Hoe om stres te beheer

Die Bybel praat van “gevaarlike tye, vol stres en probleme”. Jy sal waarskynlik saamstem dat ons nóú in ’n baie stresvolle tyd lewe.—2 Timoteus 3:1, The Amplified Bible.

SOOS jy goed weet, is dit makliker om ’n klein vuurtjie uit te doof as om ’n groot bosbrand te blus. Net so is dit makliker om ’n bietjie stres op ’n slag te beheer as baie stres wat oor ’n tydperk opgebou het. Een mediese dokter sê dat “dit noodsaaklik is om daaglikse stresbeheer ’n prioriteit in ons besige lewens te maak”.a

Die doel van daaglikse stresbeheer is tweevoudig. Eerstens help dit ons om dinge wat stres in die lewe veroorsaak en waaraan iets gedoen kan word, te verminder. En tweedens help dit ons om ons reaksie op stresvolle dinge wat onvermydelik is, te beheer.

Voorsien die Bybel leiding wat ons kan help om stres te hanteer?

Bybelwaarhede is onontbeerlik

Wanneer ons waarhede in die Bybel ons eie maak, stel dit ons in staat om baat te vind by die verkwikkende, onderskragende gedagtes van ons Skepper. God se Woord is ’n bron van waardevolle leiding. Trouens, dit is ’n ontsaglike reservoir vol geestelike waarhede wat stres kan verlig! Dit kan ons help om nie te “sidder of verskrik [te] wees nie” en om daaglikse stres suksesvol te hanteer.—Josua 1:7-9.

Die Bybel help ons op ’n wonderlike manier om stres te verminder deur ons te verseker dat ons hemelse Vader, Jehovah, “baie teer in geneentheid en barmhartig is” (Jakobus 5:11). “Die een ding wat my al baie gehelp het”, verduidelik Patricia, wat as ’n professor by ’n universiteit in Kalifornië gewerk het, “is om na te dink oor God se wil en die wonderlike dinge wat hy vermag.”

Dink aan hoe Jesus Christus destyds sy onderdrukte toehoorders wat baie stres ervaar het, met sy tere woorde en dade verkwik het. “Kom na my toe, almal wat oorwerk en oorlaai is”, het hy hulle versoek, “en ek sal julle rus [d.w.s. geestelike verkwikking] gee.”—Matteus 11:28-30, The New Testament—An Understandable Version; hulle hakies.

Jesus was, net soos hy gesê het, nie hardvogtig nie. Hy het eerder die emosionele en fisiese behoeftes van sy dissipels in ag geneem en selfs gereël dat hulle rus ten spyte van hulle besige roetine in die predikingswerk (Markus 6:30-32). Ons kan vol vertroue wees dat Jesus, wat nou ’n hemelse Koning is, tere empatie met ons het wanneer ons deur stres afgetakel word. Hy ondersteun ons op barmhartige wyse deur “hulp op die regte tyd” te voorsien.—Hebreërs 2:17, 18; 4:16.

Die rol van goeie kommunikasie

Goeie kommunikasie is ’n uiters noodsaaklike hulpmiddel vir doeltreffende stresbeheer. Die Bybel leer: “Planne misluk waar daar geen vertroulike gesprekke is nie, maar in die veelheid van raadgewers kom iets tot stand” (Spreuke 15:22). Baie vind dus dat dit hulle stres grootliks verminder wanneer hulle met hulle huweliksmaat, ’n vriend of ’n kollega praat.

Een vorm van “vertroulike gesprekke” wat baie belangrik, nuttig en altyd tot ons beskikking is, is gebed tot God. As jy gereeld van hierdie voorsiening gebruik maak, kan dit jou help om jou “oor niks [te] kwel nie”. Baie het gevind dat hulle, deur op gebed staat te maak, “die vrede van God wat alle denke te bowe gaan”, kon vind. Soos die Bybel belowe, het dit hierdie mense se ‘harte en verstandelike vermoëns’ beskerm.—Filippense 4:6, 7; Spreuke 14:30.

