Kerseiland—Waarom ons dit besoek het
DEUR ONTWAAK!-MEDEWERKER IN FIDJI
DIE eiland Kiritimati (uitgespreek Ki-ris-masʹ, of Krismis) is die grootste van die 33 eilande in die Stille Oseaan wat die Kiribati-eilande uitmaak.a Die eiland is sowat 388 vierkante kilometer groot, wat gelykstaande is aan die gesamentlike grondgebied van die ander 32 eilande van Kiribati. Omtrent 5 000 mense bly op Kerseiland, terwyl die totale bevolking van al die Kiribati-eilande omtrent 92 000 is.
Almal behalwe een van die Kiribati-eilande is ringeilande. Kerseiland is nie net die grootste ringeiland onder hulle nie, maar is ook, in terme van grondgebied, die grootste ringeiland in die wêreld!
Daarbenewens is Kerseiland merkwaardig omdat dit so na aan die internasionale datumgrens lê. Die mense wat daar woon, is onder diegene vir wie ’n nuwe kalenderdag, ’n nuwe jaar en ander jaarlikse vieringe, soos die dood van Jesus Christus, eerste aanbreek.b
Daarbenewens is hierdie afgeleë ringeiland een van die belangrikste broeiplekke vir seevoëls in die trope. Onlangs is daar gesê dat ongeveer 25 miljoen roetsterretjies gereeld daar nes maak.
Die voëls se geheim word ontdek
Toe die ontdekkingsreisiger kaptein James Cook die dag voor Kersfees in 1777 daar aan land gegaan het, was die eiland onbewoon. Maar daar was ’n oorvloed voëls. Cook het dit Kerseiland genoem.c Die ligging van die eiland was blykbaar baie jare lank ’n geheim wat net aan die voëls bekend was.
Tydens een van ons besoeke het ’n wildbewaarder van die Wildbewaringseenheid ons op ’n fassinerende toer geneem. Toe die wildbewaarder ons na ’n strand neem, het grasieuse, nuuskierige witsterretjies opgevlieg om ons te kom groet. Hulle het tergend naby, net buite ons bereik, in die lug gehang en ons fyn dopgehou.
Op die grond langs die strand was daar ’n kolonie roetsterretjies. Honderdduisende van hierdie voëls kom na Kerseiland om te broei. Wanneer hulle die eiland bereik, vlieg hulle weke lank dag en nag in ’n warrelende, kwetterende massa oor hulle broeiplekke terwyl hulle wag vir al die voëls om daar aan te kom voordat hulle uiteindelik op die kaal grond land om nes te maak.
Jong roetsterretjies begin hulle swerftog oor die see wanneer hulle omtrent drie maande oud is. Hulle keer eers omtrent vyf tot sewe jaar later terug land toe, wanneer hulle gereed is om te broei. Gedurende daardie jare bring hulle die meeste van die tyd in die lug deur. Hulle vere het nie genoeg olie sodat hulle op water kan dryf nie.
Ons het witkopsterretjies gesien wat op neste sit, saam met hulle kuikens en eiers wat nog nie uitgebroei het nie. Hierdie seevoëls bou ’n nes vir hulle kuikens, maar die witsterretjies doen dit nie. Hulle lê hulle eiers op kaal boomtakke. Gelukkig het hulle kuikens goed ontwikkelde pote en kloue wanneer hulle uitbroei, wat net reg is om mee vas te klou. Hierdie donsige, onvolwasse sterretjies wat aan die takke vasklou, het ons harte dadelik verower. Die ouers is ook pragtige klein, sneeuwit voëltjies met kontrasterende swart snawels.
Terwyl ons die gebied bekyk het, het ’n klein wigstertpylstormvoël wat gedetermineerd op sy eier gesit het, vanuit ’n verskuilde plek daar naby ’n waaksame oog op ons gehou. Kerseiland het die grootste bekende kolonie keilstertpylstormvoëls in die wêreld. En dit is een van die laaste bekende broeiplekke van die witkeelstormvoël en die Phoenix-stormvoël. Onder die talle ander voëlsoorte wat daar broei, is die rooipylstert, die brilmalgas, die bruinmalgas, die rooipootmalgas, die grootbruinsterretjie en die fregatvoël.
Die fregatvoëls het moeiteloos in die lug gesweef en fantastiese akrobatiese lugtoertjies uitgevoer, vis in die lug by ander voëls gesteel en meegeding om afvalstukkies vis wat deur vissermanne weggegooi is. Hierdie behendigheid in die lug is uit die nood gebore, aangesien die fregatvoël nie gewoonlik op water land nie. Soos roetsterretjies, is hulle vere nie waterbestand genoeg nie, en boonop maak hulle vlerkspan van 1,8 meter dit vir hulle moeilik om op te styg.
