Hoofstuk 12
Bestem vir vernietiging of oorlewing?
1. Watter vrae word ons hier aangemoedig om onsself af te vra?
DIE godsdienssituasie wat vandag bestaan, dwing ons om te toon wat werklik in ons hart is. Het ons waarlik Jehovah en sy weë lief? Is ons soos sy Seun, Jesus Christus, van wie daar gesê is: „U het geregtigheid liefgehad en ongeregtigheid gehaat”? (Hebreërs 1:9). Is ons bereid om dit openlik te doen sodat ander weet waar ons staan? Die Bybelverhaal van Jehu en Jonadab, die seun van Regab, help ons om ons posisie te ondersoek.
2. Wie was Jehu en Jonadab?
2 In die tiende eeu v.G.J. is Jehu as koning gesalf oor die tienstammeryk van Israel, waarvan Samaria die hoofstad was. Jehu is beveel om al die lede van die goddelose huis van koning Agab uit te roei, insluitende koningin Isebel, wat Baälaanbidding in Israel bevorder en die aanbidding van Jehovah probeer uitwis het. Jonadab, ’n Keniet (dus nie ’n Israeliet nie), het ongetwyfeld geweet van Jehu se teregstellingsprogram toe hy hom tegemoetgegaan het. Maar hoe sterk was Jonadab se liefde vir Jehovah? Sou hy homself openlik identifiseer as iemand wat vas glo dat net Jehovah, die ware God, aanbid moet word?
„IS JOU HART REG”?
3. Hoe het Jonadab sy posisie ten opsigte van Jehovah se aanbidding bekend gemaak?
3 Nadat die twee manne mekaar gegroet het, het Jehu vir Jonadab gevra om sy posisie duidelik te stel. „Is jou hart reg soos my hart met jou hart is?” het Jehu gevra. Sonder aarseling het Jonadab geantwoord: „Ja.” „So ja, gee jou hand”, het Jehu gesê. Toe het hy Jonadab op sy strydwa laat klim en gesê: „Gaan saam met my en aanskou met welgevalle my ywer vir die HERE [en sien hoe ek geen mededinging ten opsigte van Jehovah duld nie, NW].” Jonadab het nie vreesbevange teruggedeins nie.—2 Konings 10:15, 16; kyk Deuteronomium 6:13-15.
4, 5. (a) Hoe het Jehu die Baälaanbidders gedwing om hulleself te identifiseer? (b) Wat het Jehu toe gedoen, en waar was Jonadab? (c) Hoe reageer jy op daardie vernietiging van Baälaanbidders?
4 Met sy aankoms in Samaria het Jehu maatreëls getref wat sou vereis dat alle Baälaanbidders hulleself identifiseer. Die profete, die priesters en al die dienaars van Baäl is byeengeroep vir ’n groot offer in die tempel van Baäl. Hulle is gewaarsku dat enigiemand wat wegbly sy lewe sou verloor. Jehu het beveel dat klere aan al die dienaars van Baäl gegee word sodat hulle duidelik onderskei kon word. Almal wat bely het dat hulle ook Jehovah aanbid, is aldus gedwing om te toon wie se dienaars hulle werklik was. Dit was oënskynlik ’n uur van glorie vir Baäl en vir Satan die Duiwel, die valse god wat deur Baäl verteenwoordig is.
5 Dit was geen plek vir ware aanbidders van Jehovah nie. ’n Soektog is gelas om seker te maak dat net die dienaars van Baäl teenwoordig was. Toe het die seremonie begin. Intussen het Jehu se manne buitekant gereed gestaan, en toe hy die teken gee, het hulle tot aksie oorgegaan. „Slaan hulle dood, laat niemand uitkom nie!” het hy beveel. Al die dienaars van Baäl is uitgeroei. Die tempel van Baäl is afgebreek. „So het Jehu dan Baäl uit Israel uit verdelg.” Jonadab was aan Jehu se sy en het al daardie gebeure aanskou (2 Konings 10:18-28). Hoe reageer jy op wat daar gebeur het? Ons skep nou wel nie behae in die dood van ander nie, nie eens van goddelose mense nie. Maar besef ons waarom daardie optrede nodig was en waarom dit in die Bybel opgeteken is sodat ons dit vandag kan lees?—Vergelyk Esegiël 33:11.
