’n Onderwyseres verander haar beskouing
◼ ’n Paar jaar gelede het ’n onderwyseres in Batoemi, Georgië, haar leerlinge gevra om die Tien Gebooie op te noem. Tot haar verbasing het een van haar leerlinge, Anna, dit reg opgesê. Sy het ook ander Bybelvrae op ’n indrukwekkende manier beantwoord. Die onderwyseres se belangstelling is geprikkel en sy het vir Anna gevra hoe sy soveel weet. Toe Anna sê dat sy die Bybel saam met Jehovah se Getuies studeer, het die onderwyseres haar stilgemaak en gesê dat sy hulle as fanatici beskou.
Eenkeer het die onderwyseres die klas gevra om ’n opstel te skryf oor die lewe in Georgië en die verskillende probleme waarmee die land te kampe het. Aan die einde van haar opstel het Anna geskryf: “Enige mensepogings om drastiese veranderinge in die samelewing te weeg te bring, sal onsuksesvol wees, want Jeremia 10:23 sê dat ‘aan die mens sy weg nie behoort nie. Dit behoort nie aan die mens wat loop om sy voetstappe te rig nie.’ Al die probleme sal slegs deur God se Koninkryk opgelos word.”
Die volgende dag het die onderwyseres Anna voor die klas vir haar opstel geprys en gesê: “Ek het Anna se unieke opstel, wat sy in haar eie woorde geskryf het, werklik geniet. Daarin het sy verduidelik hoe wêreldtoestande verander kan word.” Die onderwyseres was ook beïndruk deur Anna se gedrag en het haar voor die hele klas geprys vir haar goeie maniere en beskeie kleredrag.
Toe Jehovah se Getuies die onderwyseres by haar huis besoek het, het sy vir hulle gesê dat sy hulle vroeër as fanatici beskou het, maar dat sy haar beskouing as gevolg van haar leerder Anna verander het. In 2007 het die onderwyseres die Herdenking van Jesus Christus se dood saam met Jehovah se Getuies bygewoon en aandagtig na die program geluister.
Ná die Gedenkmaal het Anna se onderwyseres erken dat sy baie beïndruk was met hoe goed Jehovah se Getuies die Bybel ken. Sy studeer nou die Bybel gereeld saam met die Getuies. Jy het ongetwyfeld soos hierdie onderwyseres ’n oop gemoed wat jou beweeg om ondersoek in te stel na die redes vir ander se godsdiensoortuigings en gedrag. Vra gerus een van Jehovah se Getuies vir ’n gratis tuisbybelstudie.
[Prent op bladsy 21]
Anna, besig om haar opstel te skryf