Het jy al ooit gewonder?

Glo jy dat die mens ’n onsterflike siel het wat ná die dood van die liggaam voortleef? Miljoene, dalk miljarde, glo dat die mens ’n siel het wat by sy dood na ’n ander wêreld of bestaansvlak gaan of wat as ’n ander wese gereïnkarneer word. Wat sê die Bybel oor die siel? Jy sal die volgende vrae interessant en insiggewend vind. Om die antwoorde te vind, stel ons voor dat jy die teksverwysings naslaan of op bladsy 21 kyk.

1. Is Adam in die hemel of op die aarde geskep?—Genesis 1:26-28.

2. Is Adam as sterflik of onsterflik geskep?—Genesis 2:15-17.

3. Sou Adam gesterf het as hy nie ongehoorsaam was en gesondig het nie?—Romeine 6:23.

4. Het Adam se handelswyse bewys dat hy sterflik of onsterflik was?—Genesis 3:19; 5:5.

5. Het Adam deur sy sonde ’n aardse tuiste of ’n hemelse een verloor?—Genesis 1:26-28.

6. As Jesus gekom het om dít te herstel wat deur Adam se sondeval verloor is, wat sal herstel word?—Psalm 37:29; Romeine 5:18, 19; Openbaring 21:1-4.

7. Het Adam uit twee afsonderlike dele, die siel en die liggaam, bestaan?—Genesis 2:7; 1 Korinthiërs 15:45.

8. As jy glo dat Adam ’n siel en ’n liggaam gehad het, watter deel het gesondig, die siel of die liggaam?—Psalm 51:3-6.

9. As jy antwoord: “Die siel”, waarom moet die liggaam ly?

10. As jy antwoord: “Die liggaam”, waarom moet die siel gered word?

11. As die mens in die hemel kom deur te sterf, bewys dit nie dat sonde en die dood ’n seën en nie ’n vloek is soos die Bybel sê nie?—Romeine 5:12; 6:21-23.

12. Watter straf is Adam vir sy sonde opgelê—die dood of ’n voortbestaan elders?—Genesis 2:16, 17; 3:19.

13. Was daar een straf vir die liggaam en ’n ander een vir die siel?—Prediker 9:5, 10; Esegiël 18:4.

14. Het God enigsins aan ewige foltering in die helse vuur gedink?—Jeremia 7:31.

15. Wat is volgens Paulus die loon van die sonde?—Romeine 6:23.

16. Maak Paulus melding van ewige foltering in die helse vuur?—Romeine 6:7.

17. As die helse vuur werklik bestaan, waarom sou ’n mens tot in alle ewigheid moet ly om vir net ’n kort leeftyd van sonde te betaal? Is God minder regverdig as die mens?—Romeine 9:14.

18. Het die getroue manne van die ou tyd geglo dat hulle ’n siel het wat óf na die hemel óf na ’n brandende hel sou gaan?—Genesis 37:35; Psalm 89:49; Handelinge 2:34.

19. Wat is die ware hoop vir die dooies?—Johannes 5:28, 29; 11:23-26; Handelinge 24:15.

20. As daar nie ’n onsterflike siel is nie, hoe kan sommige (144 000) saam met Christus in die hemele heers?—1 Korinthiërs 15:42-49, 53, 54; Openbaring 14:1, 4; 20:4.a

Het jy al ooit gewonder? Die Bybel se antwoorde

Die volgende is ’n paar van die teksverwysings wat saam met die vrae op bladsy 13 verskyn:

1. “God het die mens geskape na sy beeld; . . . man en vrou het Hy hulle geskape. . . . God het vir hulle gesê: Wees vrugbaar en vermeerder en vul die aarde, onderwerp dit.”—Genesis 1:27, 28.

2. “Van al die bome van die tuin mag jy vry eet, maar van die boom van die kennis van goed en kwaad, daarvan mag jy nie eet nie; want die dag as jy daarvan eet, sal jy sekerlik sterwe.”—Genesis 2:16, 17.

3. “Die loon van die sonde is die dood, maar die genadegawe van God is die ewige lewe in Christus Jesus, onse Here.”—Romeine 6:23.

4. “In die sweet van jou aangesig sal jy brood eet totdat jy terugkeer na die aarde, want daaruit is jy geneem. Want stof is jy, en tot stof sal jy terugkeer.”—Genesis 3:19.

5. Sien Nr. 1.

6. “Kyk, die tabernakel van God is by die mense . . . En God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.”—Openbaring 21:3, 4.

7. “Die HERE God het die mens geformeer uit die stof van die aarde en in sy neus die asem van die lewe geblaas. So het dan die mens ’n lewende siel geword” (Genesis 2:7). Die woord “siel” is die vertaling vir die Hebreeuse nêfêsj, “dit wat asemhaal”. “Die eerste mens, Adam, het ’n lewende siel geword.” Let wel, “geword”, nie “ontvang” nie.—1 Korinthiërs 15:45.

8. “My sonde is altyddeur voor my. Teen U alleen het ek gesondig en gedoen wat verkeerd is in u oë.”—Psalm 51:5, 6.

9, 10. Geen teksverwysings is nodig nie.

11. “Soos deur een mens die sonde in die wêreld ingekom het en deur die sonde die dood, en so die dood tot alle mense deurgedring het, omdat almal gesondig het.”—Romeine 5:12.

12. Sien Nr. 4.

13. “Die lewendes weet dat hulle moet sterwe, maar die dooies weet glad niks nie . . . Daar is geen werk of oorleg of kennis of wysheid in die doderyk waar jy heengaan nie” (Prediker 9:5, 10). “Soos die siel van die vader, so die siel van die seun—hulle is myne; die siel wat sondig, dié moet sterwe.”—Esegiël 18:4.

14. “Hulle het die hoogtes van Tofet gebou . . . om hulle seuns en hulle dogters met vuur te verbrand—iets wat Ek nie beveel het nie en in my hart nie opgekom het nie.”—Jeremia 7:31.

15. Sien Nr. 3.

16. “Hy wat gesterf het, is van [sy] sonde vrygespreek.”—Romeine 6:7, NW.

17. “Wat sal ons dan sê? Is daar miskien onreg by God? Nee, stellig nie!”—Romeine 9:14.

18. “Want Dawid het nie in die hemele opgevaar nie.”—Handelinge 2:34.

19. ‘Ek het ’n hoop op God, ’n hoop wat hulle self ook verwag, dat daar ’n opstanding sal wees van die dode, regverdiges sowel as onregverdiges.’—Handelinge 24:15.

20. “Hierdie verganklike moet met onverganklikheid beklee word, en hierdie sterflike moet met onsterflikheid beklee word.” As daar met onsterflikheid “beklee word”, dan is dit nie inherent nie (1 Korinthiërs 15:53). “Ek het gesien, en kyk, die Lam staan op die berg Sion, en saam met hom honderd-vier-en-veertigduisend . . . Dit is hulle wat gekoop is uit die mense as eerstelinge vir God en die Lam.”—Openbaring 14:1, 4.

[Voetnoot]