Jongmense vra . . .
Waarom word ek altyd uitgesluit?
“Oor die naweek lyk dit asof die hele wêreld besig is om pret te hê, behalwe ek.”—Renee.
“Jongmense hang almal saam uit terwyl ek hoog en droog sit en niks doen nie!”—Jeremy.
DIS ’n heerlike dag, en jy het niks beplan nie. Maar al die ander jongmense het. Al jou vriende is besig om pret te hê. En jy is alweer uitgesluit!
Dis al erg genoeg dat jy nie genooi word nie, maar wat dit impliseer, kan selfs erger wees. ‘Dalk is daar iets fout met my’, dink jy. ‘Waarom stel niemand in my geselskap belang nie?’
Waarom dit seermaak
Dit is normaal om by ’n groep te wil inpas en om deur hulle aanvaar te wil word. Trouens, omdat ons sosiale wesens is, floreer ons op interaksie met ander. Voordat Jehovah Eva geskep het, het hy van Adam gesê: “Dit is nie goed dat die mens alleen bly nie” (Genesis 2:18). Dit is duidelik dat mense ander mense nodig het; dit is hoe ons geskep is. En dit is juis waarom dit so seermaak wanneer ons uitgesluit word.
Dit kan veral teleurstellend wees wanneer jy keer op keer uitgesluit word of as ander jou laat voel dat jy net nie aan die standaarde kan voldoen van diegene wat jy wil bevriend nie. “Daar is klieke jongmense wat baie doen”, sê ’n jong vrou met die naam Marie, “maar ’n mens kan sien hulle dink dat jy nie goed genoeg is om in hulle geselskap te wees nie.” Wanneer ander jou nie in hulle groep insluit nie, voel jy uitgesluit en eensaam.
Soms kan jy selfs in ’n groep afgesonder voel. “Ek weet dit klink vreemd”, sê Nicole, “maar ek onthou hoe vreeslik eensaam ek by ’n geselligheid gevoel het. Ek dink dit was omdat ek tussen baie mense was, maar nie juis na aan enigeen van hulle gevoel het nie.” Party voel selfs by Christelike byeenkomste eensaam. “Dit lyk asof almal mekaar ken, maar niemand ken my nie!” sê Meagan. ’n Jong vrou genaamd Maria voel ook so. Sy sê: “Dis asof ek omring is deur vriende maar geen vriende het nie.”
Almal voel soms eensaam—selfs diegene wat skynbaar gewild of gelukkig is. “Selfs onder gelag kan die hart pyn ly”, sê ’n Bybelspreuk (Spreuke 14:13). Wanneer eensaamheid intens en langdurig is, kan dit ’n mens mismoedig maak. Die Bybel sê: “Weens die pyn van die hart is daar ’n verslae gees.” ’n Ander vertaling stel dit so: “Hartseer kan ’n mens verpletter” (Spreuke 15:13; Contemporary English Version). Wat kan jy doen as jy al verpletter gevoel het omdat jy uitgesluit is?
Verdryf eensaamheid
Jy kan gerus die volgende dinge doen om gevoelens van eensaamheid te verdryf:
◼ Fokus op jou sterk punte (2 Korintiërs 11:6). Vra jou af: ‘Wat is my sterk punte?’ Dink aan party van jou talente of positiewe eienskappe, en skryf dit hieronder neer.
․․․․․
Wanneer jy uitgesluit voel, kan jy aan jou sterk punte dink—soos dié wat jy hierbo neergeskryf het. Ja, jy het swakhede en jy moet daaraan werk. Nogtans moet jy probeer om nie deur jou foute oorweldig te word nie. Beskou jouself eerder as ’n onvoltooide projek. Alles is dalk nog nie soos dit moet wees nie, maar party dinge is wel. Fokus hierop!
◼ Word verruim (2 Korintiërs 6:11-13). Neem die inisiatief om mense te ontmoet. Toegegee, dit kan ’n uitdaging wees. “Groepe kan baie intimiderend lyk”, sê die 19-jarige Liz, “maar as jy net een persoon nader en ‘Hallo’ sê, word jy skielik deel van die groep.” (Sien die venster “Wenke om ’n gesprek te voer”.) Maak ook seker dat jy niemand—soos bejaardes—uitsluit nie. “Toe ek 10 of 11 was”, sê ’n tiener met die naam Cori, “het ek ’n vriend gehad wat baie ouer as ek was. Ten spyte van die ouderdomsverskil was ons baie na aan mekaar.”
Dink aan twee volwassenes in jou gemeente wat jy graag beter wil leer ken.
․․․․․
Gaan gesels gerus by die volgende gemeentelike vergadering met een van die mense wie se naam jy hierbo neergeskryf het. Knoop ’n gesprek met hom aan. Vra daardie persoon hoe hy in die Bybel begin belangstel het. Hoe meer vriende jy probeer maak in “die hele gemeenskap van broers”, hoe minder waarskynlik is dit dat jy uitgesluit of eensaam sal voel.—1 Petrus 2:17.
