Hoofstuk 2

Die “Vredevors” gaan Armageddon tegemoet

1, 2. (a) Watter aangrypende woorde het God die profeet Jesaja geïnspireer om te spreek? (b) Wanneer het hierdie woorde in vervulling begin gaan?

IN DIE agtste eeu voor ons Gewone Jaartelling is die profeet Jesaja geïnspireer om aan God se volk te sê: “’n Kind is vir ons gebore, ’n Seun is aan ons gegee; en die heerskappy is op sy skouer, en Hy word genoem: Wonderbaar, Raadsman, Sterke God, Ewige Vader, Vredevors—tot vermeerdering van die heerskappy en tot vrede sonder einde, op die troon van Dawid en oor sy koninkryk, om dit te bevestig en dit te versterk deur reg en deur geregtigheid, van nou af tot in ewigheid.”—Jesaja 9:5, 6.

² Daardie aangrypende woorde het in die laaste deel van die jaar 2 v.G.J. in vervulling begin gaan. Dit was toe Jesus gebore is as ’n afstammeling van koning Dawid, wat in die stad Jerusalem oor die 12 stamme van Israel geregeer het.

’n Verbond vir ’n Koninkryk met vrede sonder einde

3. (a) Watter verbond het God met koning Dawid gesluit? (b) Aan watter afstammeling van koning Dawid het Jehovah die titel “Vredevors” gegee?

³ Vanweë Dawid se ywer vir die aanbidding van die God van Israel het Jehovah met hom ’n verbond gesluit vir ’n ewige Koninkryk in sy geslag (2 Samuel 7:1-16). Daardie verbond is deur God se eed gesteun (Psalm 132:11, 12). Volgens daardie verbond moes Dawid se koninkryk die grondslag vorm vir die komende Koninkryk van die “Vredevors”. “Jesus Christus, die seun van Dawid,” is die een aan wie Jehovah die titel “Vredevors” gegee het.—Mattheüs 1:1.

4. (a) Wie het Jesus se aardse moeder geword? (b) Wat het die engel Gabriël in hierdie verband aan haar gesê?

⁴ Jesus se moeder was ’n vrou wat in die koninklike geslag van koning Dawid gebore is. Sy was ’n maagd toe sy haar beloofde seun ontvang het, die een wat die permanente erfgenaam van Dawid se troon sou word. Hierdie ontvangenis het plaasgevind voordat Josef haar tot vrou geneem het (Mattheüs 1:18-25). Die engel Gabriël het vir die maagd Maria gesê: “Kyk, jy sal swanger word en ’n Seun baar, en jy moet Hom Jesus noem. Hy sal groot wees en die Seun van die Allerhoogste genoem word; en die Here God sal aan Hom die troon van sy vader Dawid gee, en Hy sal koning wees oor die huis van Jakob tot in ewigheid, en aan sy koninkryk sal daar geen einde wees nie.”—Lukas 1:31-33.

5. Wat het die profeet Jesaja oor die heerskappy van die “Vredevors” voorspel?

⁵ Dit is waarom die profeet Jesaja aangaande die “Vredevors” voorspel het: “Sy gesag sal al verder strek en die vrede wat Hy bring kry nooit end nie. Hy sal op Dawid se troon sit en oor Dawid se koninkryk regeer” (Jesaja 9:5, 6, Die Lewende Bybel). Volgens die verbond wat met Dawid gesluit is, sal hierdie Koninkryk ’n ewige regering wees met vrede sonder einde. Sy troon moet “tot in ewigheid” staan!

6. (a) Wat het God op die derde dag van Jesus se dood gedoen om die Koninkryksverbond te vervul? (b) Wanneer het Jesus begin om as die “Vredevors” te heers?

⁶ Om hierdie Koninkryksverbond te vervul, het die almagtige God Jesus op die derde dag van sy martelaarskap uit die dood opgewek. Dit was op die 16de dag van die Joodse maand Nisan, in die jaar 33 van ons Gewone Jaartelling. As ’n ooggetuie van die verrese Seun van God het die apostel Petrus gesê dat Jesus “gedood is in die vlees, maar lewend gemaak is in die gees” (1 Petrus 3:18, NW). Die allerhoogste God het hom na Sy regterhand verhoog. Dit is aldaar dat hy sedert die einde van die Heidense Tye, of die vasgestelde “tye van die nasies”, vroeg in Oktober van die jaar 1914, as die “Vredevors” heers.—Lukas 21:24.

7. (a) Waarmee het Jesus reg van die begin van sy bewind af te kampe gehad? (b) Wie verkondig Jesus se koningskap aan al die nasies, en ter vervulling waarvan?

