“Is jou hart opreg met my?”
“Gaan tog saam met my en sien hoe ek geen mededinging ten opsigte van Jehovah duld nie.”—2 KONINGS 10:16, NW.
1, 2. (a) Hoe het Israel se godsdienssituasie van kwaad na erger gegaan? (b) Watter dramatiese veranderinge sou kort voor lank in 905 v.G.J. in Israel plaasvind?
DIE jaar 905 v.G.J. was ’n tyd van groot verandering in Israel. Byna 100 jaar vroeër het Jehovah die verenigde koninkryk van Israel laat verdeel vanweë Salomo se afvalligheid (1 Konings 11:9-13). Die suidelike koninkryk, Juda, is destyds deur Salomo se seun Rehabeam regeer terwyl die noordelike koninkryk, Israel, onder die bewind van koning Jerobeam, ’n Efraimiet, gekom het. Die noordelike koninkryk het ongelukkig ’n rampspoedige begin gehad. Jerobeam wou nie hê dat sy onderdane na die suidelike koninkryk moes gaan om by die tempel te aanbid nie, omdat hy bang was dat hulle die gedagte sou kry om na die huis van Dawid terug te keer. Hy het dus kalfaanbidding in Israel ingevoer en sodoende ’n vorm van afgodediens begin wat in sekere mate dwarsdeur die geskiedenis van die noordelike koninkryk bestaan het.—1 Konings 12:26-33.
2 Die situasie het versleg toe Agab, die seun van Omri, koning geword het. Sy uitlandse vrou, Isebel, het Baälaanbidding bevorder en Jehovah se profete doodgemaak. Ondanks die profeet Elia se reguit waarskuwings het Agab niks gedoen om haar te keer nie. Maar in 905 v.G.J. was Agab dood en het Joram, sy seun, regeer. Dit was nou tyd vir die land om gereinig te word. Elia se opvolger, Elisa, het Jehu, die leërowerste, ingelig dat Jehovah hom salf om die volgende koning van Israel te wees. Wat was sy opdrag? Om die sondige huis van Agab te verwoes en om die profete se bloed wat deur Isebel gestort is te wreek!—2 Konings 9:1-10.
3, 4. Hoe het Jonadab getoon dat sy hart ‘opreg was met Jehu se hart’?
3 Jehu was gehoorsaam aan God se bevel en het die bose Isebel laat doodmaak, en daarna het hy Israel begin reinig deur die huis van Agab te verwoes (2 Konings 9:15–10:14, 17). Toe het hy ’n ondersteuner ontmoet. Hy het “Jonadab die seun van Regab teëgekom wat hom tegemoetgekom het. Toe hy hom geseën het, het hy gevolglik vir hom gesê: ‘Is jou hart opreg met my, net soos my hart met jou hart is?’ Hierop het Jonadab gesê: ‘Dit is.’ ‘Indien dit is, gee vir my jou hand.’ Hy het hom dus sy hand gegee. Daarop het hy hom saam met hom op die strydwa laat klim. Toe het hy gesê: ‘Gaan tog saam met my en sien hoe ek geen mededinging ten opsigte van Jehovah duld nie.’ En hulle het hom op sy strydwa laat ry.”—2 Konings 10:15, 16, NW.
4 Jonadab was nie ’n Israeliet nie. Maar in ooreenstemming met sy naam (wat “Jehovah is gewillig”, “Jehovah is edel” of “Jehovah is vrygewig” beteken) was hy ’n aanbidder van Jehovah (Jeremia 35:6). Hy het beslis buitengewone belangstelling daarin getoon om te sien hoe Jehu “geen mededinging ten opsigte van Jehovah duld nie”. Hoe weet ons dit? Wel, sy ontmoeting met Israel se gesalfde koning was geensins toevallig nie. Jonadab het “hom tegemoetgekom”, en dít nadat Jehu Isebel en ander in die huis van Agab doodgemaak het. Jonadab het geweet wat aan die gang was toe hy Jehu se uitnodiging aanvaar het om op sy strydwa te klim. Hy was onteenseglik aan Jehu—en Jehovah—se kant in hierdie stryd tussen valse en ware aanbidding.
’n Hedendaagse Jehu en ’n hedendaagse Jonadab
5. (a) Watter veranderinge sal binnekort vir die hele mensdom plaasvind? (b) Wie is die Grotere Jehu, en wie verteenwoordig hom op die aarde?
