Wanneer begin ’n menselewe?

“MY BIOLOGIESE ma was 17 jaar oud en 7 1/2 maande swanger toe sy besluit het om ’n aborsie deur middel van ’n soutoplossing te hê”, het Gianna verduidelik.a Sy het bygevoeg: “Ek was die baba wat sy afgedryf het. Ek het bly lewe pleks van te sterf.”

Hierdie verklaring is in 1996 deur die 19-jarige Gianna gemaak by ’n sitting van ’n Amerikaanse regeringskomitee insake aborsie. Teen die tyd dat Gianna sewe en ’n half maande in haar moeder se baarmoeder was, was haar liggaamsdele duidelik ontwikkel. Jy stem waarskynlik saam dat sy in werklikheid ’n persoon was, aangesien sy haar lewe as ’n persoon buite die baarmoeder voortgesit het.

Wat was Gianna dan toe sy ’n embrio van vyf weke was, wat net een sentimeter lank was? Haar liggaamsdele was wel nie volledig gevorm nie, maar die grondslag vir haar senustelsel, insluitende haar brein, was klaar gelê. Sy het ’n hart gehad wat 80 keer per minuut geklop het om bloed deur haar bloedvate te pomp. As Gianna dus ná sewe en ’n half maande in die baarmoeder ’n persoon was, is dit dan nie logies om tot die slotsom te kom dat sy op vyf weke ’n persoon was nie—al was sy nie volledig ontwikkel nie?

Die wonderwerk van bevrugting

Die ontwikkeling van al die dele van ’n embrio begin by bevrugting, wanneer die ovum, of eiersel, van die vrou bevrug word deur ’n spermsel van die man. Nuwe vooruitgang in tegnologie stel wetenskaplikes in staat om die wonderlike veranderinge waar te neem wat in die nukleus van hierdie eensellige bevrugte eier plaasvind. Die molekules waaruit die DNS (deoksiribonukleïensuur) van die vader en die moeder bestaan, smelt saam om ’n splinternuwe menselewe te skep.

Hierdie oorspronklike enkele sel begin die waarlik wonderbaarlike proses om ’n volledig gevormde mens te bou. Die plan vir hierdie “bouprojek” word uiteengesit deur ons gene, wat segmente van die DNS is. Dít beheer feitlik alles omtrent ons. Dit bepaal ons lengte, gelaatstrekke, oog- en haarkleur en duisende ander kenmerke.

Daarna, wanneer hierdie oorspronklike sel verdeel, word die volledige genetiese “bloudruk” na elke nuwe sel oorgedra. Dit is verstommend dat elkeen van hierdie selle geprogrammeer is om te ontwikkel in watter soort sel ook al nodig is. Dit sluit hartweefsel in, asook breinselle, been, vel en selfs deursigtige weefsel vir ons oë. Dit is te verstane dat die aanvanklike programmering in die oorspronklike sel vir die ontwikkeling van ’n unieke nuwe persoon dikwels “’n wonderwerk” genoem word.

“Die mens is al op die eensellige stadium volledig geprogrammeer vir die groei en ontwikkeling wat tydens sy of haar hele lewe sal plaasvind”, het dr. David Fu-Chi Mark, ’n beroemde molekulêre bioloog, gesê. Hy het tot die slotsom gekom: “Daar kan geen twyfel meer wees nie dat elke mens reg van die begin van sy of haar lewe by bevrugting heeltemal uniek is.”

’n Persoon in die baarmoeder?

Vanaf die tyd van bevrugting in die baarmoeder is die kind nie net ’n deel van die moeder se weefsel nie, maar ’n afsonderlike persoon. Haar liggaam beskou dit as ’n vreemde voorwerp. Dit sou vinnig verwerp word as dit nie was vir die “beskermde wêreld” wat in die moeder se baarmoeder geskep is nie. Hierdie nuwe menselewe—deur ’n beskermende membraan van die moeder geskei—is ’n persoon met ’n unieke DNS-vingerafdruk.

Party redeneer: Waarom mag ’n dokter dan nie ’n swangerskap beëindig as ’n vrou se liggaam vanself talle bevrugte eiers weens abnormaliteite verwerp nie? Daar is egter ’n groot verskil tussen ’n natuurlike dood en doelbewuste moord. In een Suid-Amerikaanse land sterf 71 uit elke 1 000 kinders binne hulle eerste jaar. Maar sou dit aanvaarbaar wees om ’n kind onder die ouderdom van een dood te maak bloot omdat so baie kindertjies voortydig sterf? Natuurlik nie!

Dit is betekenisvol dat die Bybel die bestaan van ’n menselewe in die baarmoeder beskryf. Die psalmis Dawid het aangaande God geskryf: “U oë het selfs my embrio gesien, en in u boek was al die dele daarvan opgeskrywe” (Psalm 139:16). Dawid sê nie net “’n embrio” nie, maar “MY embrio” wat dus akkuraat toon dat Dawid se lewe by bevrugting, lank voor sy geboorte, begin het. Onder inspirasie van God het Dawid ook geopenbaar dat die ontwikkeling van sy liggaamsdele van bevrugting af volgens ’n plan, of ‘geskrewe’ instruksies, verloop het, wat hom die persoon gemaak het wat hy was.

Let asseblief ook daarop dat die Bybel nie sê dat ’n vrou by bevrugting ’n stukkie weefsel ontvang nie. Dit sê eerder: “’n Man is ontvang!” (Job 3:3). Dit gee ook te kenne dat ’n kind volgens die Bybel reeds van bevrugting af ’n persoon is. Ja, dit is wanneer menselewe begin.

[Voetnoot]

[Prente op bladsy 6, 7]

’n Menslike embrio van vyf weke is nie net ’n stukkie weefsel nie—dit bevat die grondslag vir al die organe van ’n volwasse persoon

(werklike grootte)