⁷ Reg van die begin van sy hemelse bewind af het hy met ’n vyandige wêreld te kampe gehad, soos blyk uit twee wêreldoorloë wat gevoer is oor die geskil oor wie oor die aarde gaan heers. Hy het nou met die Verenigde Volke-organisasie te kampe. Deur die aardomvattende verkondiging van die evangelie van die Koninkryk deur Jehovah se Getuies, wat in meer as 200 lande preek, word die aandag van alle nasies op sy daadwerklike koningskap in die hemele gevestig. Dit is ter vervulling van wat die “Vredevors” self voorspel het, soos ons in Mattheüs 24:14 lees: “Hierdie evangelie van die koninkryk sal verkondig word in die hele wêreld tot ’n getuienis vir al die nasies; en dan sal die einde kom.”

8. Waarom kan daar gesê word dat ons baie diep in die “voleinding van die wêreld” is?

⁸ Die geskil oor wêreldoorheersing moet binnekort besleg word. Ons is nou, meer as 70 jaar na die einde van die vasgestelde “tye van die nasies” in 1914, diep in hierdie “voleinding van die wêreld”. Die geslag van 1914 het die begin van die betekenisvolle wêreldgebeure wat deur Jesus voorspel is, gesien (Mattheüs 24:3-14). Jesus het gesê dat daardie geslag nie sou verbygaan voordat al hierdie dinge gebeur het nie. Daardie geslag is nou baie na aan sy einde.—Mattheüs 24:34.

9, 10. (a) Hoe is die profetiese informasie in die boek Openbaring aan ons oorgedra? (b) Wat voorspel Openbaring 16:13, 14, 16 oor Har–Magedon of Armageddon?

⁹ Wat lê dus in die nabye toekoms voor, en wat gaan die “Vredevors” tegemoet? Hyself is gebruik om dit te voorspel in die heel laaste boek van die Bybel, die Openbaring, wat God aan hom gegee het en wat hy deur middel van ’n engel aan die bejaarde apostel Johannes oorgedra het (Openbaring 1:1, 2). Dit het omstreeks die einde van die eerste eeu van ons Gewone Jaartelling plaasgevind. In Openbaring 16:13, 14, 16 het Jesus die apostel Johannes hierdie betekenisvolle woorde oor Har–Magedon, of Armageddon, laat opteken:

¹⁰ “Ek het uit die bek van die draak en uit die bek van die dier en uit die mond van die valse profeet drie onreine geeste soos paddas sien kom. Want dit is geeste van duiwels wat tekens doen, wat uitgaan na die konings van die aarde en die hele wêreld, om hulle te versamel vir die oorlog van daardie groot dag van die almagtige God. En hulle het hul versamel op die plek wat in Hebreeus genoem word Armageddon.”

Die figuurlike “berg Megiddo”

11. (a) Wat beteken die naam Armageddon, en was daar ooit ’n geografiese plek met so ’n naam? (b) Waarom was die eertydse stad Megiddo van geskiedkundige belang? (c) Watter dubbele betekenis het die naam Megiddo verkry?

¹¹ Die Hebreeuse naam Har–Magedon, of Armageddon, beteken die “berg Megiddo”. Geen geografiese plek in vervloë of hedendaagse tye is die berg Megiddo genoem nie. In ’n boek soos Openbaring wat vol beeldspraak is, het die uitdrukking dus ’n simboliese betekenis. Wat moet daardie betekenis wees? Wel, die verhewe stad Megiddo, waarvan die naam “troepemagte” beteken, was van geskiedkundige belang. In die sekulêre en Bybelse geskiedenis wek die naam herinneringe aan beslissende veldslae. Waarom? Omdat die stad destyds ’n strategiese roete tussen Europa, Asië en Afrika oorheers het en die bewoners invallers uit ’n gunstige posisie kon voorkeer en stuit. Megiddo het gevolglik ’n dubbele betekenis verkry—dié van tragiese neerlaag vir een kant en van klinkende oorwinning vir die ander kant.

12, 13. (a) Hoe het die God van die Bybel in die dae van rigter Barak verbonde geraak aan Megiddo en die rivier daar naby? (b) Hoe beskryf Barak en Debora se oorwinningslied God se rol in die oorwinning?

¹² In die dae van die Israelitiese rigters het die God van die Bybel verbonde geraak aan Megiddo en aan die spruit Kison daar naby. In die dae van rigter Barak en die profetes Debora het God in die omgewing van Megiddo ’n klinkende oorwinning aan sy uitverkore volk gegee. Rigter Barak het net 10 000 man gehad, terwyl die vyand onder aanvoering van generaal Sisera, benewens voetsoldate, 900 perdestrydwaens gehad het. Jehovah het ten behoewe van sy uitverkore volk in die stryd getree en ’n skielike oorstroming veroorsaak wat daardie gedugte strydwaens van die vyand immobiel gemaak het. In die oorwinningslied wat Barak en Debora na die wonderdadige oorwinning oor Sisera se leër tot God gesing het, het hulle die aandag gevestig op God se aandeel in hierdie omverwerping van die vyand:

¹³ “Konings het gekom, geveg; toe het die konings van Kanaän geveg by Taänag, by die waters van Megiddo—geen stuk silwer het hulle geneem nie. Uit die hemel het die sterre geveg, uit hulle bane het hulle teen Sisera geveg; die spruit Kison het hulle afgedrywe, die spruit van ontmoediging, die spruit Kison!”—Rigters 5:12, 19-21.

