Die Bybel se beskouing

Wat beteken dit om ’n Christen te wees?

“IN MY land is ’n Christen iemand wat een keer per week kerk toe gaan”, sê Kingsley, wat in ’n Afrikaland woon. Raad, van die Midde-Ooste, verduidelik: “In ons gemeenskap word Christene beskou as ’n groep wat Westerse gebruike en tradisies volg wat hulle kleredrag, vierings en behandeling van vroue betref.”

Maar beteken dit dat ’n mens ’n Christen is bloot omdat jy een keer elke week ’n kerkdiens bywoon en sekere sosiale gebruike en tradisies volg? Moet die woord “Christen” nie logieserwys na ’n lewenswyse verwys wat die gesindhede, waardes en gedrag weerspieël wat Christus verkondig het en waarvan hy as voorbeeld gedien het nie?a Hoe is die Christelike godsdiens aanvanklik beoefen?

Die vroeë Christelike godsdiens—’n lewensweg

Jesus het vir sy volgelinge gesê: “Julle is my vriende as julle doen wat ek julle beveel” (Johannes 15:14). Aangesien Jesus se leringe alle aspekte van hulle lewe geraak het, het Christus se dissipels aanvanklik na hulle godsdiens verwys as “Die Weg” (Handelinge 9:2). Kort daarna is “[hulle] deur goddelike voorsienigheid Christene genoem” (Handelinge 11:26). Hierdie nuwe naam wat hulle gedra het, het beteken dat hulle geglo het dat Jesus die Seun van God is wat die wil van sy hemelse Vader aan die mensdom oorgedra het. Dit was weens hierdie oortuiging dat hulle ’n lewensweg gevolg het wat anders was as dié van die wêreld om hulle.

Christus se leringe het sy volgelinge beweeg om Bybelleringe te volg, wat beteken het dat hulle dinge moes vermy soos “hoerery, onreinheid, losbandige gedrag, afgodediens, die beoefening van spiritisme, vyandskappe, twis, jaloesie, vlae van toorn, rusies, verdeeldhede, . . . dronkenskap, swelgerye en soortgelyke dinge” (Galasiërs 5:19-21; Efesiërs 4:17-24). Die apostel Paulus het Christene in Korinte daaraan herinner dat party van hulle eens op ’n tyd juis hierdie dinge beoefen het. Toe het hy bygevoeg: “Maar julle is skoon gewas, maar julle is geheilig, maar julle is regverdig verklaar in die naam van ons Here Jesus Christus.”—1 Korintiërs 6:9-11.

E. W. Barnes sê in sy boek The Rise of Christianity: “In die vroeë gesaghebbende dokumente van die Christelike beweging word dit in wese uitgebeeld as sedelik en wetsgehoorsaam. Die lede daarvan wou goeie burgers en lojale onderdane wees. Hulle het die tekortkominge en verdorwenhede van die heidendom vermy. In hulle private lewe het hulle daarna gestrewe om vredeliewende bure en betroubare vriende te wees. Hulle is geleer om ernstig en beskeie, vlytig en rein te wees. Te midde van die heersende korrupsie en bandeloosheid was hulle, indien hulle lojaal gebly het aan hulle beginsels, eerlik en waarheidliewend. Hulle het hoë standaarde op seksuele gebied gehad: die huweliksband is gerespekteer en die gesinslewe was rein.” Dít is onder andere wat dit beteken het om een van die vroeë Christene te wees.

Nog ’n kenmerk van die vroeë Christelike godsdiens was ywerige evangelisasiewerk. Christus het sy volgelinge beveel: “Gaan dus en maak dissipels van mense van al die nasies” (Matteus 28:19, 20). Jean Bernardi, ’n professor aan die Sorbonne-universiteit in Parys, Frankryk, het gesê: “[Christene] moes uitgaan en oral en met almal praat. Op die hoofweë en in die stede, op die openbare pleine en in die huise. Of hulle nou welkom was of nie. Met die armes sowel as met die rykes wie se besittings vir hulle ’n hindernis was. . . . Hulle moes na die eindes van die aarde gaan, hetsy oor land of see.”

Die ware Christelike godsdiens vandag

Vandag moet ware Christene aan hulle kenmerkende lewenswyse uitgeken kan word, net soos dit die geval was in die eerste eeu. Gevolglik streef Jehovah se Getuies daarna om streng te hou by die voorskrifte van die vroeë Christene. Hulle pogings om hulle lewe volgens die leringe van die Bybel te rig, word deur ander opgemerk.

Die New Catholic Encyclopedia erken byvoorbeeld dat Jehovah se Getuies bekend is as “een van die groepe met die beste gedrag in die wêreld”. Die Deseret News van Salt Lake City, Utah, het gesê dat Jehovah se Getuies “sterk gesinsbande bevorder en mense help om produktiewe en eerlike burgers te word”. Die koerant het bygevoeg: “Lede volg ’n streng sedewet. Hulle glo dat rook, oormatige drinkery, dwelmmisbruik, dobbelary, seksuele promiskuïteit en homoseksualiteit gebruike is wat hulle geestelikheid skaad. Hulle is voorstanders van eerlikheid en goeie werksgewoontes.”

Die Getuies neem ook hulle verantwoordelikheid ernstig op om ywerige evangeliedienaars te wees. Die New Catholic Encyclopedia sê hieroor: “Die basiese verpligting van elke lid . . . is om van Jehovah te getuig deur Sy naderende Koninkryk bekend te maak. . . . Om ’n ware Getuie te wees, moet ’n mens op die een of ander manier doeltreffend getuig.”

Ja, om ’n ware Christen te wees, behels baie meer as om net ’n lid van een van die talle godsdienste van die Christendom te wees. Jesus self het die opkoms van valse Christene voorspel (Matteus 7:22, 23). Jehovah se Getuies nooi jou om uit te vind wat Jesus mense geleer het en dit toe te pas. Dít is wat dit beteken om ’n Christen te wees. Jesus het gesê: “As julle hierdie dinge weet, gelukkig is julle as julle dit doen.”—Johannes 13:17.

[Voetnoot]

HET JY AL GEWONDER?

◼ Wie het Jesus sy vriende genoem?—Johannes 15:14.

◼ Watter soort gedrag moet ware Christene vermy?—Galasiërs 5:19-21.

◼ Aan watter werk moet Christene deelneem?—Matteus 28:19, 20.

[Prente op bladsy 26]

Ware Christene is ywerige evangeliedienaars, net soos dit eeue gelede die geval was