Getroue ouers wat saamwerk

◼ Die temperatuur op die Suid-Afrikaanse Hoëveld, of binnelandse plato, is naby vriespunt. Vanuit my warm kantoor op die tweede verdieping kyk ek angstig toe terwyl ’n blaarlose boom in die huilende winterwind heen en weer swaai. Onder in ’n mik van die boom, is ’n rooiborsduifie besig om ’n paar drie dae oue kuikens warm te hou.

Voordat die eerste eiers gelê is, het die duif en sy maat saamgewerk om die nes te bou—die mannetjie het die takkies gebring en die wyfie het die nessie gebou. Hulle het hulle goed van hulle taak gekwyt, want die sterk winterwind kon nie die nes, wat nou al die tuiste van twee broeisels was, afwaai nie. Die wyfie het snags op die eiers gesit; die mannetjie, gedurende die dag. Ná sowat twee weke het die eiers uitgebroei. Binne nog twee weke sal die neskuikens groot en ook sterk genoeg wees om te vlieg.

Luister! Kan jy die aangename gekoer hoor? Dit klink asof die duif saggies lag. Met ’n krop vol kos vir haar honger kuikens, maak die rooiborsduifwyfie haar aankoms op ’n nabygeleë tak bekend, gereed om haar maat af te los. Selfs nadat die kuikens die nes verlaat het, sal albei ouers aanhou om hulle te voer totdat hulle vir hulleself kan sorg.

Ek verwonder my dikwels oor die samewerking en tere sorg van hierdie voëls, wie se instinkte sonder uitsondering van een geslag na die volgende oorgedra word. Hierdie feite laat ’n mens dink aan die woorde van Psalm 86:8: “Daar is niemand soos u . . . nie, o Jehovah, ook is daar niks soos u werke nie.”

In sy geskrewe Woord, die Heilige Bybel, het Jehovah God aan mense-ouers leiding voorsien wat so betroubaar is soos die instinkte wat hy aan duiwe gegee het. Die Bybel spoor moeders byvoorbeeld aan “om hulle kinders lief te hê” (Titus 2:4). Aan vaders sê dit: “Moenie julle kinders irriteer nie, maar hou aan om hulle in die dissipline en verstandsregulering van Jehovah op te voed” (Efesiërs 6:4; 1 Timoteus 5:8). Een ding is seker, ouers wat dit doen, is waarlik kosbaar in God se oë.