6. (a) Hoe sal Babilon die Grote vernietig word? (b) Hoe het Jesus gedurende sy lewe op aarde getoon dat hy geen mededinging ten opsigte van Jehovah duld nie?
6 Die verhaal gee ons nie die reg om geboue wat aan godsdiensgroepe behoort of mense wat valse aanbidding beoefen te vernietig nie. Jehovah het nie sy hedendaagse getuies nie, maar die verheerlikte Jesus Christus, die Grotere Jehu, aangestel om Sy regverdige oordele te voltrek. Die hemelse Koning sal die uitwissing van die wêreldryk van valse godsdiens bewerk deur toe te laat dat die gesamentlike politieke magte uiting gee aan hulle afkeer van Babilon die Grote (Openbaring 6:2; 17:16; 19:1, 2). Toe Jesus op aarde was, het hy geweier om selfs een daad van aanbidding te verrig wat die Duiwel sou vereer. Hy was nie daarmee gediend dat Jehovah se Woord deur menslike tradisie verdring word en dat die aanbidding van God vir geldelike gewin gebruik word nie. Hy het geen mededinging ten opsigte van Jehovah geduld nie.—Lukas 4:5-8; Mattheüs 15:3-9; 21:12, 13.
7. (a) Wat is sommige van die hedendaagse manifestasies van Baälaanbidding? (b) Waarom duld Christus as Koning nog steeds hierdie dinge?
7 Maar waarom laat Christus, wat nou te midde van sy vyande heers, toe dat hedendaagse Baälaanbidding oënskynlik floreer? Waarom laat hy toe dat mense skynbaar ongestraf die god van hierdie wêreld vereer deur Jehovah se vereistes oorboord te gooi? Waarom duld hy dit dat hulle optree asof God geen beswaar het teen hulle geslagsonsedelikheid, hulle verheerliking van ’n materialistiese lewenswyse, hulle deelname aan spiritistiese gebruike terwyl hulle voorgee dat hulle Christene is, en hulle verkondiging van Babiloniese leerstellings asof dit die woord van God is nie? Die eeue-oue drama toon dat dit is om mense op die proef te stel en hulle openlik te laat beken wie hulle aanbid. Sodoende toon hulle of hulle redding of teregstelling verdien.
8. Watter ernstige vrae moet ons onsself afvra?
8 Watter weg het jy gekies? Het jy alle gebruike laat vaar wat jou as ’n beoefenaar van hedendaagse Baälaanbidding kan identifiseer? Het jy jou afgesonder van die wêreld en stelling ingeneem as ’n ware aanbidder van Jehovah?—2 Korinthiërs 6:17.
9. (a) Wat sal ons nou doen as ons waarlik soos Jonadab is? (b) Hoe beklemtoon die teksverwysings die belangrikheid van hierdie dinge?
9 As ’n nie-Israelitiese aanbidder van Jehovah het Jonadab die „ander skape” afgeskadu wat nou versamel word en die hoop het om vir ewig op aarde te lewe. Het jy die gees van Jonadab? Is jy bereid om jou openlik te skaar aan die kant van die Grotere Jehu en sy gesalfde volgelinge op aarde wat die naderende „dag van die wraak van onse God” verkondig? Neem jy saam met hulle aan daardie dringende werk deel? (Jesaja 61:1, 2; Lukas 9:26; Sagaria 8:23). Gee jy Jehovah jou uitsluitlike toewyding deur niks te laat inbreuk maak op die plek wat hy in jou hart moet beklee nie? (Mattheüs 6:24; 1 Johannes 2:15-17). Toon jou lewe dat jou verhouding met hom jou kosbaarste besitting is, dat alle ander dinge daaromheen gebou is?—Psalm 37:4; Spreuke 3:1-6.
HET JY DIE TEKEN?
10. Hoe toon die Bybel dat slegs aanbidders van Jehovah behoue sal bly?
10 Dit sou ’n ernstige fout wees om te dink dat niks meer van ’n persoon vereis word as om ’n „goeie” lewe te probeer lei en hom af te skei van godsdienste wat dinge doen wat duidelik in God se Woord veroordeel word nie. Almal wat hoop om tot in die „nuwe aarde” behoue te bly, moet hulle ook onmiskenbaar as aanbidders van Jehovah identifiseer (Openbaring 14:6, 7; Psalm 37:34; Joël 2:32). Hierdie boodskap word vervat in ’n gesig wat die profeet Esegiël ontvang het voor Jerusalem in 607 v.G.J. vernietig is.
