?

Party sal dalk verbaas wees om te hoor dat Jesus in werklikheid gesê het dat sy volgelinge ‘geen deel van die wêreld moet wees nie, net soos hy geen deel van die wêreld was nie’ (Johannes 17:15, 16). Waarom sou Christus sy dissipels aanmoedig om so ’n standpunt in te neem? Jesus se geliefde dissipel, die apostel Johannes, het ’n antwoord voorsien. Hy het geskryf: “Die hele wêreld lê in die mag van die bose.”—1 Johannes 5:19.

Gevolglik rig Christus se leringe mense na die hemelse Koninkryk van God en nie na menslike entiteite nie, as die middel waardeur ’n regverdige wêreld hier op die aarde geskep sal word (Matteus 6:10). Jesus self het nie in die minste getoon dat hy daarin belanggestel het om met die maatskaplike orde van sy dag in te meng nie. Hy het duidelik te kenne gegee dat hy nie ’n politieke amp wou beklee nie (Johannes 6:15). Hy het geweld ook verwerp as ’n manier om geskille op te los (Matteus 26:50-53; Johannes 18:36). Jesus het geen grondwet of versameling burgerlike wette nagelaat nie. Hy het geen politieke standpunt in verband met die geskille van sy dag ingeneem nie. Hy het byvoorbeeld nie ’n aktivis vir slaweregte geword of betrokke geraak by die Joodse volk se stryd teen Rome nie.

Maar dit beteken nie dat Jesus onverskillig gestaan het teenoor mense en hulle probleme nie. Jesus het ander baie geleer omtrent ’n mens se verantwoordelikheid teenoor jou medemens. Hy het mense aangemoedig om eerlik te wees wanneer hulle hulle belasting betaal en beklemtoon dat hulle onderdanig moet wees aan mense in regmatige gesagsposisies (Matteus 22:17-21). Hy het ander geleer hoe om daadwerklike belangstelling te toon in die welsyn van behoeftiges. Hy het ook geleer hoe om die waardigheid van ander te respekteer, hoe om medelye te hê en hoe om vergewensgesind en barmhartig te wees (Matteus, hoofstukke 5-7). Dit is ’n welbekende feit dat liefde vir God en vir naaste die middelpunt van Christus se leringe is.—Markus 12:30, 31.

Die ware Christelike godsdiens vandag

Hoe sal ’n ware volgeling van Christus hom dan gedra? Hy sal doen wat Jesus gedoen het. Hy sal die wette van die land getrou gehoorsaam terwyl hy streng neutraal bly ten opsigte van politieke aangeleenthede (Johannes 12:47, 48). Selfs wanneer hy onder groot druk verkeer, sal hy Christelike beginsels nie prysgee nie (1 Petrus 2:21-23). Maar hy kan ook nie net ’n onverskillige waarnemer wees nie. ’n Ware Christen sal daadwerklike belangstelling toon in die welsyn van dié om hom, soos Jesus gedoen het (Markus 6:34). Hy sal ook sy bes doen om ander te help om gelukkiger lewens te lei deur hulle te help om Christus se leringe te verstaan en daarvolgens te lewe.—Johannes 13:17.

In ooreenstemming hiermee streef Jehovah se Getuies vandag daarna om Christus na te volg in hulle verhouding met die wêreld om hulle. Hoewel hulle vreedsame, wetsgehoorsame burgers is, is hulle geen deel van die wêreld nie. Soos Jesus, weier hulle om ’n deel te hê aan die geweld en politieke onenigheid wat vandag so algemeen is. Hulle hoop is stewig gevestig op die Koninkryk van God as die oplossing vir die probleme waarmee die wêreld te kampe het. Die ware Christelike godsdiens bring ’n gelukkiger lewe mee, sowel as harmonie onder sy lede (Johannes 13:34, 35). Dit het beslis nie gefaal nie.

HET JY AL GEWONDER?

◼ Moet Christene by die politiek betrokke raak?—Johannes 6:15.

◼ Het Christus geweld aanbeveel as ’n manier om geskille op te los?—Matteus 26:50-53.

◼ Wat is die identifiserende kenmerk van ware Christene?—Johannes 13:34, 35.

[Foto-erkenning op bladsy 18]

EL COMERCIO, Quito, Ecuador