Geweld teen vroue—’n Wêreldwye probleem
DIE Internasionale Dag vir die Beëindiging van Geweld teen Vroue val op 25 November. Hierdie dag is in 1999 amptelik erken deur die Algemene Vergadering van die Verenigde Nasies met die doel om die publiek meer bewus te maak van die skending van vroueregte. Waarom is dit nodig geag?
In baie kulture word vroue as minderwaardig of as tweedeklasburgers beskou en behandel. Daar bestaan diepgewortelde vooroordeel teen hulle. Geweld op grond van geslag in al sy vorme is ’n voortslepende probleem, selfs in die sogenaamde ontwikkelde wêreld. Volgens Kofi Annan, die voormalige Sekretaris-Generaal van die VN, “is geweld teen vroue ’n wêreldwye verskynsel en vind dit in alle gemeenskappe en kulture plaas. Dit raak vroue ongeag hulle ras, etniese agtergrond, sosiale stand, afkoms of enige ander status wat hulle dalk geniet.”
Radhika Coomaraswamy, voormalige Spesiale Referent van die VN se Kommissie oor Menseregte in verband met geweld teen vroue, sê dat geweld teen vroue vir die oorgrote meerderheid van vroue “’n taboe-onderwerp is, onsigbaar vir die samelewing en ’n skandelike feit van die lewe”. Statistiek wat deur ’n viktimologie-instituut in Holland uitgereik is, toon dat 23 persent van vroue in een Suid-Amerikaanse land, of ongeveer 1 uit 4, die een of ander vorm van gesinsgeweld ondervind. Die Raad van Europa skat eweneens dat 1 uit 4 Europese vroue gesinsgeweld gedurende haar leeftyd ondervind. Volgens die Britse Ministerie van Binnelandse Sake is daar in ’n onlangse jaar in Engeland en Wallis gemiddeld twee vroue elke week doodgemaak deur iemand saam met wie hulle voorheen of op daardie stadium gebly het. Die tydskrif India Today International het gesê: “Vir vroue regoor Indië is vrees ’n permanente metgesel en verkragting die vreemdeling wat hulle moontlik om elke hoek, op elke pad, op elke openbare plek, te eniger tyd sal konfronteer.” Amnestie Internasionaal beskryf geweld teen vroue en meisies as die “algemeenste menseregteprobleem” wat vandag bestaan.
Weerspieël die bogenoemde statistiek God se gesindheid teenoor vroue? Hierdie vraag sal in die volgende artikel bespreek word.