“Werktuie van vernietiging” vooruitgesien
“Die bose verstand van die mens soek altyd na maniere om die resultate van sy talente te gebruik om sy medemens tot slawe te maak, te vernietig of te bedrieg.” —Horace Walpole, 18de-eeuse Engelse skrywer.
LUGVAART het die mensdom al op baie maniere bevoordeel. Maar hoe waar is die woorde hierbo van Horace Walpole tog! Selfs voordat die mens dit reggekry het om te vlieg, het hy aan die talle maniere gedink waarop vliegmasjiene as oorlogstuig gebruik kon word.
In 1670, meer as 100 jaar voor die eerste bemande ballonvlug, het die Italiaanse Jesuïet Francesco Lana die moontlikheid genoem dat “God nooit sal toelaat dat so ’n masjien [lugskip] gebou word nie, om die talle gevolge te voorkom waardeur die burgerlike en politieke handhawing van orde onder die mens versteur kan word”. Hy het egter met ’n mate van vooruitsiendheid bygevoeg: “Want wie [besef nie] dat geen stad veilig sal wees teen verrassingsaanvalle nie, aangesien die lugskip te eniger tyd direk bokant die markplein kan verskyn en sy bemanning daar sal aflaai? Dieselfde sal gebeur op die binnepleine van woonhuise en op skepe wat oor die see vaar . . . Dit kan, sonder om eers neer te daal, ystervoorwerpe afgooi wat die vaartuie sal laat omslaan en mense sal doodmaak, en die skepe kan verbrand word met kunsmatige vuur, balle en bomme.”
Toe warmlug- en waterstofballonne uiteindelik aan die einde van die 18de eeu verskyn het, het Walpole gevrees dat die ballonne kort voor lank “werktuie van vernietiging vir die mensdom” sou word. Trouens, teen die einde van 1794 is waterstofballonne deur Franse weermaggeneraals gebruik om op vyandelike gebied te spioeneer en om troepebewegings te koördineer. Ballonne is ook in die Amerikaanse Burgeroorlog gebruik, sowel as in die Frans-Pruisiese konflikte van die 1870’s. En gedurende die twee wêreldoorloë van die vorige eeu is ballonne op groot skaal gebruik vir verkenningsvlugte deur Amerikaanse, Britse, Duitse en Franse troepe.
Die ballon het gedurende die Tweede Wêreldoorlog ’n instrument van die dood geword toe die Japannese leër 9 000 onbemande ballonne gewapen met bomme na die Verenigde State gestuur het. Meer as 280 van die gewapende ballonne het Noord-Amerika bereik.
Vlieënde oorlogskepe vooruitgesien
Ook die vliegtuig is uit die staanspoor as ’n potensiële oorlogswerktuig beskou. Alexander Graham Bell het in 1907 gesê: “Slegs ’n handjievol mense weet hoe na Amerika tans daaraan is om ’n probleem op te los wat wêreldwyd ’n omwenteling in oorlogvoering sal teweegbring—ek verwys na die bou van ’n praktiese vlieënde oorlogskip.” In daardie selfde jaar het The New York Times die woorde van die ballonvaarder kaptein Thomas T. Lovelace aangehaal: “Binne twee tot vyf jaar sal elke groot nasie oorlogslugskepe en lugskipjaers hê net soos hulle nou torpedobote en torpedobootjaers het.”
Net drie maande later het die Amerikaanse Seinkorps ’n kontrak met die Wright-broers gesluit om die eerste krygsvliegtuig te bou. ’n Artikel in The New York Times van 13 September 1908 het verduidelik waarom die weermag in die vliegtuig belangstel: “’n Bom kan in die skoorsteen van ’n oorlogskip afgegooi word, wat verskriklike skade aan die masjinerie sal aanrig en sy vernietigingswerk sal voltooi deur die stoomketels te laat bars.”
Net soos Bell gesê het, het die vliegtuig uiteindelik ‘wêreldwyd ’n omwenteling in oorlogvoering teweeggebring’. Teen 1915 het vliegtuigvervaardigers ’n masjiengeweer ontwikkel wat vorentoe gewys het en met die skroef gesinchroniseer is om nie die lemme raak te skiet nie. Kort ná die vegvliegtuig het bomwerpers op die toneel verskyn, wat teen die Tweede Wêreldoorlog groter en kragtiger geword het. Op 6 Augustus 1945 het ’n B-29 Superfortress die eerste atoombom wat in oorlogvoering gebruik is, op Hirosjima gegooi, wat die Japannese stad platgevee het en uiteindelik 100 000 lewens geëis het.
Net twee jaar vroeër, in 1943, het Orville Wright privaat gesê dat hy spyt was dat die vliegtuig uitgevind is. Tydens die twee wêreldoorloë, het hy gesê, het dit voorwaar ’n verskriklike wapen geword. Met die vervaardiging van lasergeleide missiele en sogenaamde slim bomme het dit sedertdien selfs dodeliker geword terwyl ‘nasie teen nasie opstaan’.—Matteus 24:7.
[Prente op bladsy 22, 23]
1. Onbemande ballon wat bomme dra
2. Versperringsballon
[Erkenning]
Library of Congress, Prints & Photographs Division, FSA/OWI Collection, LC-USE6-D-004722
3. B-29 Superfortress
[Erkenning]
USAF photo
4. Aanvalsvliegtuig: F/A-18C Hornet
5. Stealth-vegvliegtuig: F-117A Nighthawk
[Erkenning]
U.S. Department of Defense