Liefde oorwin vooroordeel

“Vir die eerste keer in die geskiedenis het ’n nuwe soort godsdiensgemeenskap sy verskyning gemaak: nie ’n nasie wat sy patriotiese kultus vier nie, maar ’n vrywillige groep waarin sosiale, rasse- en nasionale verskille oorbrug is: mans en vroue wat bloot as individue saamkom voor hulle god.”—A History of Christianity, deur Paul Johnson.

NAMATE die ware Christelike godsdiens regoor die Romeinse Ryk versprei het, het mense iets verbasends gesien—’n internasionale geestelike gesin wat geleer het om in ware vrede en eenheid saam te lewe. Die geheim van hierdie “gesin” se vrede was opregte liefde, wat nie bloot op sentiment gebaseer was nie, maar op die beginsels wat God mense leer.

Hierdie beginsels is beliggaam in Jesus Christus, wat self die skyf van haat en skerp vooroordeel was (1 Petrus 2:21-23). In die eerste plek was hy van Galilea, en die Joodse godsdiensleiers in Jerusalem het neergesien op Galileërs—wat oor die algemeen boere en vissermanne was (Johannes 7:45-52). Jesus was ook ’n uitstekende onderrigter, en die gewone mense was vir hom lief en het hom gerespekteer. Om hierdie rede het die godsdiensleiers so afgunstig op hom geraak dat hulle leuens oor hom versprei het en selfs planne beraam het om hom dood te maak!—Markus 15:9, 10; Johannes 9:16, 22; 11:45-53.

Nogtans het Jesus nie “kwaad vir kwaad vergeld” nie (Romeine 12:17). Byvoorbeeld, toe individuele Fariseërs—lede van ’n Joodse sekte wat Jesus teëgestaan het—hom opreg met vrae genader het, het hy hulle vriendelik geantwoord (Johannes 3:1-21). Jesus het selfs saam met Fariseërs geëet, ook saam met een wat in sekere mate bevooroordeeld teenoor hom was. Hoe so? In daardie dae was dit gebruiklik om ’n gas se voete te was; die Fariseër het egter nie hierdie hoflikheid teenoor Jesus betoon nie. Het Jesus aanstoot geneem? Nee. Inteendeel, hy het die aand gebruik om ’n pragtige les oor medelye en vergifnis te leer.—Lukas 7:36-50; 11:37.

Jesus was lief vir dié wat verag is

Een van Jesus se bekendste gelykenisse is dié van die barmhartige Samaritaan, waarin ’n Samaritaanse man op eie koste voorsien het in die behoeftes van ’n Jood wat aangerand en beroof is (Lukas 10:30-37). Waarom was die Samaritaan se daad so eerbaar? In die werklike lewe het Jode en Samaritane mekaar verag. Trouens, vir Jode was die woord “Samaritaan” dikwels ’n term van minagting—een wat selfs vir Jesus gebruik is (Johannes 8:48). Teen hierdie agtergrond kon Jesus nouliks ’n kragtiger illustrasie van onpartydige naasteliefde gebruik het.

Jesus het die daad by die woord gevoeg en het ’n Samaritaanse melaatse genees (Lukas 17:11-19). Verder het hy ander Samaritane wat waardering getoon het, onderrig en selfs ’n lang gesprek met ’n Samaritaanse vrou gevoer—’n noemenswaardige gebeurtenis (Johannes 4:7-30, 39-42). Hoe so? Streng Joodse rabbi’s sou nie in die openbaar met enige vrou praat nie—nie eers ’n naverwant nie—wat nog te sê ’n Samaritaanse vrou!

Hoe beskou God egter iemand wat bevooroordeeld is, maar hard probeer om dit uit sy hart te verwyder? Weer eens gee die Bybel ons vertroostende insig in hierdie saak.

God is geduldig met ons

In die eerste eeu was baie Joodse Christene aanvanklik beïnvloed deur jare lange vooroordeel teen nie-Jode, van wie ’n groot getal gelowiges geword het. Wat het Jehovah God gedoen omtrent hierdie potensieel verdelende probleem? Hy het die Christengemeente geduldig geleer (Handelinge 15:1-5). Hierdie geduld het goeie vrugte afgewerp, aangesien “sosiale, rasse- en nasionale verskille oorbrug is”, soos aan die begin van hierdie artikel genoem is. Gevolglik “is die gemeentes . . . voortdurend standvastig gemaak in die geloof en het hulle van dag tot dag in getal bly toeneem”.—Handelinge 16:5.

Wat is die les? Moenie tou opgooi nie, maar hou aan om op God te vertrou, wat mildelik wysheid en sedelike krag gee aan diegene wat “aanhou om in geloof te vra” (Jakobus 1:5, 6). Onthou jy Jennifer, Timothy, John en Olga wat in die eerste artikel van hierdie reeks gemeld is? Teen die tyd dat Jennifer hoërskool toe is, het sy geestelik gegroei en geleer om rassistiese beledigings en aanmerkings oor haar lengte te ignoreer. Kort daarna, toe ’n ander meisie die teiken van beledigings deur klasmaats geword het, het Jennifer vir haar opgekom en haar vertroos.