5 In ons dag sal die situasie binnekort vir die hele mensdom net so ingrypend verander as wat dit destyds in 905 v.G.J. vir Israel verander het. Die tyd is nou op hande wanneer Jehovah die aarde sal reinig van al die slegte gevolge van Satan se invloed, waaronder valse godsdiens. Wie is die hedendaagse Jehu? Niemand anders as Jesus Christus nie, aan wie die profetiese woorde gerig is: “Gord u swaard aan die heup, o held, u majesteit en u heerlikheid; ja, u heerlikheid! Ry voorspoedig ter wille van waarheid en ootmoed en geregtigheid” (Psalm 45:4, 5). Jesus word op die aarde verteenwoordig deur “die Israel van God”, gesalfde Christene “wat die gebooie van God onderhou en die werk het om van Jesus te getuig” (Galasiërs 6:16; Openbaring 12:17). Sedert 1922 rig hierdie gesalfde broers van Jesus onbevrees waarskuwings oor Jehovah se naderende oordeelsdade.—Jesaja 61:1, 2; Openbaring 8:7–9:21; 16:2-21.
6. Wie het uit die nasies gekom om die gesalfde Christene te ondersteun, en hoe het hulle as ’t ware op die strydwa van die Grotere Jehu geklim?
6 Gesalfde Christene is nie alleen nie. Net soos Jonadab Jehu tegemoetgekom het, het baie uit die nasies gekom om Jesus, die Grotere Jehu, en sy aardse verteenwoordigers te ondersteun in hulle stryd om ware aanbidding (Sagaria 8:23). Jesus het hulle sy “ander skape” genoem, en in 1932 is hulle as ’n hedendaagse ekwivalent van die eertydse Jonadab geïdentifiseer en genooi om ‘op die strydwa te klim’ van die hedendaagse Jehu (Johannes 10:16). Hoe? Deur ‘die gebooie van God te onderhou’ en saam met die gesalfdes deel te neem aan ‘die werk om van Jesus te getuig’. In hedendaagse tye behels dit onder meer die verkondiging van die goeie nuus van God se opgerigte Koninkryk onder Jesus as Koning (Markus 13:10). In 1935 is hierdie “Jonadabs” as die “groot skare” van Openbaring 7:9-17 geïdentifiseer.
7. Hoe het hedendaagse Christene getoon dat hulle ‘hart nog steeds opreg is’ met Jesus se hart?
7 Sedert die dertigerjare het die groot skare en hulle gesalfde broers moedig bewys dat hulle ware aanbidding ondersteun. In sekere lande in Oos- en Wes-Europa, die Verre Ooste en Afrika het baie van hulle vir hulle geloof gesterf (Lukas 9:23, 24). In ander lande is hulle opgesluit, aangerand of op ander maniere vervolg (2 Timoteus 3:12). Wat ’n reputasie van geloof het hulle tog opgebou! En die rapport vir die 1997-diensjaar toon dat hulle nog steeds vasbeslote is om God te dien, kom wat wil. Hulle ‘hart is nog steeds opreg’ met Jesus se hart. Dit is gedurende 1997 getoon, toe 5599931 Koninkryksverkondigers, wat byna almal “Jonadabs” is, altesaam 1179 735 841 uur bestee het aan die werk om van Jesus te getuig.
Hulle getuig nog ywerig
8. Hoe toon Jehovah se Getuies hulle ywer vir ware aanbidding?
8 Jehu het ’n reputasie gehad dat hy geweldig vinnig met sy strydwa gery het—’n bewys van sy ywer om sy taak te volbring (2 Konings 9:20). Van Jesus, die Grotere Jehu, word daar gesê dat hy “verteer” word deur ywer (Psalm 69:10). Dit verbaas ons dus nie dat ware Christene van vandag gekenmerk word deur hulle ywer nie. In die gemeente sowel as aan die publiek ‘verkondig hulle die woord dringend in gunstige tye, in moeilike tye’ (2 Timoteus 4:2). Hulle ywer was veral duidelik tydens die vroeë deel van 1997 nadat ’n artikel in Ons Koninkryksbediening soveel as moontlik aangespoor het om aan die hulppionierdiens deel te neem. Elke land het ’n doelwit gestel van hoeveel hulppioniers hulle graag wil hê. Wat was die reaksie? Uitstekend! Baie takkantore het hulle doelwit oortref. Ecuador het ’n doelwit van 4000 gestel, maar in Maart het hulle 6936 hulppioniers gerapporteer. Japan het altesaam 104215 gedurende daardie drie maande gerapporteer. In Zambië, waar die doelwit 6000 was, het 6414 hulppioniers in Maart gerapporteer; 6532 in April en 7695 in Mei. Wêreldwyd was die gesamentlike hoogtepunt in hulp- en gewone pioniers 1110 251, ’n vermeerdering van 34,2 persent oor 1996!
