Hoofstuk 20
‚Die geringste word ’n magtige nasie’
1. (a) Wat het Jehovah voorspel in verband met die vermeerdering van ware aanbidders? (b) Wie bring dit tot stand, en hoe?
DIE aanbidders van Jehovah is al lank betreklik min in vergelyking met die wêreldbevolking. Maar in ons dag neem hulle getal vinnig toe, tot die groot vreugde van liefhebbers van geregtigheid. Wat die omvang van die vermeerdering betref, het Jehovah self voorspel: „Die kleinste sal ’n geslag [duisend, NW] word en die geringste ’n magtige nasie. Ek, die HERE, sal dit op die regte tyd gou laat kom” (Jesaja 60:22). Soos daardie teks sê, bring Jehovah dit self tot stand. Hoe? Deur ’n toestand onder sy knegte te skep wat hulle duidelik onderskei van die nasies om hulle heen en wat regskape persone sterk aantrek.
2. (a) Tot wie word Jesaja 60:1, 2 gerig? (b) Hoe het dit gekom dat die „heerlikheid van Jehovah” oor haar geskyn het? (c) Hoe het die oorblyfsel ‚lig versprei’?
2 Dít is in Jesaja 60:1, 2 voorspel, waar Jehovah hom rig tot sy „vrou”, sy organisasie bestaande uit lojale geesskepsele sowel as geesverwekte seuns op aarde, met die woorde: „Staan op, o vrou, versprei lig, want jou lig het gekom en selfs die heerlikheid van Jehovah het oor jou geskyn. Want kyk! duisternis self sal die aarde bedek, en dikke donkerheid die nasionale groepe; maar oor jou sal Jehovah skyn, en oor jou sal sý heerlikheid gesien word.” Die grondslag van hierdie onderskeid is die geboorte van die Messiaanse Koninkryk in die hande van Jesus Christus in 1914. Dit was toe dat die „heerlikheid van Jehovah” geskyn het oor sy hemelse organisasie, waaruit die Koninkryk gebore is. Dit was rede tot groot vreugde onder hulle (Openbaring 12:1, 2, 5, 10-12). En op aarde het die gesalfde oorblyfsel van Koninkrykserfgename in daardie vreugde gedeel. Van 1919 af het hulle ‚lig versprei’ toe hulle die wêreldwye verkondiging van God se Koninkryk as die mensdom se ware en enigste hoop aangepak het.—1 Petrus 2:9; Mattheüs 5:14-16.
3. (a) Waarom ‚bedek duisternis die aarde’, veral van 1914 af? (b) Wat is die enigste ware oplossing?
3 In teenstelling hiermee het die nasies van die wêreld, in ’n poging om hulle soewereiniteit te handhaaf, in 1914 ’n tydperk van geweld en onsekerheid binnegegaan waarvan hulle nooit weer herstel het nie. Die onbestendigheid wat sedertdien bestaan, het baie laat besef dat hulle, ondanks „wetenskaplike vooruitgang”, geen veilige toekoms tegemoetgaan nie. Ja, ‚duisternis bedek die aarde’. Waarom kan hulle geen oplossing vind nie? Omdat die nasies Jehovah as Soewerein verwerp het. ’n Paar heersers bring hoogstens lippehulde aan ’n „God” wie se naam hulle nooit gebruik nie. Hulle is vasbeslote om self die leisels te hou, maar hulle is nie in staat om die mensdom se probleme op te los nie (Jeremia 8:9; Psalm 146:3-6). Die huidige wêreld, met sy hebsug en korrupsie, het sy „laaste dae” binnegegaan. Dit kan onmoontlik vernietiging vryspring. Net mense wat hulle volle vertroue in God se Koninkryk stel, kan die toekoms met vertroue tegemoetgaan. Al hoe meer regskape persone besef dit en voeg hulle by die geledere van Jehovah se Getuies, wat nie net van die Koninkryk praat nie maar opreg probeer om in ooreenstemming met hulle prediking te lewe.