Wat het Timothy gehelp om kalm te bly wanneer die ander kinders hom met rassistiese aanmerkings uitgetart het? Hy sê: “Ek was besorg oor die oneer wat ek Jehovah God se naam sou aandoen. Ek het my ook heeltyd daaraan herinner dat ons moet ‘aanhou om die kwaad met die goeie te oorwin’ en nie moet toelaat dat die kwaad ons oorwin nie.”—Romeine 12:21.

John het sy vooroordeel teenoor sy Hausa-klasmaat oorkom. “As ’n tiener”, vertel hy, “het ek ’n paar Hausa-leerders ontmoet met wie ek vriende geword het. Ek het saam met een van hulle aan ’n projek gewerk, en ons het baie goed oor die weg gekom. Nou probeer ek mense as individue beskou en nie as lede van ’n sekere ras of stam nie.”

Olga en haar sendelingmaat het nie teruggedeins toe haatdraende teenstanders hulle vervolg het nie, maar het standvastig gebly, vol vertroue dat party mense die Bybel se boodskap sou waardeer. Baie het. “Sowat vyftig jaar later”, sê Olga, “het ’n man na my toe gekom en my ’n pragtige sakkie gegee. Binne-in was daar klippies waarop Christelike eienskappe soos goedheid, goedhartigheid, liefde en vrede gegraveer was. Hy het toe vir my gesê dat hy een van die seuns was wat my destyds met klippe gegooi het en dat hy nou my Christenbroer is. Saam met die sakkie klippe het hy en sy vrou ook vir my vier-en-twintig wit rose gegee.”

Wanneer vooroordeel en diskriminasie iets van die verlede sal wees!

Binnekort sal vooroordeel en diskriminasie tot ’n einde kom. Hoe so? In die eerste plek sal die enigste Heerser oor die aarde juis die een wees wat getoon het dat hy “nie [sal] oordeel net volgens wat sy oë sien nie”—Jesus Christus (Jesaja 11:1-5). En dan sal Jesus se aardse onderdane sy gesindheid volmaak weerspieël, want almal sal deur hom en sy Vader, Jehovah God, geleer wees.—Jesaja 11:9.

Hierdie geestelike onderrigting wat God se knegte op lewe in ’n splinternuwe stelsel van dinge voorberei, is nou goed op dreef. Maak gerus gebruik van hierdie gratis opvoedkundige program deur jou eie Bybelstudie te kry.a Ja, God is nie partydig nie; dit is sy wil dat alle soorte mense “gered moet word en tot juiste kennis van die waarheid moet kom”.—1 Timoteus 2:3, 4. 

[Voetnoot]

[Lokteks op bladsy 8]

Binnekort sal vooroordeel en diskriminasie die mensdom nie meer teister nie

[Venster/Prent op bladsy 8, 9]

GODDELIKE BEGINSELS VIR DIE DAAGLIKSE LEWE

◼ “Moet niemand kwaad vir kwaad vergeld nie. . . . Hou aan om die kwaad met die goeie te oorwin” (Romeine 12:17-21). Wat is die punt? Laat die slegte in ander die goeie in jou na vore bring. “Hulle het my sonder oorsaak gehaat”, het Jesus Christus gesê. Nogtans het hy mense nie in gelyke munt terugbetaal nie.—Johannes 15:25.

◼ “Laat ons nie egotisties word . . . en afgunstig op mekaar wees nie” (Galasiërs 5:26). Afguns en ongepaste trots is geestelik skadelik en lei dikwels tot haat en vooroordeel.—Markus 7:20-23.

◼ “Alles wat julle dan wil hê dat die mense aan julle moet doen, moet julle ook net so aan hulle doen” (Matteus 7:12). Vra jou af: ‘Hoe wil ek graag behandel word?’ Behandel ander op dieselfde manier, ongeag hulle ouderdom, velkleur, taal of kultuur.

◼ “Aanvaar mekaar dan, soos Christus julle ook aanvaar het” (Romeine 15:7, Nuwe Afrikaanse Bybelvertaling). Probeer jy mense uit verskeie agtergronde en kulture leer ken, veral as hulle medeknegte van God is?—2 Korintiërs 6:11.

◼ “As my eie vader en my eie moeder my sou verlaat, sal Jehovah my opneem” (Psalm 27:10). Ongeag hoe ander jou dalk behandel, God sal jou nooit verlaat as jy aan hom lojaal bly nie.

[Prent op bladsy 7]

’n Barmhartige Samaritaan help ’n Jood wat beroof is