◼ Neem ’n volwassene in jou vertroue (Spreuke 17:17). As jy met jou ouers of ’n ander volwassene praat oor die dinge wat jou kwel, kan dit jou help om minder eensaam te voel. Dis wat een 16-jarige meisie uitgevind het. Aanvanklik was sy te bekommerd daaroor dat sy uitgesluit sou word. “Ek het gewoonlik gesit en tob oor wat gebeur het wat my uitgesluit laat voel het”, sê sy, “en het dit oor en oor in my gedagtes teruggespeel. Maar dan het ek met my ma daaroor gepraat, en sy het my altyd raad gegee oor hoe om die situasie te hanteer. Dit help regtig wanneer ’n mens oor dinge praat!”
Wie kan jy nader as jy ooit met iemand moet praat oor aanhoudende gevoelens van eensaamheid?
․․․․․
◼ Dink aan ander (1 Korintiërs 10:24). Die Bybel sê dat ons “nie uit persoonlike belangstelling ’n oog op net [ons] eie sake [moet] hou nie, maar ook uit persoonlike belangstelling op dié van die ander” (Filippense 2:4). Wanneer jy uitgesluit voel, is dit weliswaar maklik om terneergedruk of hartseer te wees. Maar in plaas daarvan om nog mismoediger te raak, kan jy gerus iets doen vir iemand wat hulp nodig het. Jy sal dalk selfs nuwe vriendskappe op dié manier aanknoop!
Dink aan iemand, miskien in jou gesin of gemeente, wat dalk jou geselskap sal verwelkom of wat jy op die een of ander manier kan help. Skryf daardie persoon se naam hieronder neer, en beskryf hoe jy hom of haar kan help.
․․․․․
Wanneer jy aan ander dink en dinge vir hulle doen, het jy minder tyd om eensaam te voel. Dit kan jou ’n positiewer uitkyk en houding gee, wat jou aantrekliker sal maak as ’n potensiële vriend. Spreuke 11:25 sê: “Wie ander ryklik verkwik, sal ook ryklik verkwik word.”
◼ Wees selektief (Spreuke 13:20). Dit is beter om ’n paar ware vriende te hê wat vir jou omgee, as baie sogenaamde vriende wat jou dalk in die moeilikheid sal laat beland (1 Korintiërs 15:33). Dink aan die voorbeeld van jong Samuel wat in die Bybel genoem word. Hy was heel moontlik eensaam by die tabernakel. Hy het onder andere saam met Hofni en Pinehas gewerk, wat weens hulle bose dade slegte omgang sou gewees het—al was hulle die hoëpriester se seuns. As Samuel by hulle probeer inpas het, sou dit vir hom geestelike rampspoed tot gevolg gehad het. Maar dit is beslis nie wat Samuel wou hê nie! Die Bybel sê: “Die hele tyd het die seun Samuel groter en meer geliefd geword vanuit Jehovah se standpunt sowel as vanuit dié van mense” (1 Samuel 2:26). Watter mense? Beslis nie Hofni en Pinehas nie, wat moontlik selfs vir Samuel weens sy goeie gedrag verstoot het. Samuel se prysenswaardige eienskappe het hom eerder geliefd gemaak by diegene wat God se standaarde gehandhaaf het. Mense wat Jehovah liefhet, is die soort vriende wat jy nodig het!
◼ Wees positief (Spreuke 15:15). Almal voel nou en dan—ten minste tot ’n mate—uitgesluit. Wat kan jou help? Moenie oor negatiewe dinge tob nie, maar probeer eerder om ’n positiewe lewensuitkyk aan te kweek. Onthou, hoewel jy dalk nie beheer het oor elke aspek van jou situasie in die lewe nie, het jy wel beheer oor hoe jy op dinge reageer.
Wanneer jy uitgesluit voel, moet jy positiewe dinge doen om die situasie of ten minste jou beskouing daarvan te verander. Onthou altyd dat Jehovah weet hoe ons gemaak is, en dus weet hy wat ons behoeftes is en wat die beste manier is om daarin te voorsien. Bid tot Jehovah as jy aanhoudende gevoelens van eensaamheid het. Wees daarvan verseker dat ‘hy jou sal onderskraag’.—Psalm 55:22.
Nog artikels uit die reeks “Jongmense vra . . . ” kan gevind word op die webwerf www.watchtower.org/ype
IETS OM OOR TE DINK
◼ Watter positiewe dinge kan ek doen as ek uitgesluit voel?
◼ Watter tekste sal my help om ’n gebalanseerde beskouing van myself te hê en nie oorweldig te word deur negatiewe gedagtes nie?
[Venster/Prent op bladsy 12]
Wenke om ’n gesprek te voer
◼ Glimlag. Jou hartlikheid sal ander aanmoedig om met jou te gesels.
◼ Stel jou aan ander voor. Sê wat jou naam is en waarvandaan jy kom.
◼ Vra vrae. Vra gepaste vrae oor die ander persoon se agtergrond sonder om jou neus in sy persoonlike sake te steek.
◼ Luister. Moenie dink aan wat jy volgende gaan sê nie. Luister hoofsaaklik. Jou volgende vraag of stelling sal vanself kom.
◼ Ontspan! Gesprekke kan die weg baan vir nuwe vriendskappe. Geniet dus die ondervinding!