Van ons lesers
Nie meer verslaaf aan alkohol nie (Mei 2007) Ek geniet dit om af en toe julle tydskrif te lees wanneer die Getuies dit vir my bring. Ek vind die artikels nogal verfrissend in vergelyking met die neerdrukkende nuus op die TV en in die koerante. Ek het nog nooit self aan alkoholisme gely nie, maar ’n paar van my familielede en vriende het wel. Die man in die artikel het gesê dat hy ná drie maande heeltemal opgehou het om alkohol te drink. Dít na ’n leeftyd van alkoholverwante probleme. Hoewel ek my hoed vir hom afhaal, moet ek sê dat dit nogal ’n onrealistiese voorbeeld is en dat dit, myns insiens, ontmoedigend kan wees vir enigiemand wat met so ’n probleem te kampe het. ’n Tipiese alkoholis ondervind gewoonlik ’n paar terugslae op die moeilike pad na herstel.
G. A., Verenigde State
“Ontwaak!” antwoord: Dit was nie ons bedoeling om te impliseer dat dit ’n eenvoudige saak is om van drankmisbruik weg te breek nie. Ons stem saam dat baie wat met alkoholverslawing sukkel, terugslae en ontmoediging op die pad na herstel sal ondervind. Selfs diegene wat skielik ophou drink en nie meer van alkohol afhanklik is nie, moet op hulle hoede bly sodat hulle terugval. Daarom het die artikel gemeld dat die voormalige ‘alkoholverslaafde’ ná tien jaar sonder ’n drankie erken het: “Baie mense weet nie watter ontsaglike stryd ek voer en dat net een drankie genoeg sal wees om my weer in my ou weë te dompel nie. Ek het nog ’n begeerte na alkohol. Dit vereis vurige gebed en vasberadenheid om die krag te hê om nee te sê.” Deur biddend op God te vertrou, het baie dit reggekry om los te breek van verslawing aan alkohol.—Psalm 55:22.
Die Bybel—Kan jy dit vertrou? (November 2007) Ek is 12 jaar oud en wil julle bedank vir hierdie ongelooflik interessante en leersame spesiale uitgawe van die Ontwaak! Ek het veral die deel op bladsy 7 oor die interne harmonie van die Bybel geniet. Dit het dinge genoem waaraan ek nog nooit voorheen gedink het nie. Ek sien al klaar uit na die volgende spesiale uitgawe!
D. F., Verenigde State
Iets om oor te dink Ek wil julle graag bedank vir die nuwe formaat van die Ontwaak! Ek vind die vrae wat aan die einde van sekere artikels gevra word, baie nuttig. Dit help my om die inligting te onthou en oor die onderwerp te peins. Ons lewe is deesdae so besig dat ons party belangrike en opbouende punte nie raaksien wanneer ons lees nie.
M.A.S., Brasilië
Is die dood werklik die einde? (Desember 2007) Ses maande gelede het my ma in ’n tragiese ongeluk gesterf. Dit was só gerusstellend om hierdie artikel te lees, wat my hoop om haar weer in die opstanding te sien, versterk het. Baie dankie.
L.L.R., Brasilië
Jongmense vra . . . Waarom moet ek volgens Bybelstandaarde lewe? (November 2007) Ek het gedink dat daar niks mee verkeerd is om met seuns uit te gaan nie, solank ek my nie aan onsedelikheid skuldig maak nie. Maar dit was nie vir my genoeg om net tyd saam met my kêrel deur te bring nie. Ek het ongepaste vleeslike begeertes begin ontwikkel. Baie dankie dat julle hierdie Bybelleringe só aanbied dat onervare jongmense dit maklik kan verstaan.
E. F., Japan