‚DIE KLEINE WORD DUISEND’
4. Watter insamelingswerk het eerste aandag ontvang, ter vervulling van Jesaja 60:4?
4 Toe die Eerste Wêreldoorlog geëindig het, was die insameling van die Koninkrykserfgename nog nie afgehandel nie. Daar was nog „seuns” en „dogters” van hemelse Jerusalem nodig om die voorspelde 144 000 wat saam met Christus in die hemel sou regeer voltallig te maak. Jehovah het egter die voltooiing van hierdie werk voorspel deur te sê: „Slaan jou oë rondom op en kyk—hulle almal kom bymekaar, hulle kom na jou toe; jou seuns kom van ver, en jou dogters word op die heup gedra” (Jesaja 60:4). As gevolg van die Koninkryksverkondiging sedert 1919 het nog duisende hulle aan Jehovah toegewy en laat doop en is hulle daarna met heilige gees gesalf. Jesus het nietemin van die hele groep Koninkrykserfgename as slegs ’n „klein kuddetjie” gepraat (Lukas 12:32). Om die profesie in Jesaja 60:22 te vervul, sou daar sekerlik meer moes wees wat vir ware aanbidding versamel word. En dit was inderdaad die geval!
5. Hoe word die bron van verdere vermeerdering in Jesaja 55:5 beskryf?
5 Hulle word in Jesaja 55:5 soos volg beskryf: „Kyk, nasies [’n nasie, NW] wat jy nie geken het nie, sal jy roep; en nasies [’n nasie, NW] wat jou nie geken het nie, sal na jou hardloop, ter wille van die HERE jou God en van die Heilige van Israel, omdat Hy jou verheerlik het.” Dit is mense van buite geestelike Israel. Hulle kom uit baie nasies, maar hulle word ’n verenigde volk waarvan al die lede lojale ondersteuners van God se Koninkryk is. Hulle is ‚’n nasie’ wat die oorblyfsel van geestelike Israel nie op daardie tydstip volgens hulle begrip van die Skrif „geken” het nie, en hierdie volk het ook nie voorheen erkenning aan God se knegte verleen nie. Maar hulle word getrek deur die verkondiging van die goeie nuus, omdat hulle besef dat hierdie geestelike Israeliete die ware God aanbid en omdat hulle ’n geestelike skoonheid in hulle sien wat slegs deur die seën van God verkry kan word.
6. Hoe ver word die Koninkryksboodskap uitgedra, en met watter opwindende resultate?
6 Ondanks al Satan se pogings om die verkondiging van die Koninkryksboodskap te verhinder en om die aandag van mense na ander strewes weg te keer, word die lig van die waarheid nog steeds tot aan die uithoeke van die aarde versprei. Die resultaat hiervan was soos God lank gelede vir sy „vrou” gesê het: „Dan sal jy dit sien en straal van vreugde, en jou hart sal ontroer en verruim word; want die rykdom van die see gaan na jou toe oor, die skatte van die nasies kom na jou toe aan. . . . en [hulle] verkondig met blydskap die roemryke dade van die HERE” (Jesaja 60:5, 6). Ja, ’n „groot menigte” mense wat voorheen ’n deel was van die „see” van die mensdom wat van God vervreem is, mense wie se lewens verduister is deur die „dikke donkerheid” wat die volke oordek, het hulle by geestelike Israel gevoeg. In die oë van God is hulle waarlik die kosbare skatte uit al die nasies.
7. Wat is waarlik kosbaar in Jehovah se oë, soos blyk uit die manier waarop die vermeerdering voorspel is?
7 Ten tye van die herbouing van Jehovah se tempel in Jerusalem het Jehovah sy profeet Haggai laat aankondig: „Ek sal ook al die nasies laat bewe, sodat die skatte van al die nasies sal toevloei; en Ek sal hierdie huis met heerlikheid vervul, sê die HERE van die leërskare” (Haggai 2:7). Die feit dat Jehovah die nasies skud en laat bewe, lei uiteindelik tot hulle vernietiging. Maar voor dít gebeur, moet „die skatte van al die nasies” onder hulle uit versamel en in Jehovah se groot geestelike tempel, sy universele huis van aanbidding, ingebring word. Hier sal hulle veiligheid vind wanneer die wêreld te gronde gaan. Dit is sulke lewende aanbidders wat vir Jehovah kosbaar is. Hy stel nie soseer in hulle materiële rykdom belang nie (Miga 6:6-8). Hulle kan aan Jehovah niks kosbaarder gee as hulle heelhartige aanbidding nie. Hulle kom met hartgrondige toewyding en ywerige diens as offergawes, en almal ‚verkondig die roemryke dade van Jehovah’. Watter vreugde verskaf hulle verskyning tog nie aan Jehovah se lojale knegte in die hemel sowel as op aarde nie!
