Ons beskou die wêreld
◼ Oor die afgelope 20 jaar het die aantal natuurrampe wêreldwyd vervierdubbel. Elke jaar word oor die 250 miljoen mense daardeur geraak.—EL UNIVERSAL, MEXIKO.
◼ “Passaatwinde, die heersende winde oor die Stille Oseaan, het deur die jare heen ’n ontsaglike massa drywende rommel versamel.” Hierdie rommel beslaan nou ’n oppervlak so groot soos Australië.—LA DÉPÊCHE DE TAHITI, TAHITI.
◼ As ’n mens 50 liter biobrandstof vir ’n motor wil vervaardig, het jy 200 kilogram mielies nodig—“genoeg om een persoon ’n hele jaar lank te voed!”—GAZETA WYBORCZA, POLE.
Bybels gedruk in China
“China het een van die lande geword wat die grootste aantal Bybels ter wêreld druk”, sê Ye Xiaowen, hoof van die Landsadministrasie van Godsdienssake. ’n Chinese drukkersmaatskappy in Nanjing, die hoofstad van die Jiangsu-provinsie, het ’n mylpaal bereik toe hulle die land se vyftigmiljoenste volledige Bybel gedruk het. Volgens People’s Daily Online “het daar in onlangse jare ongeveer 3 miljoen eksemplare van die Bybel jaarliks van die [maatskappy se] perse af gekom”. Die aantal verklaarde Christene in China neem volgens berig toe.
Ikone is teikens
“Oor die afgelope vyf jaar in Rusland is meer as 1 000 kerke beroof”, berig Russky Newsweek. Diefstalle van sowat 40 000 ikone is by Rusland se Departement van Binnelandse Sake aangemeld. Volgens ’n ooreenkoms tussen die Departement en die Russies-Ortodokse Kerk, sal al die kerk se ikone nou ’n spesiale identifikasiemerk kry, wat slegs onder ultravioletlig sigbaar is. Dit sal speurders help om die regmatige eienaars van ikone wat teruggekry is, te identifiseer. Die Moskou-patriargaat verwelkom hierdie maatreël, sê Russky Newsweek, “want die ‘aardse’ identifikasiemerk het nie ’n uitwerking op die wonderdadige eienskappe van die ikoon nie”.
Oorloë put Afrika se hulpbronne uit
“Tussen 1990 en 2005 was 23 Afrikalande by konflikte betrokke, en die totale koste het ongeveer 300 miljard Amerikaanse dollar [R2,3 miljard] beloop”, sê die International Herald Tribune. “Die prys wat Afrika betaal, kan die koste daarvan dek om die MIV- en vigs-krisis in Afrika op te los, of om opvoeding en water te voorsien sowel as om tering en malaria te voorkom en te behandel”, sê die Liberiese president Ellen Johnson-Sirleaf. “Letterlik duisende hospitale, skole en paaie kon gebou geword het.” Die koerant sê dat Afrika, sonder oorlog, “dalk ’n vasteland van vooruitgang sou gewees het in plaas van die wêreld se armste vasteland”.
’n Middagslapie sal jou dalk goed doen
In ’n studie van oor die 23 000 Griekse mans en vroue is bevind dat ten minste drie middagslapies per week die gevaar om aan ’n hartaanval te sterf met 37 persent kan verminder. “Daar is aansienlike bewyse dat akute sowel as chroniese stres en hartkwale met mekaar verband hou”, verduidelik Dimitrios Trichopoulos, ’n navorser en epidemioloog aan die Fakulteit vir Openbare Gesondheid van die Harvard-universiteit, VSA. “’n Siësta”, sê hy, “verlig dalk stres [en] verminder sodoende sterftes as gevolg van koronêre kwale.”