Raak die tyd min vir die planeet Aarde?
Hoe sou jy die volgende veelkeusevraag beantwoord?
Sal toestande op die aarde in die nabye toekoms
(a) verbeter?
(b) dieselfde bly?
(c) vererger?
PROBEER jy ’n positiewe beskouing oor die toekoms behou? Dit hou baie voordele in om dit te doen. Studies toon dat mense met ’n optimistiese lewensuitkyk akademies en fisies beter vaar. In een langtermynstudie is daar selfs bevind dat mans wat optimiste is, baie minder geneig is om aan koronêre hartsiekte te ly as dié met ’n pessimistiese lewensbeskouing. Hierdie bevindings is in ooreenstemming met ’n stelling wat eeue gelede in die Bybel gemaak is: “’n Vreugdevolle hart is ’n goeie geneesmiddel, maar ’n verslae gees droog die gebeente uit.”—Spreuke 17:22.
Maar in die lig van wat wetenskaplike deskundiges oor die toekoms van die planeet Aarde voorspel, vind baie mense dit moeilik om vreugdevol en optimisties te bly. Kyk na net ’n paar van die somber voorspellings in die nuus.
’n Planeet in gevaar
In 2002 het die hoogaangeskrewe Stockholm-instituut vir Omgewingsake gewaarsku dat ’n onverskillige benadering tot ekonomiese ontwikkeling waarskynlik aanleiding sal gee tot “gebeure wat die planeet se klimaat en ekosisteme drasties kan verander”. Die verslag het verder gesê dat aardwye armoede, volgehoue ongelykheid en die geleidelike vernietiging van omgewingshulpbronne kan veroorsaak dat die samelewing “van een omgewings-, maatskaplike en sekuriteitskrisis na die ander” steier.
In 2005 het die Verenigde Nasies die Millennium Ecosystem Assessment Synthesis Report vrygestel. Dit was na aanleiding van ’n vier jaar lange wêreldwye studie van die aarde se omgewing, waarby meer as 1 360 deskundiges uit 95 lande betrokke was. Die verslag het ’n dringende waarskuwing bevat: “Menslike bedrywighede plaas soveel druk op die natuurlike prosesse van die aarde dat die vermoë van die planeet se ekosisteme om toekomstige geslagte te onderhou, nie meer as vanselfsprekend aanvaar kan word nie.” Om rampspoed af te weer, sal “betekenisvolle veranderinge in beleide, instellings en gebruike [aangebring moet word] waarmee daar nog nie begin is nie”, sê die verslag.
Anna Tibaijuka, die uitvoerende direkteur van die Verenigde Nasies se Menslike Vestigingsprogram, maak melding van iets waaroor al hoe meer navorsers saamstem. Sy sê: “As ons soos gewoonlik voortgaan, wag ’n rampspoedige toekoms op ons.”
’n Rede vir optimisme
Jehovah se Getuies, die uitgewers van hierdie tydskrif, glo ook dat drastiese veranderinge binnekort op die aarde gaan plaasvind. Maar hulle is daarvan oortuig dat hierdie veranderinge nie ’n rampspoedige toekoms tot gevolg sal hê nie, maar eerder die weg sal baan tot die wonderlikste toestande wat die wêreld al ooit ondervind het. Waarom hierdie optimisme? Omdat hulle vertrou op die beloftes in God se Woord, die Bybel. Let op een van hierdie beloftes: “Nog net ’n klein rukkie en die goddelose sal daar nie meer wees nie; en jy sal beslis ag gee op sy plek, en hy sal daar nie wees nie. Maar die sagmoediges sal die aarde besit, en hulle sal hulle inderdaad verlustig in die oorvloed van vrede.”—Psalm 37:10, 11.
Is so ’n hoop blote wensdenkery? Voordat jy hierdie vraag beantwoord, dink aan hierdie stelling: Die Bybel het baie van die vernaamste probleme wat die aarde en die mensdom nou teister, duisende jare vooruit akkuraat voorspel. Lees asseblief die tekste in die volgende artikel, en vergelyk wat dit sê met wat jy in die wêreld sien gebeur. As jy dit doen, sal dit jou vertroue versterk dat die Bybel toekomstige gebeure akkuraat voorspel.