Stres—’n Ernstige gesondheidsgevaar

“Ek werk bedags en snags lang, ongereelde ure. Ek is dikwels betrokke by ’n operasie by een hospitaal en het dan net ’n paar minute om in druk verkeer by die volgende een te kom.”—Dr. Peter Stuart, Suid-Afrika.

JY WEET waarskynlik hoe dr. Stuart voel, selfs as heeltemal ander situasies tot jou stres aanleiding gee. Wat ook al vir jou stres verantwoordelik is—hetsy dit druk verkeer, gespanne verhoudings by die huis of by die werk of iets anders is—stres is nie iets nuuts vir die mens nie.

Meer as 30 eeue gelede het ’n geharde soldaat openlik erken: “Bewing kom oor my, en siddering bedek my” (Psalm 55:5). Hierdie man het geweet wat stres is. As ’n herderseun het hy te staan gekom voor ’n leeu, ’n beer en ’n intimiderende krygsman wat hom wou doodmaak.—1 Samuel 17:4-10, 23, 24, 34-36, 41-51.

Dit is waar dat stres op sigself nie sleg is nie. Dit kan ons help om voorbereid te wees op ’n uitdaging. In lewensgevaarlike situasies het stres mense al in staat gestel om iets buitengewoons te doen wat hulle nooit gedink het hulle sou kon doen nie. Toe jy ’n belangrike taak moes uitvoer, het stres moontlik ’n skielike toename in adrenalien veroorsaak wat jou in staat gestel het om die taak betyds te voltooi.a

Probleme ontstaan egter wanneer ons heeltyd onder stres gebuk gaan en ons liggaam nie ontspan nie. “Stres”, sê een navorser, “is die grootste bedreiging vir ons gesondheid en welsyn.” As jy voel dat jy breekpunt bereik of as jy wil voorkom dat jy dit bereik, wonder jy dalk: “Is daar enigiets wat ek kan doen om stres te verlig?”

Gelukkig is daar! Almal kan baat vind by die verligting wat talle al gehelp het om die mas op te kom. Hierdie verligting kom uit ’n bron wat jy dalk nie verwag het nie—God se Woord, die Bybel. Hoewel die Bybel nie ’n mediese selfhelpboek is nie, voorsien dit praktiese wysheid wat ons kan help. Dit verduidelik waarom daar nou so baie stres is en identifiseer faktore wat stres veroorsaak of daartoe bydra. Dit bevat ook praktiese wenke wat ons kan help om stres te verminder en te beheer.

[Voetnoot]