Wat gebeur werklik by die dood?

“Alle siele is onsterflik, selfs dié van die goddeloses . . . Omdat hulle met die eindelose wraak van ’n onblusbare vuur gestraf word en nie sterf nie, is dit vir hulle onmoontlik om hulle ellende tot [’n einde] te laat kom.”—Klemens van Aleksandrië, ’n skrywer van die tweede en derde eeu G.J.

SOOS Klemens, aanvaar voorstanders van die leerstelling dat die hel ’n plek van foltering is, dat die mensesiel onsterflik is. Staaf die Bybel hierdie leerstelling? Kyk wat God se Woord sê in antwoord op die volgende vrae.

Het die eerste mens, Adam, ’n onsterflike siel gehad? Die Ou Afrikaanse Bybelvertaling, ’n Protestantse vertaling, sê oor die skepping van Adam: “Die HERE God het die mens geformeer uit die stof van die aarde en in sy neus die asem van die lewe geblaas. So het dan die mens ’n lewende siel geword” (Genesis 2:7). Let daarop dat hierdie teks nie sê dat Adam ’n siel gegee is nie.

Wat het uiteindelik met Adam gebeur nadat hy gesondig het? Die straf wat God uitgespreek het, was nie ewige foltering in die hel nie. Inteendeel, die Katolieke New American Bible vertaal God se uitspraak as volg: “In die sweet van jou aangesig sal jy brood kry om te eet, totdat jy na die grond terugkeer, waaruit jy geneem is; want jy is stof, en tot stof sal jy terugkeer.” (Ons kursiveer; Genesis 3:19.) God se uitspraak bevat geen aanduiding dat enige deel van Adam ná sy dood voortgeleef het nie. Toe Adam gesterf het, het die siel, Adam, gesterf.

Het enige mens ’n onsterflike siel? God het vir die profeet Esegiël gesê: “Die siel wat sondig, dié moet sterwe” (Esegiël 18:4, OAB). Die apostel Paulus het geskryf: “Deur een persoon [Adam] het sonde in die wêreld ingekom, en deur die sonde die dood, en so het die dood tot almal deurgedring, omdat almal gesondig het” (Romeine 5:12, NAB). As alle mense sondig, is die logiese slotsom dus dat alle siele sterf.

Weet of voel ’n dooie siel enigiets? God se Woord sê: “Die lewendes weet dat hulle moet sterf, maar die dooies weet niks meer nie” (Prediker 9:5, NAB). Die Bybel beskryf wat met ’n mens gebeur wanneer hy sterf en sê: “Hy keer terug na sy aarde toe; op daardie dag vergaan sy gedagtes” (Psalm 146:4, King James Version). Hoe kan die dooies enige foltering in die hel voel as hulle ‘niks meer weet nie’ en as hulle ‘gedagtes vergaan’?

Jesus Christus het nie die dood met die een of ander bewuste toestand vergelyk nie, maar met slaap (Johannes 11:11-14).a Maar party maak dalk beswaar en sê dat Jesus wel geleer het dat die hel warm is en dat sondaars in die helse vuur gewerp sou word. Kom ons kyk wat Jesus werklik oor die hel gesê het.

[Voetnoot]