9. Benewens die huis-tot-huis-werk, op watter ander maniere vind Jehovah se Getuies mense om die goeie nuus aan bekend te maak?
9 Die apostel Paulus het vir ouer manne van Efese gesê: “Ek [het] my nie daarvan weerhou . . . om julle alles te vertel wat nuttig is of om julle in die openbaar en van huis tot huis te leer nie” (Handelinge 20:20). Hedendaagse Getuies van Jehovah volg Paulus se voorbeeld na en verkondig die goeie nuus ywerig van huis tot huis. Maar dit is moontlik nie maklik om mense tuis te vind nie. Gevolglik spoor “die getroue en verstandige slaaf” Koninkryksverkondigers aan om mense te nader by hulle sakeondernemings, op straat, by die strand, in openbare parke—waar daar ook al mense is (Matteus 24:45-47). Die resultate is uitstekend.
10, 11. Hoe het verkondigers in twee lande goeie inisiatief aan die dag gelê om kontak te maak met belangstellendes wat nie gewoonlik tuis gevind kan word nie?
10 In Kopenhagen, Denemarke, getuig ’n klein groepie verkondigers in die strate buite spoorwegstasies. Van Januarie tot Junie het hulle 4733 tydskrifte by mense gelaat, uitstekende gesprekke gevoer en baie herbesoeke gedoen. Verskeie verkondigers in daardie land het tydskrifroetes in winkels begin. Een dorp hou elke Vrydag ’n groot mark wat deur duisende mense besoek word. Die gemeente het dus gereelde markgetuieniswerk gereël. In een gebied word die skole met ’n inligtingspakkie besoek wat publikasies bevat wat veral geskik is vir onderwysers.
11 Ook in Hawaii is daar pogings aangewend om diegene te bereik wat nie tuis gevind kan word nie. Spesiale gebied sluit in openbare plekke (strate, parke, parkeerterreine en bushaltes), middestadgebiede, winkelsentrums en lughawes, telefoongetuieniswerk, openbare vervoer (predikingswerk op busse) asook kampusse. Daar word seker gemaak dat die regte aantal Getuies na ’n gebied gestuur word en dat dié wat toegewys word behoorlik opgelei is. Soortgelyke goed georganiseerde pogings word in baie lande gerapporteer. Gevolglik word daar kontak gemaak met belangstellendes wat waarskynlik nooit in die huis-tot-huis-bediening gevind sou word nie.
Hulle bly standvastig
12, 13. (a) Watter taktiek het Satan in 1997 teen Jehovah se Getuies gebruik? (b) Hoe het valse propaganda in een land geboemerang?
12 In 1997 was Jehovah se Getuies in ’n aantal lande die slagoffers van boosaardige, valse propaganda wat klaarblyklik bevorder is met die doel om moontlike geregtelike stappe teen hulle te doen. Maar hulle het rotsvas gestaan! (Psalm 112:7, 8). Hulle het die psalmis se gebed onthou: “Vermeteles het my leuens toegedig; maar ék bewaar van ganser harte u bevele” (Psalm 119:69). Sulke valse publisiteit is bloot ’n bewys dat ware Christene gehaat word soos Jesus voorspel het (Matteus 24:9). En soms het dit geboemerang. ’n Man in België het ’n neerhalende artikel oor Jehovah se Getuies in ’n bekende dagblad gelees. Hy was geskok deur die lasterlike aanmerkings en het die volgende Sondag ’n vergadering by ’n Koninkryksaal bygewoon. Hy het gereël om die Bybel saam met die Getuies te studeer en het vinnig vordering gemaak. Hierdie man was voorheen ’n lid van ’n bende. Sy Bybelstudie het hom gehelp om sy lewe in orde te kry, iets wat die mense om hom opgelet het. Die skrywer van die lasterlike artikel het beslis nie so ’n resultaat in gedagte gehad nie!
