Die samestelling van ’n skulp

HET jy al ooit opgemerk hoe maklik dit is om ’n stuk kryt middeldeur te breek? Maar probeer nou om die skulp van die rooi perlemoen middeldeur te breek. Jy sal waarskynlik ’n hamer nodig hê om dit te breek. Tog is die perlemoenskulp van dieselfde stof gemaak as die kryt—kalsiumkarbonaat. Die skulp is net anders saamgestel. Trouens, so anders dat dit sowat 40 keer meer breekbestand is as die kryt.

Hoe kry die perlemoen hierdie ingenieursprestasie reg? Wetenskaplikes aan die Universiteit van Washington in Seattle, VSA, het sommige van hierdie seeslak se geheime ontrafel. Die perlemoen gebruik sy enkele bordvormige skulp as ’n beskermende muur teen die wêreld buite die skulp. Ter wille van sterkte groei die skulp in lae. Die buitenste laag is ongelyk en grof. Maar die binneste laag, wat die perlemoen genoem word, glinster in deurskynende skoonheid, en hierin lê die skulp se sterkte.

Die wetenskaplikes in Washington het uitgevind dat hierdie binneste laag “’n gelamelleerde steen-en-messelkleistruktuur het”, sê Science News. Hierdie piepklein stene, wat slegs ongeveer ’n mikron breed is (een miljoenste van ’n meter), word aanmekaargehou deur ’n messelklei wat deur die perlemoen self gemaak word, ’n sterk hegmiddel waaroor wetenskaplikes steeds meer probeer uitvind. Wetenskaplikes sê dat die lae mikroskopiese “stene” skokke absorbeer deur teen aanliggende lae te gly. Terselfdertyd bou die organiese lae messelklei op die een of ander manier ’n brug met spesiale “ligamente” oor die krake wat ontstaan. Die skulp het moontlik tot vyf meganismes om te verhoed dat dit breek!

Wetenskaplikes is so beïndruk met die perlemoen se besonder sterk skulp dat hulle probeer om soortgelyke tegnieke te ontwikkel om sterk keramiek te maak. Indien hulle daarin slaag, sal hulle ongetwyfeld groot lof toegeswaai word. Hoe jammer is dit tog dat die Groot Ontwerper, wie se werk hulle probeer naboots, so selde die eer vir sy weergalose vindingrykheid ontvang!—Job 37:14.