’n Fiets wat messe slyp

DEUR ONTWAAK!-MEDEWERKER IN TANZANIË

◼ Wat sou jy dink as jy ’n man sien wat agterstevoor op ’n fiets sit en ywerig trap, maar net op een plek bly? In party wêrelddele, soos hier in Oos-Afrika, sou jy waarskynlik na ’n messlyper staan en kyk—iemand wat sy bestaan voer deur in een van die gemeenskap se behoeftes te voorsien.

Hy het ’n gewone fiets, maar met ’n paar belangrike wysigings. Dit het ’n ronde slypsteen wat op ’n versterkte bagasierak gemonteer is. Vir die dryfband word ’n nylontou om die velling van ’n ekstra fietswiel gedraai wat in die helfte gesny is en aan die agterwiel van die fiets vasgesweis is.

Dit is nie duidelik hoe hierdie knap stuk gereedskap Afrika bereik het nie. “Daar is al vir my gesê dat sulke fietse in Dar es Salaam, die hoofstad van Tanzanië, gebruik is voordat die idee in die stad Moshi, waar ek woon, posgevat het”, sê Andrea, ’n man wat al sedert 1985 messe op hierdie manier slyp. “Dit word van 1982 af hier in gebruik”, voeg hy by.

Hoe kry ’n mens so ’n fiets wat messe slyp, in die hande? Andrea verduidelik: “Ons gaan na ’n fundi, wat Swahili vir ‘vakman’ is, en vra hom om ’n gewone fiets volgens ons vereistes te wysig.” Die voltooide produk is gewoonlik binne ’n dag of twee gereed.

Vonke en sweet!

Andrea se dag begin sowat sewe-uur in die oggend, wanneer hy op sy fiets klim en na ’n digbevolkte gebied ry. Wanneer hy daar aankom, roep hy uit: “Bring julle messe! Ek slyp messe!” Hy lui ook die klokkies op sy fiets. Kort voor lank kyk ’n huisvrou by ’n venster uit. Sy roep Andrea nader en gee hom ’n paar stomp messe. ’n Buurman bring ’n kapmes; en ’n haarkapper sy skêr. Andrea maak ook skoffels en boorpunte skerp, asook byna enigiets wat ’n snykant het.

Wanneer Andrea sy fiets gereed kry, soek hy na ’n stuk gelyk grond en klap hy sy fietsstaander af sodat die agterwiel oplig. Dan haak hy die nylon-dryfband aan, gaan sit op die tweede saal, wat agtertoe kyk, en begin trap. Vonke spat en die sweet tap terwyl hy ’n verskeidenheid lemme slyp totdat hulle vlymskerp is. Teen omtrent sesuur die aand pak Andrea op.

Die messlyper met sy fiets is maar net een voorbeeld van hoe “vlytiges” vindingrykheid en inisiatief aan die dag kan lê om ’n eerlike bestaan te voer, selfs onder moeilike ekonomiese omstandighede.—Spreuke 13:4.