Is dit ontwerp?
Die skulp van die flikkerende seeslak
● Baie seediere is bioluminiserend—dit wil sê, hulle kan lig voortbring. Die flikkerende seeslak, Hinea brasiliana, gebruik hierdie vermoë op ’n unieke manier. Wanneer hy deur ’n krap bedreig word, kruip hy terug in sy skulp en “flikker” hy. Die geflikker skrik die krap af. Maar hoe skyn die lig deur die seeslak se skulp?
Dink hieraan: Die skulp van die flikkerende seeslak keer nie dat lig deurskyn nie, dit versprei dit eerder. Dimitri Deheyn en Nerida Wilson, wetenskaplikes by die Scripps-instituut vir Oseanografie in San Diego, Kalifornië, VSA, het gevind dat die lig wat deur die seeslak voortgebring word, eweredig regdeur die hele skulp versprei word en dat die skulp die lig tien keer doeltreffender versprei as ’n kommersiële verspreier van dieselfde dikte (0,5 millimeter). Boonop is die skulp se vermoë om hierdie lig na sy omgewing te laat deurskyn, agt keer doeltreffender as dié van mensgemaakte verspreiers. Verbasend genoeg, hierdie uitsonderlike vermoë om lig te versprei of te laat deurskyn, word nie gevind in die skulpe van naverwante seeslakke wat nie bioluminiserend is nie. Dit is geensins toevallig dat hierdie lig die kleur is wat die verste in seewater trek nie.
Dr. Deheyn sê dat meer kennis oor die flikkerende seeslak “belangrik kan wees in die vervaardiging van materiaal wat lig doeltreffender kan versprei”. Die veld van biofotonika, wat lig vir mediese ontleding en behandeling gebruik, sal ook by hierdie navorsing baat vind. En in hierdie era van LED’s (ligemissiediodes) sal verspreiers wat die lig van klein ligbronne doeltreffender kan versterk, ongetwyfeld tot energiebesparing bydra.
Wat dink jy? Het die skulp van die flikkerende seeslak deur middel van evolusie ontstaan? Of is dit ontwerp?
[Prent op bladsy 18]
Die skulp in normale lig, vergroot
[Prent op bladsy 18]
Die skulp terwyl dit lig uitstraal, vergroot
[Foto-erkennings op bladsy 18]
Links: www.robastra.com; middel en regs: Courtesy of Dr. D. Deheyn, Scripps Institution of Oceanography, UC San Diego