Wees tevrede met jou velkleur
● Party mense in Afrika, Suid-Asië, die Karibiese Eilande en die Midde-Ooste assosieer ’n ligte velkleur met voorspoed en meen dat dit baie modieus is. Gevolglik gebruik baie mans en vroue in hierdie plekke produkte om hulle velkleur ligter te maak—maar soms ten koste van hulle gesondheid.
Party rome wat die vel ligter maak, bevat hidrokinoon, ’n bleikmiddel wat die vervaardiging van melanien vertraag en sodoende die vel se natuurlike beskerming teen skadelike ultravioletstraling belemmer. Hidrokinoon dring die vel binne en kan bindweefsel onherstelbaar beskadig. Een van die gevolge is voortydige veroudering. Die chemikalie kan ook kanker veroorsaak. Ander rome bevat kwik, wat ook ’n gifstof is.
Verder kan die langdurige gebruik van sulke produkte ontsierende uitslae en onooglike vlekke veroorsaak, sowel as ’n vel wat so swak is dat ’n sny daarin nie toegewerk kan word nie. En as die chemikalieë in party van hierdie middels in die bloedstroom opgeneem word, kan dit die lewer, die niere of die brein beskadig—en selfs orgaanversaking veroorsaak.
Ironies genoeg, terwyl sommige mense met donker velle hulle gelaatskleur ligter wil maak, doen baie mense met ligte velle groot moeite om bruin te brand. Matige blootstelling aan die son kan weliswaar gesond wees. Dit kan byvoorbeeld die vervaardiging van vitamien D moontlik maak. Maar langdurige blootstelling, veral wanneer die son hoog sit, kan skadelik wees. Trouens, ’n bruingebrande vel is ’n aanduiding dat die vel reeds beskadig is en hom nou teen verdere blootstelling aan skadelike ultravioletstrale probeer beskerm. Maar hierdie beskerming is beperk. ’n Ligte vel wat donkerbruin gebrand is, bied byvoorbeeld ’n sonbeskermingsfaktor van hoogstens vier. Hoewel die gereelde gebruik van sonskermmiddels dalk help, bied dit nie algehele beskerming teen velskade en sekere kankers, waaronder melanoom nie.
Die Wêreldgesondheidsorganisasie beveel dus aan dat “die boodskap dat almal tevrede moet wees met hulle natuurlike velkleur, duideliker na vore moet kom”, wat “’n belangrike stap is om ‘sonslim’ gesindhede te bevorder”. Maar diegene wat werklik wys is, vestig hulle aandag op wat die Bybel “die geheime persoon van die hart” noem, wat, in teenstelling met verouderende vel, met verloop van tyd kan verbeter!—1 Petrus 3:3, 4; Spreuke 16:31.