13 Sommige opregtes van hart in België het hulle teen die leuenagtige propaganda uitgespreek. Een van hulle was ’n voormalige eerste minister wat erken het dat hy Jehovah se Getuies grootliks bewonder vir wat hulle bereik het. En ’n parlementslid het geskryf: “In teenstelling met die insinuasies wat soms rondgestrooi word, lyk dit nie vir my of [Jehovah se Getuies] in die minste ’n gevaar vir die Staat se instellings inhou nie. Hulle is burgers wat vredeliewend, pligsgetrou en eerbiedig teenoor die owerheid is.” Die woorde van die apostel Petrus is waarlik wys: “Handhaaf voortreflike gedrag onder die nasies, sodat hulle, in die aangeleentheid waarin hulle teen julle spreek as boosdoeners, as gevolg van julle voortreflike werke waarvan hulle ooggetuies is, God in die dag van sy inspeksie sal verheerlik.”—1 Petrus 2:12.
’n Uitsonderlike Gedenkmaalviering
14. Meld ’n paar opwindende verslae van Gedenkmaalsyfers in 1997.
14 Dit is gepas dat diegene wat van Jesus getuig die Herdenking van sy dood as ’n hoogtepunt van hulle jaar moet beskou. In 1997 was 14322 226 op 23 Maart teenwoordig om die gebeurtenis te vier. Dit was meer as 1400-000 meer as in 1996 (Lukas 22:14-20). In baie lande was die Gedenkmaalbywoning baie meer as die aantal Koninkryksverkondigers, wat toon dat daar goeie potensiaal is vir toekomstige groei. In 1997 het Haïti ’n hoogtepunt van 10621 verkondigers gehad, terwyl 67259 die Gedenkmaal bygewoon het. Jy kan na die jaarverslag op bladsye 18 tot 21 kyk en sien hoeveel ander lande soortgelyke hoë bywoningsyfers gehad het in vergelyking met die aantal verkondigers.
15. Hoe het ons broers in party lande ernstige probleme om die Gedenkmaal te vier die hoof gebied?
15 Vir party was dit nie maklik om die Gedenkmaal by te woon nie. In Albanië was daar as gevolg van burgerlike oproerigheid ’n aandklokreël van 7:00 nm. af. In 115 klein groepies regoor die land het die Gedenkmaal om 5:45 nm. begin. Die son het om 6:08 nm. ondergegaan, wat die begin van 14 Nisan aangedui het. Die embleme is omstreeks 6:15 nm. omgestuur. In die meeste gevalle is die slotgebed teen 6:30 nm. gedoen, en dié wat dit bygewoon het, het hulle huis toe gehaas om die aandklokreël te gehoorsaam. Die Gedenkmaalbywoning was nogtans 3154, in vergelyking met ’n verkondigershoogtepunt van 1090. In een Afrikaland het burgerlike oproerigheid die Koninkryksaal onbereikbaar gemaak, en twee ouer manne het dus besluit om in die huis van ’n derde ouer man te vergader sodat hulle kon reël dat die viering in kleiner groepe gehou kon word. Die twee ouer manne moes ’n afvoersloot oorsteek om die huis te bereik. Maar daar was vegtery in die gebied, en skerpskutters het op enigiemand geskiet wat die sloot probeer oorsteek het. Een ouer man het sonder enige probleme oorgehardloop. Die tweede een was besig om die sloot oor te steek toe hy ’n skoot hoor klap. Hy het platgeval en na veiligheid gekruip terwyl koeëls oor sy kop gegons het. Die ouer manne het daarin geslaag om hulle vergadering te hou, en daar is na die behoeftes van die gemeente omgesien.
“Uit alle nasies en stamme . . . en tale”
16. Hoe het die ‘getroue en verstandige slaaf’-klas gereël dat die goeie nuus onder klein taalgroepe verkondig word?
16 Die apostel Johannes het gesê dat die groot skare “uit alle nasies en stamme en volke en tale” sou kom (Openbaring 7:9). Die Bestuursliggaam reël dus dat lektuur in al hoe meer tale beskikbaar gestel word—onder meer dié wat deur afgesonderde stamme en klein groepe mense gepraat word. In Mosambiek is die traktaat Die lewe in ’n vreedsame nuwe wêreld byvoorbeeld in vyf bykomende tale vrygestel. In Nicaragua is die brosjure Jy kan vir ewig op die aarde lewe! in Miskito beskikbaar gestel—die Wagtoringgenootskap se eerste publikasie in daardie taal. Baie Miskito-Indiane het die brosjure met blydskap geneem toe hulle sien dat dit iets in hulle eie taal is. In 1997 het die Genootskap lektuur in 25 bykomende tale uitgegee en meer as eenmiljard tydskrifte gedruk.