11. (a) Beskryf die gesig wat in Esegiël 9:1-11 opgeteken is. (b) Wat was die sleutel tot oorlewing?
11 Esegiël het gehoor hoe Jehovah die manne roep wat aangestel is om ontroue Jerusalem en sy inwoners in die ongeluk te stort. Hy het ses manne met wapens vir verbryseling gesien, en daar was ook een man wat met linne bekleed was, met ’n skrywer se inkpot aan sy heupe. Jehovah het eers vir hierdie man met die linneklere gesê: „Trek dwarsdeur die stad, dwarsdeur Jerusalem, en maak ’n teken op die voorhoofde van die manne wat sug en steun oor al die gruwels wat daarin gedoen word.” Toe het hy vir die ses ander gesê: „Trek agter hom aan deur die stad, en slaan; laat julle oog nie verskoon nie, en moet nie spaar nie; slaan dood grysaards, jongmanne en jongedogters en kinders en vroue tot vernietiging toe; maar raak aan niemand op wie die teken is nie, en begin by my heiligdom.” Esegiël het in die gesig die daaropvolgende vernietiging gesien—so omvattend dat dit gelyk het of die hele Israel wat nog in die land was, uitgeroei word (Esegiël 9:1-11). Wat was die sleutel tot oorlewing? Dit was die teken wat deur die man met ’n skrywer se inkpot op mense se voorhoofde aangebring is.
12. (a) Wat was die gruwels waaroor diegene met die teken ‚gesug en gesteun’ het? (b) Waarom het sulke dinge Jehovah gewalg?
12 Net persone wat „sug en steun oor al die gruwels” wat in Jerusalem gedoen is, het die teken vir oorlewing ontvang. Wat was daardie „gruwels”? Vyf word genoem: (1) ’n „Afgodsbeeld van ywer” by die ingang na die binnehof van Jehovah se tempel. Watter vorm dit ook al aangeneem het, die Israeliete het aan hierdie beeld die toewyding gegee wat hulle aan Jehovah verskuldig was (1 Konings 14:22-24). (2) Afbeeldinge van kruipende en viervoetige diere aan die mure, waarvoor reukwerk binne-in die tempelvoorhof geoffer is. (3) Vroue wat geween het oor die dood van die god Tammus, ’n ander naam vir Nimrod, daardie opstandeling teen Jehovah (Genesis 10:9, NW). (4) Manne wat skandelike minagting getoon het deur hulle rug vir Jehovah se tempel te draai en voor die son neer te buig (Deuteronomium 4:15-19). (5) As ’n finale belediging, mense wat die land met geweld gevul het en boonop ’n „loot”, moontlik ’n sekssimbool, na Jehovah se neus uitgesteek het. Kan jy verstaan waarom Jehovah hulle walglik gevind het?—Esegiël 8:5-17, vergelyk NW.
13. (a) Lewer afsonderlik kommentaar oor die hedendaagse gebruike wat met daardie „gruwels” ooreenkom. (b) Hoe voel jy oor hierdie gebruike?
13 Hoe reageer jy op die hedendaagse gebruike van die valse Christendom wat met hierdie „gruwels” ooreenkom? (1) In baie van haar kerke is daar beelde waarvoor mense hulle in aanbidding neerbuig, hoewel die Bybel daarteen waarsku. (1 Korinthiërs 10:14; vergelyk 2 Konings 17:40, 41.) (2) Sy vereenselwig haar met die neiging om die evolusie van die mens uit die diere in die plek van skepping deur God te stel; boonop toon sy vurige toewyding aan afbeeldings van diere en voëls wat as nasionale simbole gebruik word. (3) In haar aanbidding gebruik sy die kruis, wat van die vroegste tye af ’n godsdienssimbool van Tammus is, en sy neem deel aan rouplegtighede vir diegene wat omgekom het in bloedige oorloë wat die gees van Nimrod weerspieël. (Kyk egter Johannes 17:16, 17.) (4) Sy verwerp wat God deur sy Woord sê en kies eerder die „verligting” wat deur die hedendaagse wetenskap en menslike filosofie aangebied word. (1 Timotheüs 6:20, 21, NAV; vergelyk Jeremia 2:13.) (5) Asof dit nie genoeg is nie, ondersteun sy revolusie op sekere plekke en sien sy geslagsonsedelikheid deur die vingers, terwyl sy voorgee dat sy in die naam van God spreek (2 Petrus 2:1, 2). Sommige mense beskou hierdie tendense as liberaal. Hulle stem miskien nie met alles saam nie, maar hulle neem aan party deel of vergoelik dit ten minste. Hoe voel jy oor sulke Godonterende gebruike wat mense van hulle Skepper af wegkeer?
