Bybelwaarheid het hulle vrygemaak
JESUS CHRISTUS het vir ’n groep mense gesê: “Julle sal die waarheid ken, en die waarheid sal julle vrymaak” (Johannes 8:32). Soos die volgende voorbeelde toon, sluit hierdie vryheid in dat mense vrygemaak word van die invloed van die demone, wat die leuenaars en bedrieërs agter die okkulte is.—Johannes 8:44.
Die bevrydende krag van Bybelwaarheid kan duidelik in elkeen van die volgende ondervindinge gesien word. Ja, slegs Bybelwaarheid maak mense werklik vry. Neem die tyd om die Bybel self te ondersoek. Jy sal nie teleurgesteld wees nie.
[Venster/Prent op bladsy 8]
Tonele is nageboots
● Susanna was ’n priesteres by ’n tempel in Brasilië. Sy wou haar bonatuurlike kragte gebruik om die behoeftiges te help. Sy het dit ook geniet om “met haar oorlede ma te praat”. Maar later het haar “ma” haar gesmeek om selfmoord te pleeg en saam met haar in die geestewêreld te kom woon. Dit het Susanna baie gekwel en haar nagmerries gegee. Toe het Susanna en haar man die Bybel saam met Jehovah se Getuies begin studeer. Hulle moes hard stry om ‘die Duiwel teë te staan’, maar uiteindelik het hy ‘van hulle af weggevlug’ (Jakobus 4:7). Nou geniet hulle vrede, en Susanna kry nie meer nagmerries nie. “Daar is soveel dinge waarvoor ek Jehovah moet dank”, het sy geskryf, “maar ek is veral dankbaar dat hy ons uit geestelike duisternis gelei het.”
[Venster/Prent op bladsy 8]
● Timothy, wat in Wes-Afrika woon, is doofstom.a Omdat gewone dokters hom nie kon help nie, het hy na geloofsgenesers gegaan, maar tevergeefs. “Hulle bedrog het my hart gebreek”, het hy geskryf. Toe het Timothy die Bybel saam met Jehovah se Getuies gestudeer, wat aan hom verduidelik het dat dit God se voorneme is om alle siektes en gebreke uit die weg te ruim. Timothy het geskryf: “Ek kan nie wag vir die dag in God se nuwe wêreld wanneer ‘die ore van die dowes ontsluit sal word . . . en die tong van die stomme van vreugde sal uitroep nie’” (Jesaja 35:1-6). Intussen gebruik hy ’n draagbare DVD-speler om Bybelwaarhede aan ander gehoorgestremdes bekend te maak en hulle te help om ware vryheid te vind.
[Voetnoot]
a Van die name is verander.
● Evelyn was diep betrokke by die okkulte in Estland. Aangesien Jesus mense genees het, wou sy dieselfde doen. Sy wou veral haar ma help, wat chronies siek was. Daarom het sy, in ’n poging om ernstige siektes te diagnoseer en te behandel, geleer hoe om pendulums te gebruik. Later het sy die Bybel ondersoek. Die gevolg? “Ek het tot die besef gekom dat ek heeltemal mislei was”, het sy gesê. “Ek het dus my spiritistiese lektuur en pendulums verbrand.” Sy leer ander nou van die waarhede in die Bybel wat mense vrymaak.
[Venster/Prent op bladsy 9]
● Mary het grootgeword op een van die eilande van Papoea-Nieu-Guinee, waar mense bang is vir die dooies. Wanneer iemand in haar dorpie gesterf het, het Mary onder iemand anders se bed geslaap omdat sy bang was dat die gees van die oorledene haar sou teister as sy alleen was. Toe leer sy in die Bybel dat die dooies slaap—hulle is in die graf en wag op ’n opstanding tot lewe in die Paradys op aarde (Lukas 23:43; Johannes 11:11-14). Gevolglik is sy nie meer bang vir die dooies nie.
[Venster/Prent op bladsy 9]
● Alicia, wat in ’n Christenhuis in die Verenigde State grootgemaak is, het in okkulte boeke en flieks begin belangstel. Toe het sy ernstig begin nadink oor die Bybelwaarhede wat sy geleer het. Nadat sy besef het dat sy in werklikheid probeer om ‘deel te hê aan die tafel van Jehovah en die tafel van demone’, het sy haar weë verander, en sy het nou ’n skoon gewete voor God.—1 Korintiërs 10:21.