Ons beskou die wêreld
In Duitsland het 7 uit 10 babas reeds ’n aanlyn identiteit. Ouers skep profiele en e-posadresse vir hulle of plaas hulle foto’s of ultraklankbeelde op die Internet. Maar deskundiges raai ouers aan om versigtig te wees, aangesien aanlyn foto’s moontlik vir die res van ’n kind se lewe op die Internet beskikbaar sal wees.—BABY UND FAMILIE, DUITSLAND.
Volgens regeringstatistiek sterf 14 000 vroue elke jaar in Rusland as gevolg van gesinsgeweld.—RIA NOVOSTI, RUSLAND.
Sneeu wat op hoogtes van 6 858 meter tot 7 752 meter op die berg Everest val, bevat vlakke van arseen en kadmium wat as gevaarlik beskou word vir drinkwater. Besoedeling weens menslike bedrywighede is die rede wat hiervoor aangegee word.—SOIL SURVEY HORIZONS, VSA.
Die enigste maatskappy wat Bybels in China mag vervaardig, het onlangs hulle 80-miljoenste eksemplaar gedruk. Die maatskappy vervaardig 1 miljoen Bybels per maand—’n kwart van al die Bybels wat wêreldwyd gedruk word.—XINHUA, CHINA.
“’n Rapsie meer as 10 persent van Amerikaanse volwassenes (10,1 persent) het die Katolieke Kerk verlaat hoewel hulle as Katolieke grootgeword het.”—NATIONAL CATHOLIC REPORTER, VSA.
Natuurrampe in 2010
’n Vername versekeringsmaatskappy het ’n wêreldwye totaal van 950 natuurrampe vir 2010 opgeteken, wat die vorige dekade se gemiddelde van 785 natuurrampe per jaar oorskry het. Die vyf ergste rampe was aardbewings in Chili, China en Haïti; oorstromings in Pakistan en ’n hittegolf in Rusland, waar tienduisende gesterf het weens die uitwerking van hitte en lugbesoedeling. In Noord-Europa het aswolke as gevolg van ’n vulkaniese uitbarsting in Ysland min regstreekse skade aangerig, maar lugverkeer byna tot ’n stilstand gebring. In Australië het twee hewige haelstorms meer as $2 miljard (VSA) [R13,7 miljard] se skade aangerig. “Die totale ekonomiese verliese, insluitende verliese wat nie deur versekering gedek is nie”, sê The Telegraph van Londen, “het $130 miljard [R891,3 miljard] beloop teenoor verlede jaar se $50 miljard [R343,1 miljard].”
Was Neanderdallers soos ons?
“Die lank gehuldigde beskouing dat Neanderdallers laer wesens was as Homo sapiens, is aan die verander namate al hoe meer vaardighede wat glo eie aan ons is, aan hulle toegeskryf word”, sê New Scientist. Onlangse ontdekkings gee te kenne dat Neanderdallers skuilings en vuurherde gebou het, vuur beheer het, klere gedra het, kos gekook het, gereedskap gemaak het en gom gemaak het om spiespunte aan stele vas te heg. Daar is ook bewyse dat hulle hulle siekes versorg het, versierings met ’n simboliese betekenis gedra het en hulle dooies begrawe het. Erik Trinkaus, ’n professor van fisiese antropologie aan Washington-universiteit in St. Louis, Missouri, VSA, het gesê: “Neanderdallers was mense, en hulle het heel moontlik dieselfde verstandelike vermoëns as ons gehad.”