Maak die najaging van geld jou siek?

WAT sal jy doen as jy môre skatryk word? Sal jy ontspan en die lewe geniet? Sal jy ophou werk en meer tyd saam met jou familie en vriende deurbring? Sal jy ’n loopbaan begin wat jy werklik geniet? Interessant genoeg, baie mense wat wel ryk word, doen nie een van hierdie dinge nie. Hulle wy eerder die res van hulle lewe daaraan om nog geld te maak—hetsy om hulle nuwe skuld af te betaal of bloot om ryker te word.

Maar party wat hierdie weg gevolg het, sien watter skadelike uitwerking materialisme op hulle gesondheid, hulle gesinslewe en die sedelike karakter van hulle kinders gehad het. Onlangs het boeke, artikels, televisieprogramme en video’s gewaarsku teen oordadigheid en eerder “vrywillige vereenvoudiging” aanbeveel. ’n Aantal bronne meld dat dit ’n mens se gesondheid—verstandelik, emosioneel en selfs fisies—kan aantas as jy behep raak met materialistiese strewes.

Natuurlik is besorgdheid oor die gevare van materialisme niks nuuts nie. Byna 2 000 jaar gelede het die Bybel gesê: “Dié wat . . . vasbeslote is om ryk te wees, val in versoeking en ’n strik en talle sinnelose en skadelike begeertes, wat mense in vernietiging en verderf stort. Want die liefde vir geld is ’n wortel van allerhande skadelike dinge, en deur hierdie liefde na te streef, is party van die geloof af op ’n dwaalspoor gebring en het hulle hulleself oral met baie pyne deurboor.”—1 Timoteus 6:9, 10.

Maar is dit waar? Ondervind diegene wat vir geld en materiële besittings lewe, werklik probleme as gevolg daarvan? Of het hulle alles—rykdom, gesondheid en gelukkige gesinne? Kom ons kyk.