Die Bybel se beskouing
Sal slegte mense in die hel brand?
GERTRUDE, ’n Pinksterleraar, het onwrikbaar gebly by haar oortuiging dat daar ’n brandende hel is. Dat enigiemand die bestaan van so ’n plek in twyfel kon trek, het teen haar sin van geregtigheid ingedruis. Sy het geredeneer dat allerhande gruwelike misdade ongestraf sou bly as daar nie ’n helse vuur was nie. Gertrude het vasbeslote by haar standpunt gebly. Sy het gesê: “Ek dink nie dat ek God sou wou aanbid as daar nie ’n helse vuur vir die goddeloses was nie.”
Sal slegte mense in die hel brand, soos baie godsdienste leer? Indien nie, watter straf sal hulle ontvang?
Die eerste voltrekking van goddelike straf
Volgens die Bybel het God die eerste mensepaar volmaak geskep (Genesis 1:27; Deuteronomium 32:4). Hy het hulle in ’n paradysagtige tuin geplaas en hulle die geleentheid gegee om vir ewig te lewe. Maar die eerste mense, Adam en Eva, is een beperking opgelê. God het hulle gewaarsku: “Van al die bome van die tuin mag jy tot versadiging toe eet. Maar wat die boom van die kennis van goed en kwaad betref, daarvan mag jy nie eet nie, want die dag as jy daarvan eet, sal jy sekerlik sterf.”—Genesis 2:16, 17.
Ongelukkig het ons eerste ouers nie daardie maklike toets van lojaliteit en gehoorsaamheid geslaag nie. Die Skepper moes hulle die doodsvonnis oplê. “In die sweet van jou aangesig sal jy brood eet totdat jy na die grond terugkeer, want daaruit is jy geneem. Want stof is jy en tot stof sal jy terugkeer.”—Genesis 3:19.
As Adam en Eva die gevaar geloop het om in die hel te brand, sou God hulle dan nie teen so ’n straf gewaarsku het nie? Die feit is dat hy geen melding gemaak het van lyding ná die dood nie. Hoe kon hulle ly? Hulle het nie ’n onsterflike siel gehad wat ná die dood sou voortleef nie. Die Bybel stel hierdie punt baie duidelik: “Die siel wat sondig—dié sal sterf.”—Esegiël 18:4.a
As die Lewegewer weet ons Skepper alles omtrent die lewe en die dood. Hy sê vir ons in sy Woord: “Die dooies . . . is bewus van hoegenaamd niks” (Prediker 9:5). Dit is waarom Adam en Eva nie ná hulle dood in ’n brandende hel kon ly nie. Hulle het eenvoudig na die stof teruggekeer en opgehou bestaan. Hulle was “bewus van hoegenaamd niks”.
Kan ons ná die dood ly?
Die Bybel sê in Romeine 5:12: “Deur een mens [het] die sonde in die wêreld ingekom . . . en die dood deur die sonde en die dood [het] só tot alle mense deurgedring.” Is dit dan redelik om te glo dat mense vir hulle sondes in ’n helse vuur brand, terwyl Adam, die een wat die dood oor die hele mensdom gebring het, ná sy dood bloot tot stof teruggekeer het?—1 Korintiërs 15:22.
Ons is almal onder dieselfde wet as Adam. “Die loon wat die sonde betaal, is die dood.” Wat meer is, wanneer ’n persoon sterf, is hy “van sy sonde vrygespreek” (Romeine 6:7, 23). As goeie sowel as slegte mense sterf en niemand ná die dood ly nie, waar is God se geregtigheid dan?
God se geregtigheid
God se voorneme vir die gehoorsame mensdom het nie verander sedert hy die eerste mensepaar geskep het en hulle die opdrag gegee het om kinders te hê en na die aarde om te sien nie (Genesis 1:28). Dit is duidelik dat dit nog steeds sy voorneme is, aangesien hy later gesê het: “Die regverdiges sal die aarde besit, en hulle sal vir ewig daarop woon.”—Psalm 37:29.
Let op dat die regverdiges op hierdie aarde sal woon. Hulle sal ’n lewe van volmaakte gesondheid en geluk geniet. God se oorspronklike voorneme dat die aarde met regverdige mense gevul moet word, sal “beslis sukses behaal”. Dít sal gebeur wanneer hy hierdie teenswoordige goddelose stelsel van dinge met ’n nuwe wêreld vervang.—Jesaja 55:11; Daniël 2:44; Openbaring 21:4.
Miljarde afgestorwenes wat nie God se vereistes geken het nie, sal by ’n opstanding baat vind en onderrigting vir lewe in God se nuwe wêreld ontvang (Jesaja 11:9; Johannes 5:28, 29). Aan die ander kant, sal enigiemand wat weier om volgens God se wette te lewe, met “die tweede dood” gestraf word. Dit beteken dat hulle nooit weer sal opstaan nie.—Openbaring 21:8; Jeremia 51:57.
Dit is duidelik dat Jehovah, as ’n God van liefde, mense nie in ’n helse vuur sal folter nie (1 Johannes 4:8). Hy sal ook nie goddeloosheid vir ewig duld nie. Daarom verseker Psalm 145:20 ons: “Jehovah bewaar almal wat hom liefhet, maar al die goddeloses sal hy verdelg.” Is dit nie liefdevol en regverdig nie?
[Voetnoot]
a In die Bybel beteken “siel” die hele mens—nie iets wat apart is van die liggaam nie. Genesis 2:7 sê: “Jehovah God het die mens uit stof van die aarde begin vorm en in sy neusgate die asem van die lewe geblaas, en die mens het ’n lewende siel geword.” Adam is nie ’n siel gegee wat apart van sy liggaam was nie. Adam was eerder self ’n lewende siel.
HET JY AL GEWONDER?
◼ Het ons ’n onsterflike siel?—Esegiël 18:4.
◼ Wat is die toestand van die dooies?—Prediker 9:5.
◼ Hoe sal God die goddeloses straf?—Psalm 145:20.
[Lokteks op bladsy 11]
“Die dooies . . . is bewus van hoegenaamd niks”.—Prediker 9:5
[Foto-erkenning op bladsy 10]
Foto: www.comstock.com