Musiek​—God se gawe aan die hart

DEUR ONTWAAK!-MEDEWERKER IN SPANJE

MUSIEK het krag. Dit kan ons kalmeer, ons meevoer en ons opbeur. Ons vreugdes en ons smarte kan uitdrukking daarin vind. Musiek, wat in byna alle kulture van die verlede en die hede voorkom, spreek tot die verstand sowel as die hart. Ja, musiek is waarlik ’n gawe van God af.—Genesis 4:21.

Ons is heel moontlik van geboorte af aan die een of ander vorm van musiek blootgestel. Miskien het ons ma vir ons wiegeliedjies gesing om ons te laat slaap. Gedurende ons tienerjare het ons dalk lief geword vir musiek wat ons hartsnare aangeroer het. Selfs as volwassenes geniet baie van ons rustige musiek terwyl ons bestuur of wanneer ons aan die einde van ’n besige dag by die huis is.

Die lirieke van ’n liedjie kan sekere aspekte van ’n land se kultuur of geskiedenis weergee. Die eertydse Israeliete het ’n aantal spesiale geleenthede deur middel van sang gevier (Eksodus 15:1-21; Rigters 5:1-31). Die profeet Moses het ’n lied gekomponeer wat geskiedkundige feite en hartgrondige vermanings vir die volk ingesluit het (Deuteronomium 32:1-43). Sulke liedere was ongetwyfeld goeie geheuehulpe.

Jy kan musiek maak!

Jy dink dalk: ‘Ek het nie ’n aanleg vir musiek nie.’ Wel, dink vir ’n oomblik aan jou stem. Danksy die veelsydigheid van hierdie ingeboude instrument kan amper almal tot ’n mate musiek maak, hetsy met of sonder die begeleiding van ander instrumente. Al wat jy hoef te doen, is om jou mond oop te maak en te sing. En wanneer jy dit doen, moet jy nie bekommerd wees as jy geen lof of pryse inpalm vir jou sang nie. Oefen net, en jy behoort te verbeter.

“Die stem is direk verbind met die setel waaruit ons diepste emosies voortspruit, en dit is die beste instrument waarmee daardie emosies uitgedruk kan word”, sê die Spaanse tydskrif Psychologies. “Dit is opwindend [om te sing]”, sê die sopraan Ainhoa Arteta. “Ek sou aanbeveel dat enigeen wat hom in sang wil uitdruk, dit vryelik en spontaan doen.”

Omdat musiek ’n kragtige invloed op die hart kan hê, moet ons selektief wees. Pragtige melodieë kan byvoorbeeld onbetaamlike lirieke verbloem wat haat, onsedelikheid of geweld onskuldig laat klink of selfs bevorder—temas wat geen beginselvaste persoon vermaaklik sou vind nie (Efesiërs 4:17-19; 5:3, 4). “Bewaak jou hart meer as enigiets anders wat bewaar moet word”, sê God se Woord, “want daaruit is die oorspronge van die lewe” (Spreuke 4:23). Ja, jou keuse van musiek is belangrik.a

Goeie musiek kan goeie medisyne wees

“Een van die redes waarom musiek in feitlik elke kultuur voorkom, [is] omdat dit die vermoë het om menslike gesondheid en welsyn te bevorder en te handhaaf”, sê die boek Principles and Practice of Stress Management. Wanneer ons sing, sê ’n ander naslaanwerk, resoneer en vibreer ons hele liggaam. Die ligte vibrasies help weefsels weer om te ontspan en uit te sit, wat kan help om pyn te verlig.

Gevolglik moedig sommige terapeute pasiënte wat aan stres ly, aan om na strelende musiek te luister, wat ’n mens ook kan opbeur. Party hospitale speel selfs in waakeenhede musiek. Vroeggebore babas sowel as mense wat operasies ondergaan, reageer dikwels goed op aangename musiek. Volgens Principles and Practice of Stress Management dui studies aan dat rustige musiek “streshormoonvlakke tydens chirurgie noemenswaardig verlaag”.

Musiek kan ook swanger vroue minder angstig laat voel deur hulle te help om tydens bevalling te ontspan. Tandartse speel soms strelende musiek om ’n meer ontspanne atmosfeer vir gespanne pasiënte te skep. Maar musiek en sang kan baie meer as dit doen. Dit kan ons geestelik help.

‘Met my lied sal ek God prys’

Het jy geweet dat ongeveer ’n tiende van die Bybel in die vorm van liedere geskryf is? Die vernaamste voorbeelde hiervan is die Psalms, Hooglied van Salomo en Klaagliedere. Dit is te verstane dat die meeste van die nagenoeg driehonderd verwysings na sang met die aanbidding van God verband hou. “Jehovah is my sterkte . . . , en met my lied sal ek hom prys”, het die Israelitiese koning Dawid, ’n talentvolle musikant en komponis, gesê.—Psalm 28:7.

Trouens, Dawid het 4 000 manne van die stam Levi georganiseer om as musikante en sangers in Jerusalem te dien. Uit hierdie groep was 288 “geoefen . . . in sang tot Jehovah, almal meesters” (1 Kronieke 23:4, 5; 25:7). Hierdie sangers het ongetwyfeld hard geoefen. Ja, musiek was so belangrik in die aanbidding van God dat sangers vrygestel is van ander verpligtinge by die tempel sodat hulle kon konsentreer op hulle werk.—1 Kronieke 9:33.

Op die aand voor Jesus se dood het hy en sy apostels lofliedere tot God gesing, heel moontlik Psalm 113 tot 118. Teen Jesus se tyd is hierdie psalms—wat “Hallel-Psalms” genoem is—gedurende die Pasgaviering gesing (Matteus 26:26-30). Dit is “Hallel-Psalms” genoem omdat die uitroep “Halleluja!”, wat “Loof Jah!” beteken, herhaaldelik daarin voorgekom het. “Jah” is ’n verkorte, poëtiese vorm van Jehovah, die naam van die Allerhoogste God.—Psalm 83:18.

Sang het ook deel geword van Christelike aanbidding. Die boek The History of Music sê: “Vir die vroeë Christene was sang ’n gebruiklike deel van openbare en private aanbidding. Vir Joodse bekeerlinge was dit ’n voortsetting van die gebruike van die sinagoge . . . Benewens die Hebreeuse Psalms . . . het die nuwe geloof voortdurend nuwe gesange voortgebring.” Vandag geniet Christengetuies van Jehovah dit ook om hom privaat en by hulle Christelike vergaderinge met sang te loof.

Omdat musiek ons in staat stel om feitlik elke emosie uit te druk en omdat dit so ’n kragtige uitwerking op ons hart, verstand en liggaam kan hê, moet ons die grootste respek hê vir hierdie “volmaakte geskenk . . . van bo” (Jakobus 1:17). Ja, mag ons dit vryelik en wyslik gebruik.

[Voetnoot]