’n Naslaanwerk oor stres sê dat “mense met ’n ondersteunende vriendekring geneig is om stres beter te verwerk en gewoonlik beter geestesgesondheid geniet as dié wat alles self probeer doen”. Die beste ondersteuningsgroep word gevind onder aanbidders van die ware God, Jehovah. In ooreenstemming met die Bybelse vermaning vergader hulle gereeld en moedig hulle mekaar aan (Hebreërs 10:24, 25). “Soms werk ek lang ure en verkeer ek onder geweldige stres”, het ’n persoon gesê wat hierdie vergaderinge bywoon. “Maar wanneer ek na die vergadering toe gaan, vind ek teen die tyd dat die slotgebed gedoen word dat die stres weg is en dat ek verkwik voel.”

Iets wat nie oor die hoof gesien moet word nie, is die waarde van ’n sin vir humor om stres te hanteer. Prediker 3:4 sê dat daar “’n tyd [is] om te huil en ’n tyd om te lag”. Dit is verkwikkend sowel as gesond om te lag, want soos een dokter verduidelik, “vervaardig die liggaam endorfiene en onderdruk dit die vervaardiging van adrenalien wanneer ons lag”. ’n Vrou het gesê: “In die stresvolste situasies kom my man gewoonlik met die snaaksste goed vorendag, en dit help regtig baie.”

Eienskappe wat stres verminder

Die Bybel spoor ons aan om eienskappe aan te kweek wat stres verminder. Dit sluit “liefde, vreugde, vrede, lankmoedigheid, goedhartigheid, goedheid, geloof, sagmoedigheid [en] selfbeheersing” in, wat die vrug van God se gees genoem word. Daarbenewens spoor die Bybel ons aan om “kwaadwillige bitterheid en toorn en gramskap en geskreeu en smadende taal” te vermy. Dan voeg dit by: “Word goedhartig teenoor mekaar, vol tere medelye, en vergewe mekaar vryelik.”—Galasiërs 5:22, 23; Efesiërs 4:31, 32.

’n Dokter verduidelik hoe nuttig dit is om hierdie Bybelleringe toe te pas, veral in vandag se wêreld. “Wanneer jy ander met respek behandel”, sê hy, “help dit jou baie om stres te verlig.” Die Bybel help ons ook om beskeidenheid aan te kweek, wat beteken dat ons ’n redelike beskouing van ons vermoëns moet hê.—Miga 6:8.

God verwag van ons om nederig te erken dat ons fisiese, verstandelike en emosionele beperkings het en dat ons nie alles kan doen wat ons graag wil doen nie. Al is dit ook hoe moeilik, ons sal dalk moet leer wanneer en hoe om nee te sê vir eise waaraan ons eenvoudig nie kan voldoen nie.

Dit is nie te sê dat jy geen stres sal hê wanneer jy al die Bybelse raad toepas wat hierbo voorsien word nie. Die feit is dat Satan die Duiwel hom veral toespits op diegene wat God aanbid omdat hy wil bewys dat hulle ware aanbidding sal versaak wanneer genoeg druk op hulle uitgeoefen word (Openbaring 12:17). Maar soos ons gesien het, is daar baie maniere waarop God tydige hulp voorsien sodat ons stres kan verminder en dit kan hanteer.b

[Voetnote]

[Venster op bladsy 9]

MANIERE OM STRES TE VERMINDER

● Moenie volmaaktheid van jouself of ander verwag nie.—Prediker 7:16.

● Stel die regte prioriteite.—Filippense 1:10, 11.

● Doen gereeld oefening.—1 Timoteus 4:8.

● Geniet Jehovah se skeppingswerke.—Psalm 92:4, 5.

● Sit gereeld ’n bietjie stil tyd opsy.—Matteus 14:23.

● Ontspan gereeld en kry genoeg slaap.—Prediker 4:6.

[Prent op bladsy 7]

As jy stres wil verminder, is dit noodsaaklik dat jy tyd maak om te kommunikeer

[Prent op bladsy 7]

Godvrugtige eienskappe help om stres te verminder