Ons beskou die wêreld
’n Meningspeiling wat die Britse Uitsaaikorporasie onder 13 000 mense in 26 lande gedoen het, dui daarop dat “korrupsie die probleem is waaroor daar die meeste in die wêreld gepraat word”. Maar armoede is as die wêreld se grootste probleem beskou.—BBC NEWS, BRITTANJE.
“Kerke regoor die VSA bring GPS-opsporingstoestelle op hulle beelde van die pasgebore Jesus aan. In onlangse jare was daar ’n landwye toename in diefstalle van [hierdie] beelde.”—THE WEEK, VSA.
“’n Advieskomitee vir die [Amerikaanse] Voedsel- en Medisyneraad beveel aan dat mense met chroniesemoegheidsindroom belet word om bloed te skenk, aangesien daar vermoed word dat ’n retrovirus met die siekte verbind kan word.”—THE WALL STREET JOURNAL, VSA.
Lig maak superkieme dood
’n Nuwe tegnologie, wat van lig met ’n hoë intensiteit gebruik maak om geharde bakterieë in hospitale uit te wis, is by die Universiteit van Strathclyde, Glasgow, Skotland, ontwikkel. Wanneer dit by die vermindering van patogene kom, is hierdie nuwe ontsmettingstegniek baie doeltreffender as om bloot skoon te maak en te ontsmet. Dit “gebruik ’n smal spektrum van die golflengtes van sigbare lig om molekules binne die bakterieë te stimuleer”, verduidelik die mikrobioloog professor John Anderson.
Ontbossing en malaria
Die uitroeiing van tropiese woude word verbind met die feit dat malariagevalle met byna 50 persent toegeneem het. Dit is die bevinding van navorsers wat gegewens van 54 gesondheidsgebiede in Brasilië bestudeer het tesame met satellietbeelde wat ontbossing dokumenteer. In die streek waar die studie gedoen is, is die hoofdraer van malaria ’n muskiet wat Anopheles darlingi genoem word. “Die ontboste landskap, wat meer ooptes het, asook waterpoele wat gedeeltelik in die son lê, voorsien blykbaar die ideale habitat vir hierdie muskiet”, sê Sarah Olson, die hoofskrywer van die verslag. Daar is bevind dat malaria toeneem in die gebiede waar die meeste ontbossing plaasvind.
Vlieënde pylinkvisse
Fotografiese bewyse het onlangs bevestig dat party pylinkvisspesies met behulp van straalaandrywing vlieg. Mariene bioloë het gesien dat “pylinkvisse wat selfs net 20 sentimeter lank is, hulle tot twee meter bokant die water kan uitskiet en hulle tot 10 meter ver kan aandryf deur hulle vinne vinnig te klap en hulle vangarms soos ’n skroef te laat draai”, sê Scientific American. Deur water in te neem en dit dan in ’n straal uit te spuit, verkry die weekdiere genoeg stukrag om hulle heeltemal bokant die oppervlak van die see uit te skiet. Volgens foto’s lyk dit asof hulle hulle vinne as vlerke gebruik wanneer hulle vlieg.