17. Watter taalgroep is in Korea gehelp, en hoe het videobande hierdie deel van die bevolking grootliks gehelp?
17 In Korea is nog ’n taalgroep gehelp. In 1997 is die eerste streekbyeenkoms in Koreaanse gebaretaal gehou. Daar is 15 gebaretaalgemeentes in Korea met 543 verkondigers, maar 1174 het die streekbyeenkoms bygewoon en 21 is gedoop. Publikasies op videoband word in 13 verskillende gebaretale vervaardig om die dowes te help wat nie die gesproke of geskrewe woord maklik kan verstaan nie. Die dowes word dus met welslae gehelp om te “lees” en selfs die goeie nuus te bestudeer. In die Verenigde State kon dit ’n dowe persoon voorheen tot vyf jaar geneem het om tot doop te vorder. Noudat ’n aantal video’s in Amerikaanse Gebaretaal beskikbaar is, is dit vir party van die dowes tot ongeveer een jaar verminder.
‘Bly op die strydwa’
18. Wat het Jehu begin doen nadat hy Jonadab ontmoet het?
18 In 905 v.G.J. het Jehu, nadat Jonadab by hom aangesluit het, valse aanbidding begin uitwis. Hy het ’n uitnodiging aan alle Baälaanbidders gerig: “Heilig ’n feestyd vir Baäl.” Toe het hy boodskappers deur die hele land gestuur om te verseker dat geen Baälaanbidder oorgeslaan word nie. Terwyl die skare in die valse god se groot tempel ingestroom het, is daar seker gemaak dat geen aanbidder van Jehovah daar was nie. Uiteindelik het Jehu en sy leër die Baälaanbidders neergevel. “So het Jehu dan Baäl uit Israel uit verdelg.”—2 Konings 10:20-28.
19. Watter gees moet ons aan die dag lê, en met watter werk moet ons dringend besig wees met die oog op wat vir die mensdom voorlê?
19 Vandag is die finale oordeel van alle valse godsdiens op hande. Onder engeleleiding verkondig Christene goeie nuus aan die hele mensdom en spoor hulle hulle aan om God te vrees en hulle van valse godsdiens af te skei (Openbaring 14:6-8; 18:2, 4). Sagmoediges word aangespoor om hulle aan God se Koninkryk onder Jehovah se gekroonde Koning, Jesus Christus, te onderwerp (Openbaring 12:10). In hierdie opwindende tyd moet ons nie ons ywer laat afkoel terwyl ons vasstaan vir ware aanbidding nie.
20. Wat gaan jy gedurende die 1998-diensjaar vasbeslote wees om te doen?
20 Toe Koning Dawid eenkeer onder groot druk verkeer het, het hy gebid: “My hart is standvastig, o God, my hart is standvastig. Ek sal sing en melodieë speel. Ek sal u onder die volke prys, o Jehovah” (Psalm 57:7, 9, NW). Mag ons ook standvastig wees. Gedurende die 1997-diensjaar is daar ondanks baie moeilikhede ’n luide lofbetuiging tot die heerlikheid van Jehovah God gehoor. Mag ’n soortgelyke, selfs groter, lofbetuiging gedurende die huidige diensjaar gehoor word. En mag dit waar wees ongeag hoe Satan ons ook al probeer ontmoedig of teëstaan. Ons sal sodoende toon dat ons hart opreg bly met die hart van die Grotere Jehu, Jesus Christus, en ons sal heelhartig reageer op die geïnspireerde vermaning: “Wees bly in die HERE en juig, o regverdiges! En jubel, alle opregtes van hart!”—Psalm 32:11.
Kan jy verduidelik?
◻ Watter veranderinge het in 905 v.G.J. in Israel plaasgevind?
◻ Wie is die hedendaagse Jehu, en hoe het die “groot skare” getoon dat hulle ‘hart opreg is’ met sy hart?
◻ Watter syfers in die jaarverslag lewer blyk van die ywer wat Jehovah se Getuies gedurende die 1997-diensjaar aan die dag gelê het?
◻ Watter gees sal ons gedurende die 1998-diensjaar openbaar, ongeag wat Satan moontlik teen ons sal bring?
[Tabel op bladsy 18-21]
WÊRELDRAPPORT VAN JEHOVAH SE GETUIES VIR DIE 1997-DIENSJAAR
(See bound volume)
[Prent op bladsy 15]
Die uitsonderlike bywoning van die Gedenkmaal toon dat daar goeie potensiaal is vir toekomstige groei
[Prent op bladsy 16]
Soos Jonadab Jehu ondersteun het, so ondersteun die hedendaagse “groot skare” die Grotere Jehu, Jesus Christus, en sy gesalfde broers