Ons het uitgevind dat ’n klein bruin voëltjie wat ons vroeër gesien het, eintlik ’n Asiatiese goue strandkiewiet is. Dit is een van die talle trekvoëls wat Kerseiland gebruik as ’n noodsaaklike rusplek waar hulle ná hulle lang vlug van hulle broeiplek duisende kilometers daarvandaan, bo die Noordpoolsirkel, hulle reserwes weer kan opbou en kan oorwinter. Hulle uitstekende navigasievermoë lei hierdie maratonvlieërs na hierdie buitepos vir voëls, ongeveer 2 100 kilometer suid van Honolulu, Hawaii.
Die spesiale rede vir ons besoek
Ons besoek Kerseiland gereeld, nie om voëls te kyk nie, maar om mede-Getuies van Jehovah daar te besoek en om saam met hulle vergaderinge by te woon en die predikingswerk te doen. Die feit dat hulle so afgesonder is, bied vir hierdie dierbares groot uitdagings. Byvoorbeeld, jare gelede toe ’n Getuie skielik gesterf het, het sy bedroefde vrou moedig self die begrafnistoespraak gehou omdat daar niemand anders was wat dit kon doen nie. Sy wou hê dat almal wat dit bywoon, die Bybel se hoop vir die dooies moes hoor.—Johannes 11:25; Handelinge 24:15.
Buiten drie goeie Bybelvertalings, is daar min Bybelpublikasies in die inheemse taal. Jehovah se Getuies publiseer egter ’n maandelikse vierkleurtydskrif, Die Wagtoring, tesame met ander Bybellektuur in Gilbertees. Dit verbaas baie mense, aangesien minder as 100 000 mense in die wêreld hierdie taal praat. Sulke Bybelpublikasies stel hierdie afgesonderde groepie Getuies in staat om gereelde vergaderinge vir aanbidding te hou en om Jesus se opdrag te vervul om die goeie nuus van God se Koninkryk te verkondig.—Matteus 24:14; Hebreërs 10:24, 25.
Vervoer is vir baie besoekers ’n probleem. Maar op Kerseiland kan ’n mens binne net drie uur van London na Poland via Tennessee ry! Hoe is dit moontlik? Banana, London, Paris, Poland, Tennessee en Tabwakea is interessante dorpsname, wat aandui waar sommige van die vroeë besoekers aan die eiland vandaan gekom het.
Tydens een van ons besoeke het ’n gawe dokter ons genooi om saam met hom Poland toe te gaan, wat dit vir ons moontlik gemaak het om die predikingswerk vir die heel eerste keer daar te doen. Aangesien ons net twee uur in Poland kon deurbring, het ons letterlik van huis tot huis gehardloop sodat ons al die huise kon besoek. Almal met wie ons in aanraking gekom het, het met waardering na ons Bybelboodskap geluister en lektuur aanvaar, wat hulle nie kon glo in hulle eie taal was nie.
Ons is lief vir hierdie dierbare mense wat op die verafgeleë Kerseiland woon. Daar is ook ’n spesiale plek in ons hart vir die eiland se pragtige geveerde inwoners. Lank gelede het kaptein Cook dalk gemeen dat die eiland slegs “vir die voëls” is, maar vandag is daar baie mense wat anders daaroor voel. Soos die voëls, noem hulle dit hulle tuiste.
[Voetnote]
a Kiribati is voorheen die Gilbert-eilande genoem. Nou bestaan Kiribati nie net uit die 16 eilande van die Gilbert-eilande nie, maar ook uit die Phoenix- en Line-eilandgroepe sowel as Banaba (Ocean-eiland).
b In gehoorsaamheid aan Jesus se bevel herdenk Jehovah se Getuies sy dood een maal per jaar op die dag wat ooreenstem met die dag waarop hy gesterf het.—Lukas 22:19.
c Daar is ook ’n Kerseiland in die Indiese Oseaan.
[Kaarte op bladsy 16]
(Sien publikasie vir oorspronklike teksuitleg)
Kerseiland
Banana
Tabwakea
London
Paris
Poland
Internasionale datumgrens
[Prent op bladsy 16]
Fregatvoëls
[Erkenning]
GaryKramer.net
[Prent op bladsy 17]
Witsterretjie
[Erkenning]
© Doug Perrine/SeaPics.com
[Prent op bladsy 17]
Bruinmalgasse
[Erkenning]
Valerie & Ron Taylor/ardea.com
[Prent op bladsy 18]
Ons doen die predikingswerk saam met plaaslike Getuies
[Foto-erkenning op bladsy 18]
GaryKramer.net