14. Waarom beteken die feit dat ’n persoon deur die kerke ontnugter is nie noodwendig dat hy ’n oorlewende sal wees nie?
14 Baie mense is ontnugter deur die kerke en woon nie meer kerkdienste by nie. Hulle is miskien erg verontrus oor die gewelddadigheid en oneerlikheid in die wêreld. Maar dit beteken nie noodwendig dat hulle die teken vir oorlewing het nie. Hulle moet die teken ontvang van die ‚man met ’n skrywer se inkpot’. Die feite toon dat „die getroue en verstandige dienskneg”-klas vandag daardie tekenwerk doen.—Mattheüs 24:45-47.
15. (a) Wat is die teken? (b) Hoe kry ’n mens dit?
15 Almal wat die teken wil ontvang dat hulle guns gevind het in God se oë, moet die onderrigting aanvaar wat Jehovah deur die „dienskneg”-klas voorsien en ware aanbidders van Jehovah word. Hulle moet nie mense wees wat Jehovah met die mond eer maar in werklikheid die wêreld se weë liefhet nie (Jesaja 29:13, 14; 1 Johannes 2:15). Hulle moet Jehovah en sy standaarde liefhê en diep bedroef wees, „sug en steun”, oor leringe en gebruike wat hom oneer aandoen. Niemand sal ’n letterlike inkteken op hulle voorhoofde aanbring nie. Maar wanneer hulle die simboliese teken het, sal dit vir almal duidelik wees dat hulle hulle, as toegewyde, gedoopte Christene, beklee het met die „nuwe persoonlikheid” wat in Efesiërs 4:24 (NW) beskryf word. Hulle het ’n lewende geloof. Hulle probeer om Jehovah deur hulle dade te eer, in die openbaar sowel as privaat. Nie alleen persone wat uit die valse Christendom gekom het nie, maar almal, ongeag hulle agtergrond, wat hoop om as metgeselle van die gesalfde klas tot in die „nuwe aarde” te oorlewe, moet hierdie teken hê.
16. Waarom is hierdie gesig veral vir kinders en hulle ouers belangrik?
16 Iets wat van besondere belang is, is die feit dat Jehovah vir sy skerpregters gesê het dat ouderdom, geslag, ongetroude status of huweliksverbintenis geen rede was om ’n oortreder teen Jehovah te spaar nie. ’n Getroude persoon moet individueel sy of haar teken ontvang om gespaar te word. As ouers hulle kinders daarvan weerhou om die teken te kry, of as hulle hulle nie as knegte van Jehovah grootmaak nie, moet hulle die verantwoordelikheid dra vir wat met daardie kinders gebeur. Hoewel Jehovah die gehoorsame kinders van godvresende ouers as „heilig” beskou, beskou hy nie opstandige kinders so nie (1 Korinthiërs 7:14; Psalm 102:29 102:28, NW; Spreuke 20:11; 30:17). As kinders oud genoeg is om gedoopte Christene te word maar nie aan die vereistes wil voldoen nie, sal hulle nie gespaar word net omdat hulle jonk is nie, hetsy hulle gedoop is of nie. Hoe noodsaaklik is dit dus dat elke individu wat toerekenbaar is, duidelik geteken word as iemand wat aan God toegewy is en sy wil doen!
17. Wat het ons hier geleer in verband met Jehovah se medelye?
17 Jehovah het groot medelye met die mensdom getoon deur sy getuies te stuur om hulle te waarsku teen die naderende vernietiging en om die weg na veiligheid aan te wys. Maar hy is terdeë bewus van die geskiedenis van valse godsdiens en die slegte vrugte wat dit voortgebring het. Wanneer Babilon die Grote vernietig word, sal hy geen medelye toon met diegene wat hardkoppig daaraan vasklou nie. Om die komende voltrekking van goddelike oordeel te oorleef, moet ons die voetstappe van Jesus Christus navolg as ware aanbidders van Jehovah, die Skepper van hemel en aarde.
[Prente op bladsy 95]
Het jy werklik die teken wat nodig is vir oorlewing?