14. Watter slotwoorde van daardie geïnspireerde oorwinningslied is ongetwyfeld ’n gebed ten opsigte van die komende oorlog te Armageddon?

¹⁴ Die geïnspireerde woorde waarmee Barak en Debora hulle lied afgesluit het na daardie eertydse oorwinning by Megiddo is ongetwyfeld ook van toepassing as ’n gebed ten opsigte van die komende oorlog te Armageddon. Hulle het gesing: “So moet al u vyande, HERE, omkom! Maar die wat Hom liefhet, is soos die opgang van die son in sy krag.”—Rigters 5:31.a

Die nasies word versamel na Armageddon

15. (a) Watter soort plek is Armageddon dan? (b) Wat is een van die bronne van die onrein propaganda wat die nasies na die oorlog te Armageddon laat opruk?

¹⁵ Megiddo was dus ’n plek waar beslissende veldslae gevoer is. Armageddon moet dan logieserwys die slagveld wees waarheen al die wêreldse nasies van vandag sal opruk onder die dryfkrag wat in Openbaring 16:13, 14 beskryf is. Die “geeste [of “uitinge”, NW] van duiwels” wat die nasies mobiliseer, is die propaganda wat vandag uitgekwaak word en onrein is soos die Bybelse onrein padda. Een van die bronne van sulke onrein propaganda is die “groot vuurrooi draak”. Openbaring 12:1-9 identifiseer “die draak” as Satan die Duiwel.

16. Wat beeld “die dier” in Openbaring 16:13 af?

¹⁶ Nog ’n bron van onrein propaganda is “die dier”. In Openbaring 16:13 word hierdie simboliese “dier” met die duiwelse “draak” geassosieer. Volgens Openbaring 20:10 gaan hierdie “dier” vir ewig vernietig word omdat hy met die simboliese “draak” saamgewerk het. “Die dier” is die simbool van die ganse politieke stelsel van hierdie wêreld waarvan “die draak” die god is (2 Korinthiërs 4:4). Dit sluit al die uiteenlopende politieke regerings van hierdie wêreld in.—Vergelyk Daniël 7:17; 8:20, 22.

17. Wat is die uitwerking van die paddaägtige propaganda wat uit “die dier” voortkom?

¹⁷ So ’n wêreldstelsel van politieke heerskappy het sy kenmerkende propaganda. En hierdie kwakende, paddaägtige propaganda is ’n geïnspireerde uiting wat saam met die geïnspireerde uiting van “die draak” help om “die konings”, of die politieke heersers van die wêreld, te versamel na “die oorlog van daardie groot dag van die almagtige God” wat te Armageddon gevoer gaan word.

18. (a) Wat dui die naam Har–Magedon aan? (b) Wat sou ’n berg voorstel?

¹⁸ Har–Magedon beeld dus ’n wêreldsituasie af wat op ’n beslissende oorlog uitloop. Dit stel daardie eindtoestand voor wat wêreldaangeleenthede bereik waar politieke heersers God se wil eendragtig teëstaan, sodat God volgens sy voorneme met ’n teenmag moet reageer. Die toekoms gaan dus bepaal word deur die uitslag van hierdie konfrontasie. By Megiddo, die geografiese plek, was daar geen berg nie. Maar ’n berg sou ’n prominente vergaderplek voorstel wat van ver af maklik sigbaar is vir al die leërmagte wat daar saamtrek.

19, 20. Watter strategie sal die Generaal van Jehovah se hemelse magte by Armageddon gebruik, en met watter gevolg?

¹⁹ Jesus Christus, die Generaal van Jehovah se leërmagte, kyk al jare lank toe hoe die heersers van die wêreld en hulle leërmagte na Armageddon opruk. Maar hy het geen bepaalde koning en sy leërmagte uitgekies om hulle alleen te verslaan en gevolglik stuksgewyse met die vyandelike magte af te reken nie. Inteendeel, hy gee hulle genoeg tyd om saam te trek en hulle magte tot die grootste militêre potensiaal te verenig. Sy moedige voorneme is om hulle almal gelyk aan te pak!

²⁰ So sal hy ’n klinkender oorwinning oor hulle behaal, tot die eer van sy Opperbevelhebber, Jehovah God, en om te bewys dat hyself onteenseglik die “Koning van die konings en die Here van die here” is.—Openbaring 19:16.

[Voetnoot]