Slange in aanbidding—In die hede en die verlede
DIE eertydse Egiptenare het slange aanbid, en so ook die Minoërs, vroeë inwoners van Kreta. Sommige eertydse Israeliete het offerandes aan ’n koperslang gebring. Ander van dieselfde nasie het reukwerk begin brand voor beelde van ‘kruipende diere’.—Esegiël 8:10-12; 2 Konings 18:4.
Volke van eertydse Mexiko het ook die aanbidding van slanggode beoefen. Die hoofgod van die Majas—Itzamná—is soms deur ’n slang afgebeeld. Quetzalcoatl, die “gepluimde slang”, was die Tolteekse god van geleerdheid, kultuur en filosofie. Ook die Asteke het hom as die god van geleerdheid beskou en het hom selfs as die skepper van die mens vereer. Aangaande hierdie god se baie rolle en talente sê die tydskrif Arqueología Mexicana (Mexikaanse Argeologie): “Die gepluimde slang het veelvuldige betekenisse gekry, dalk meer as enige ander godheid.”
Die inwoners van Meso-Amerika het baie eeue lank die gepluimde slang aanbid. Vandag bestaan geloof in dié god voort onder die Cora- en Huichol-volk van Mexiko. Op sekere feesdae word danse uitgevoer waarin die deelnemers hulle met vere versier en die bewegings van ’n slang naboots. Die Quiche voer ’n vrugbaarheidsritus uit waarin hulle dans terwyl hulle lewende slange gebruik. Die Chorti, ’n Majagroep in Guatemala, vereer ’n gepluimde slang wat hulle met sekere Katolieke heiliges assosieer.
Die vraag is: Hoe beskou die Skepper van mense en diere—insluitende slange—die aanbidding van slanggode?
God se beskouing van slangaanbidding
Jehovah God het hierdie gebod aan die eertydse nasie Israel gegee: “Jy mag vir jou geen gesnede beeld of ’n afbeelding van enigiets maak wat bo in die hemel is of wat onder op die aarde is of wat in die waters onder die aarde is nie. Jy mag jou nie voor hulle neerbuig of laat oorhaal om hulle te dien nie.”—Eksodus 20:4, 5.
Jehovah het sy volk verbied om beelde van diere, soos slange, te aanbid. Behoort dit dus nie duidelik te wees dat diegene wat sy guns wil hê, slangaanbidding moet vermy nie? Waarom verwerp God afgodediens, insluitende slangaanbidding? Die rede is eenvoudig: Hy gee lewe aan mense, aan slange en aan alle ander lewende dinge. Hulle is almal die werke van sy hand, en daarom kom aanbidding hóm toe, nie die dinge wat hy geskep het nie.
Ter toeligting: Gestel ’n argitek bou huise en gee dit aan gesinne om te bewoon en te geniet. Sê nou daardie gesinne bedank en loof die huise in plaas van die argitek? Sou dit nie dwaas sowel as ’n belediging vir die vrygewige argitek wees nie? Die aanbidding van diere in plaas van hulle Skepper is eweneens ’n belediging vir God.
Dit is duidelik dat diegene wat God se goedkeuring wil wegdra, ag moet slaan op die waarskuwing van die apostel Johannes: “Kindertjies, bewaar julle van afgode.”—1 Johannes 5:21.
[Venster/Prent op bladsy 23]
AANBIDDING MET ’N SLANG IN DIE HAND
● In die suidoostelike deel van die Verenigde State is daar ’n paar charismatiese kerke wat lewende giftige slange hanteer. Party mense hang een van hierdie giftige diere om hulle skouers terwyl ander etlike slange tegelyk optel. Wanneer die slange opgetel en hanteer word, kan hulle skrik en die hanteerders byt. Deur die jare heen het sommige aanbidders wat slange hanteer, aan slangbyte gesterf.
Mense wat slange hanteer, doen dit na aanleiding van wat in Markus 16:17, 18 staan. Hierdie verse sluit die woorde in: “Met hulle hande sal hulle slange optel.” Die Ou Afrikaanse Bybelvertaling en ander ouer vertalings gee hierdie verse weer asof dit deel was van die oorspronklike teks. Soos ander moderner vertalings, sê die Nuwe Afrikaanse Bybelvertaling dat hierdie verse in sommige manuskripte bygevoeg is.
Die leringe van die Bybel ondersteun nie die gedagte dat die hantering van slange aanneemlik is in ware aanbidding nie. Die Bybel sê: “God is liefde” (1 Johannes 4:8). Jy sal waarskynlik saamstem dat ons liefdevolle Skepper nie sal vereis dat sy ware aanbidders gevaarlike ritusse moet uitvoer om hom te behaag nie. Sy Seun, Jesus, het die uitnodiging gerig: “Kom na my toe, almal wat swoeg en swaar belaai is, en ek sal julle verkwik” (Matteus 11:28, 29). Ja, Jehovah en Jesus wil nie hê dat hulle volgelinge slange hanteer en hulle sodoende aan pyn, siekte en selfs die dood blootstel nie!
[Erkenning]
REUTERS/Tami Chappell
[Prent op bladsy 22]
Kop van ’n gepluimde slang teen ’n Asteekse tempelmuur
[Prent op bladsy 22]
Vlakreliëf van Quetzalcoatl, die gepluimde slanggod van die Tolteke
[Foto-erkennings op bladsy 22]
Bo: REUTERS/Tami Chappell; onder: © Leonardo Díaz Romero/age fotostock