Wat party mense glo

Hindoes

beskou swaarkry as ’n gevolg van ’n persoon se optrede, wat hy in hierdie lewe of in ’n vorige lewe gedoen het. ’n Persoon kan moksja bereik, wat die bevryding van ’n siklus van hergeboortes is. Dit kan gedoen word deur ’n geestestoestand te verkry wat afgeskei is van nie-godsdienstige dinge.

Moslems

beskou swaarkry as ’n straf vir sonde en ’n toets van geloof. Dr. Sayyid Syeed, die president van die Islamitiese Vereniging van Noord-Amerika, sê dat slegte dinge ons herinner dat ons dankbaar teenoor God moet wees vir al ons seëninge, en ons moet besef dat ons mense moet help wat dit nodig het.

Joodse tradisie

sê dat ’n mens swaarkry as gevolg van jou eie aksies. Party Jode sê dat daar ’n opstanding sal wees. Daarna sal die ongeregtigheid wat die onskuldige laat swaarkry het, reggestel word. Kabbalistiese (mistiese) Judaïsme leer mense van reïnkarnasie. Dit gee ’n persoon meer as een geleentheid om op te maak vir sy foute.

Boeddhiste

glo dat swaarkry oor baie leeftye ervaar word. Dit is ’n siklus van hergeboortes wat aanhou totdat ’n persoon se negatiewe optrede, emosies en begeertes ophou. Deur middel van wysheid, goeie werke en verstandelike dissipline kan ’n persoon nirwana bereik – ’n toestand waar alle swaarkry opgehou het.

Confucianiste

sê dat die meeste swaarkry die gevolg is van “menslike mislukkings en foute”, sê A Dictionary of Comparative Religion. Confucianiste glo dat al kan swaarkry minder gemaak word deur ’n goeie lewe te lei, word baie swaarkry veroorsaak deur geesskepsele wat magtiger is as mense. In sulke gevalle moet ’n mens maar net aanvaar wat hierdie geesskepsele besluit het.”

Party stamgodsdienste

sê dat swaarkry die gevolg is van toordery. Volgens wat hulle glo, kan hekse goeie of slegte dinge laat gebeur. Die swaarkry wat hulle veroorsaak, kan minder gemaak word deur verskillende rituele. Daarom word daar geglo dat die rituele en medisyne van toordokters die werk van hekse kan teëwerk wanneer ’n persoon siek is.

Christene

sê dat swaarkry die gevolg is van die eerste twee mense, soos beskryf word in die Bybelboek Genesis. Maar party kerke het hulle eie idees oor hierdie lering. Byvoorbeeld, party Katolieke sê dat wanneer ’n persoon swaarkry, dit ‘aan God opgeoffer’ kan word sodat hy die kerk kan bevoordeel of dat hy die swaarkry kan gebruik sodat iemand anders gered kan word.