Koninkryksverkondigers berig
Letland reageer gunstig op die goeie nuus
DIE Bybel toon duidelik dat dit God se wil is dat “alle soorte mense gered moet word en tot juiste kennis van die waarheid moet kom” (1 Timoteus 2:4). Diegene wat baie jare lank die geleentheid ontsê is om die goeie nuus te hoor, hoor dit nou! In Letland, soos in ander dele van die wêreld, reageer mense van alle ouderdomme en verskillende agtergronde gunstig op die boodskap, soos die volgende ondervindinge toon.
• In Rezekne, ’n dorp in oostelike Letland, het ’n ma en haar tienderjarige dogter ’n vrou op straat gevra hoe om by ’n sekere plek uit te kom. Nadat sy hulle die inligting gegee het, het die vrou, wat toevallig een van Jehovah se Getuies is, hulle ’n uitnodiging na die vergaderinge van die Getuies gegee.
Aangesien die ma en dogter albei godsdienstig was, het hulle besluit om na die vergadering toe te gaan. Op pad daarheen het hulle ooreengekom dat hulle dadelik sou loop as hulle enigiets ongehoords vind. Maar die vergadering was so interessant dat hulle nie eers daaraan gedink het om te loop nie. Hulle het ’n Bybelstudie aanvaar en die vergaderinge gereeld begin bywoon. Ná net drie maande het hulle die begeerte uitgespreek om in die predikingswerk uit te gaan en daarna uitgesien om gedoop te word.
• In ’n stad in westelike Letland het ’n Getuie Anna, ’n 85-jarige vrou, ontmoet, wat werklik belanggestel het en ’n Bybelstudie aanvaar het. Haar dogter en ander familielede het haar hewig teëgestaan. Maar Anna het nie toegelaat dat dít of haar ouderdom en swak gesondheid haar daarvan weerhou om met haar Bybelstudie voort te gaan nie.
Eendag het Anna vir haar dogter gesê dat sy gedoop gaan word. “As ma gedoop word, sal ek ma na ’n ouetehuis toe stuur”, het Anna se dogter geantwoord. Maar hierdie dreigement het Anna nie afgeskrik nie. Weens haar fisiese toestand is sy in haar huis gedoop.
Hoe het Anna se dogter hierop gereageer? Haar gesindheid het verander, en sy het ná die doop ’n spesiale maaltyd vir haar ma voorberei. Toe het sy haar ma gevra: “Hoe voel ma noudat ma gedoop is?” Wat was Anna se antwoord? “Soos ’n pasgebore baba!”
• In Desember 1998 het twee Getuies ’n afgetrede leëroffisier van die voormalige Sowjetunie ontmoet. Aangesien hy in ’n Skepper glo, het hy ’n Bybelstudie aanvaar, en later het sy vrou ook begin studeer. Hulle het vinnig vordering gemaak en gou ongedoopte verkondigers geword. Teen die volgende somer is die voormalige offisier gedoop. Hierdie egpaar se groot liefde vir geestelike dinge is ’n aanmoediging vir almal in die gemeente. Daarbenewens het hulle hard gewerk toe ’n plaaslike huis in ’n pragtige Koninkryksaal omskep is.