Sal Die Aarde Toekomstige Geslagte Kan Onderhou?

DEUR ONTWAAK!-MEDEWERKER IN KANADA

◼ Nadat ’n vier jaar lange, omvattende studie van die wêreld se vernaamste ekosisteme gedoen is, het ’n groep geleerdes en omgewingsleiers—wat deel was van ’n studie wat die Millennium-Ekosisteembeoordeling (MA) genoem is—hulle eerste verslag gepubliseer. Hier is van die gevolgtrekkings wat hulle gemaak het: Gedurende die afgelope halfeeu het die toenemende vraag na voedsel, varswater, hout, vesel en brandstof ongeëwenaarde veranderinge in die aarde se ekosisteme teweeggebring, wat die aarde se vermoë om toekomstige geslagte te onderhou, onder druk plaas. Die aarde se natuurlike vermoë om gewasse te bestuif, lugversorging deur middel van plante te voorsien en voedingstowwe deur middel van die oseane te hersirkuleer, word ooreis. Die planeet staan ook op die punt om ’n magdom spesies deur uitsterwing te verloor.

“Mense beskadig die planeet teen ’n ongeëwenaarde tempo, wat die risiko vergroot om skielike ineenstortings in die natuur teweeg te bring wat siekte, ontbossing of dooie sones in die see tot gevolg kan hê”, het die koerant Globe and Mail van Kanada gesê. Die koerant het bygevoeg: “Die vleilande, woude, savannes, riviermondings, viswaters langs die kus en ander habitats wat die lug, water en voedingstowwe van alle lewende wesens hersirkuleer, word onherstelbaar beskadig.” Hoewel die direksie van die MA dit eens is dat dit binne die mag van menseorganisasies lê om die druk op die ekosisteme te verlig, sê hulle dat dit “radikale veranderinge sal verg in die manier waarop die natuur op elke vlak van besluitneming in ag geneem word” om hierdie doelwit te bereik.

Kan die planeet Aarde gered word? Die antwoord is ’n besliste ja! As die oppassers van God se skepping moet ons ons bes doen om die omgewing te respekteer (Psalm 115:16). Maar dit is slegs deur goddelike ingryping dat die ekosisteme se balans herstel sal word. Ons “Grootse Maker” belowe dat hy sy aandag op die aarde sal vestig en “dit oorvloed [sal] gee” (Job 35:10; Psalm 65:9-13). Dit sluit die see in en alles wat daarin is omdat Jehovah God, as die Skepper, mag oor die see het (Psalm 95:5; 104:24-31). En wat hy belowe, sal sekerlik bewaarheid word, aangesien God “nie kan lieg nie”.—Titus 1:2.

Dit is waarlik gerusstellend om te weet dat die aarde toekomstige geslagte sal kan onderhou. Dit beweeg almal wat God vrees, om hom te prys vir sy oorvloedige wysheid, krag en goedheid en om hom te loof vir al die liefde wat hy teenoor sy skeppingswerke betoon.—Psalm 150:1-6.

[Foto-erkenning op bladsy 12]

Aardbol: NASA photo