8. Watter aanduidings gee die Bybel in verband met die omvang van die insameling van toekomstige aardse erfgename van die Koninkryk?
8 Hoeveel van hierdie aanbidders van Jehovah wat hoop om eendag op ’n paradysaarde te lewe sal daar eindelik wees? Die Bybel sê nie. Die geleentheid is daar vir almal wat graag Jehovah se liefdevolle voorsienings wil benut, ongeag aan watter nasie hulle behoort. Jesaja 60:8 gee egter ’n aanduiding van wat ons te wagte kan wees, want daar word hulle beskryf as duiwe wat „aangevlieg kom soos ’n wolk”—’n wolk wat die aarde daaronder verdonker. Dit dui op die beweging van baie mense in ’n kort tydjie. Met die oog op hierdie groot toestroming van aanbidders van Jehovah is daar voorspel dat ‚die kleine’ van geestelike Israel ‚duisend sal word en die geringe ’n magtige nasie’, en Jehovah het gesê dat hy dit ‚op sy tyd sal bespoedig’ (Jesaja 60:22, NW). Kom dit ooreen met wat gebeur het?
9. In watter mate het hierdie vermeerdering sedert 1935 plaasgevind?
9 Ná die Eerste Wêreldoorlog was daar net ’n paar duisend wat in die openbaar vir die Koninkryk getuig het. Teen 1935 was daar minder as 60 000 oor die hele wêreld. In 1941 het die getal Koninkryksverkondigers die 100 000-kerf oorskry. Teen 1953 was daar meer as 500 000. Tien jaar later het hulle tot ’n miljoen toegeneem. Aan die begin van 1984 was daar 2 652 323. Hulle bestee gemiddeld ver oor die miljoen uur per dag daaraan om aan ander te verduidelik waarom net God se Koninkryk ware hoop vir die toekoms bied. Dit is betekenisvol dat, in vergelyking met die getal persone wat hulle as Jehovah se Getuies aan Jehovah se Messiaanse Koninkryk onderwerp, sowat 60 nasies van die wêreld vandag bevolkings het wat kleiner is as hierdie groeiende ‚nasie’. Hierdie unieke ‚nasie’ neem egter nie aan wêreldlike politiek deel nie, maar wy hom uitsluitlik aan die diens van die ware God.
10. (a) Watter omstandighede maak hierdie groei wonderlik in ons oë? (b) Wat toon dat daar nog vermeerdering voorlê?
10 Is dit die volle mate waarin hierdie profesie vervul sal word? Wat reeds gebeur het, voldoen ruim aan die Bybel se beskrywing. En dit is veral wonderlik wanneer ons dink aan die omstandighede waaronder hierdie werk gedoen word—die struikelblokke wat te bowe gekom word, die blyke van goddelike leiding om dit te laat slaag, die toewyding van diegene wat daaraan deelneem. Nog iets wat wonderlik is, is die veranderinge wat dit in die lewens van mense teweeggebring het. Maar die vermeerdering van mense wat hulle openlik aan Jehovah se kant skaar, loop nie nou ten einde nie, en dit neem ook nie af nie. In die laaste jare het gemiddeld ver oor die 10 000 mense hulle elke maand in water laat doop, en die getal styg elke jaar. Deur na te leef wat hulle doop simboliseer, kan al hierdie persone die gerusstellende vooruitsig van oorlewing tot in die „nuwe aarde” hê.
11. (a) Hoe toon die Bybel dat hierdie miljoene deel van ’n organisasie word? (b) Wat is die hoofdoel van daardie organisasie?
