“Die wonderlikste lewende vliegmasjien op aarde”
DIE albatros is al beskryf as “die wonderlikste lewende vliegmasjien op aarde”, en met goeie rede. Met ’n vlerkspan van drie meter is dit die grootste van alle seevoëls en kan dit ’n vliegsnelheid van meer as 115 kilometer per uur bereik. Die albatros lyk dalk lomp op die grond, maar in die lug is dit eenvoudig asemrowend om te aanskou.
Sowat 15 van die ongeveer 20 erkende albatrosspesies word in die oseaanwaters om Nieu-Seeland gevind. Die enigste vastelandse broeikolonie in die Suidelike Halfrond is Taiaroa Head, aan die punt van die Otago-skiereiland, op Nieu-Seeland se Suid-eiland.
Daar begin die swartvlerkkoningalbatros tussen die ouderdomme van ses en tien jaar broei. Die voëls broei regdeur hulle lewe, wat redelik lank kan wees. Dit is bekend dat van hierdie voëls al heelwat langer as ’n halfeeu gelewe het! Die albatros lê een eier elke twee jaar en bring die jaar tussenin op see deur. Die voël bly gewoonlik lewenslank by een maat.
Die mannetjie- sowel as die wyfiealbatros help om die nes te bou, en hulle begin in September daarmee. Dan, in November, lê die wyfie ’n eier wat tot 500 gram kan weeg. Sowat 80 dae lank het albei ouers ’n aandeel daaraan om op die eier te sit totdat dit vroeg in Februarie uitbroei. Dan maak die ouers beurte om die kuiken, wie se dieet uit ’n uitgebraakte mengsel van vis en inkvis bestaan, op te pas en te voer. Op die ouderdom van ses maande kan die kuiken tot 12 kilogram weeg—aansienlik meer as ’n volwasse albatros!
Ná byna ’n jaar verlaat die ouers Taiaroa Head en bring hulle ’n jaar op see deur voordat hulle terugkeer om die broeiproses te herhaal. In die tussentyd het hulle nakomeling, wat nou maerder en ten volle geveerd is, ná etlike probeerslae geleer om sy vlerke uit te strek en teen die wind op te styg. Sy bestemming? Die oseaan, waar die jong albatros die volgende paar jaar sal woon. As ’n adolessent sal die albatros na Taiaroa Head terugkeer. Terwyl die ouer voëls daar nesmaak en broei, sal die jong albatros sy tyd deurbring deur sy vere te pluis, te speel en sy fyn ontwikkelde vliegvermoëns ten toon te stel.
[Venster op bladsy 25]
’N BESOEK AAN DIE KONINGALBATROSKOLONIE
Ek is van kleins af gefassineer deur verhale oor die albatros, en daarom het ek baie uitgesien na my besoek aan die kolonie van swartvlerkkoningalbatrosse. Dit was ’n winderige dag, en toe ek en my metgesel naby die kolonie kom, het ons die lug bespied in die hoop om ’n lugvertoning te sien, wat die eintlike doel van ons besoek was. Ons is nie teleurgestel nie. Toe die voëls in sig kom, kon ons nie anders as om ons te verwonder oor hierdie welbekende meestervlieërs nie!
By ons aankoms het ons by ’n groep medebesoekers aangesluit vir ’n begeleide toer van een uur. Met behulp van modelle, tentoonstellings en video’s het ons uitgevind dat die swartvlerkkoningalbatros geheel en al op die see kan lewe en selfs op die water kan slaap! Hetsy op die water of in die lug, hierdie fassinerende voël is werklik ’n wonder—nog ’n rede om die een te loof wat “alles geskep” het, Jehovah God!—Openbaring 4:11.
[Prent op bladsy 24]
Albei ouers maak beurte om die kuiken, wat op die ouderdom van ses maande tot 12 kilogram kan weeg, op te pas en te voer
[Prent op bladsy 24, 25]
Taiaroa Head, die tuiste van die swartvlerkkoningalbatros
[Prent op bladsy 24]
Die swartvlerkkoningalbatros kan geheel en al op die see lewe—en kan selfs op die water slaap
[Foto-erkennings op bladsy 23]
Bo: © David Wall/Alamy; onder: © Kim Westerskov/Alamy
[Foto-erkennings op bladsy 25]
Agtergrond: © davidwallphoto.com; boaan bladsy 24: Tui De Roy/Roving Tortoise Photos; onderaan bladsy 24: Courtesy Diarmuid Toman; bladsy 25, albatros in vlug: © Naturfoto-Online/Wolfgang Bittmann