11 Hierdie miljoene persone is nie bloot onafhanklike Bybelstudente wat God elkeen op sy eie manier dien nie. Hulle is persone wat hulle onderwerp en ’n deel van Jehovah se sigbare organisasie word. Soos ons gesien het, het die Koninkrykserfgename eers ‚bymekaar gekom’. Nou gaan ander uit die nasies, wat die hoop op aardse lewe koester, ‚na hulle toe oor’ (Jesaja 60:4, 5). Hulle is bymekaargebring in „een kudde” onder „een herder”, Jesus Christus (Johannes 10:16). Die apostel Petrus het ware Christene as ’n wêreldwye „broederskap” beskryf, en Paulus het hulle aangespoor om hulle nie af te sonder nie maar om ‚byeen te kom’, en dit des te meer namate die dag vir die voltrekking van goddelike oordeel nader kom (1 Petrus 5:9; Hebreërs 10:23-25). Sodoende word hulle versterk en toegerus om deel te hê aan die groot doel waarvoor hierdie organisasie bestaan. En wat is dit? Om Jehovah se naam te verheerlik.—1 Petrus 2:9; Jesaja 12:4, 5.
’N TAAK WAT VERRIG MOET WORD
12. (a) Hoe het Jesus die werk aangedui waaraan ons almal moet deelneem? (b) Hoe belangrik is dit, en waarom?
12 Almal wat met Jehovah se organisasie begin assosieer, kom gou tot die besef dat die lede van daardie organisasie werkers is. In navolging van Jesus Christus is hulle almal aktiewe predikers van die Koninkryk van God, die middel waardeur Jehovah se naam geregverdig gaan word. Jesus het self gesê: „Ek moet . . . die evangelie van die koninkryk van God bring, want daarvoor is Ek gestuur” (Lukas 4:43). Hy het ander ernstig vermaan om hulle hele lewe rondom God se wil te bou. Hy het sy volgelinge geleer om dieselfde werk te doen as wat hy gedoen het. Hy het voorspel dat „hierdie evangelie van die koninkryk” in ons dag in die hele wêreld verkondig sal word „tot ’n getuienis vir al die nasies” (Mattheüs 24:14). Dit is die belangrikste werk wat ons vandag kan doen. Hoe so? Omdat ons aldus die regmatige soewereiniteit van Jehovah God, waarvan die welsyn van die hele skepping afhang, verdedig. Deur van ganser harte aan hierdie werk deel te neem, lewer ons bewys van ons waardering vir Jehovah se oorvloedige, onverdiende goedheid. En ons help ander om baat te vind by die enigste middel waardeur hulle die komende groot verdrukking kan oorleef.—Vergelyk 1 Timotheüs 4:15, 16.
13. (a) Watter toestand is in Jesaja 60:17 vir Jehovah se organisasie voorspel? (b) Wat moet ons doen om dit ten volle te ondervind? (c) Watter vooruitsig het diegene wat dit doen?
13 Die toestande wat hulle in Jehovah se organisasie aantref, is hartverblydend. Dit is soos Jehovah by monde van Jesaja voorspel het: „Ek sal Vrede as jou owerheid aanstel en Geregtigheid as jou bestuurders” (Jesaja 60:17). Die vrede wat heers, is nie blote teorie nie. Dit is werklikheid, ’n vrug van God se heilige gees. Dit beteken nie dat ’n persoon daardie vrede ten volle ondervind net omdat hy met die organisasie assosieer nie. Hy moet self leer om die dinge na te jaag „wat tot vrede en onderlinge stigting dien” (Romeine 14:19). Hy moet leer om godvrugtige wysheid te openbaar wanneer hy met die onvolmaaktheid van ander te kampe het, om lankmoedigheid en selfbeheersing aan die dag te lê en om ander te vergewe net soos hy wil hê dat God hom moet vergewe. Ja, hy moet ook „vrede maak” (Jakobus 3:17, 18; Galasiërs 5:22; Kolossense 3:12-14). Die wat dit doen, smaak die groot vreugde om ’n deel te wees van die „magtige nasie” wat nou vorm aanneem en wat toegewy is aan die diens van Jehovah, „die gelukkige God” (1 Timotheüs 1:11, NW). Dit is die lede van hierdie „nasie” wat gespaar sal word wanneer Jehovah oordeel voltrek aan die hele wêreld wat Satan as owerste erken.