Hoofstuk 3
Die voorbereider van die weg word gebore
DIT is amper tyd dat Elisabet se baba gebore moet word. Maria het die afgelope drie maande by haar gebly. Maar dit is nou tyd vir Maria om tot siens te sê en op die lang reis terug na haar huis in Nasaret te vertrek. Oor sowat ses maande sal sy ook ’n baba hê.
Kort na Maria se vertrek skenk Elisabet die lewe aan haar baba. Hoe bly is hulle tog toe die geboorte goed afloop en Elisabet en die baba albei gesond is! Toe Elisabet die kleintjie vir haar bure en familie wys, is hulle almal saam met haar bly.
’n Seuntjie in Israel moet volgens God se Wet op die agtste dag ná sy geboorte besny word. Vriende en familie kom vir hierdie geleentheid kuier. Hulle sê die seuntjie moet na sy vader, Sagaria, vernoem word. Maar Elisabet weier. “Nee”, sê sy, “maar hy moet Johannes genoem word.” Onthou, dit is wat die engel Gabriël gesê het die kind genoem moet word.
Maar hulle vriende maak beswaar: “Daar is niemand in jou familie wat dié naam het nie.” Toe vra hulle deur gebare wat sy vader die seun wil noem. Sagaria vra ’n skryfbordjie en skryf tot almal se verbasing: “Johannes is sy naam.”
Toe word Sagaria se spraak wonderdadig herstel. Jy sal onthou dat hy sy spraak verloor het toe hy nie die engel se aankondiging dat Elisabet ’n kind sou hê, geglo het nie. Wel, toe Sagaria praat, is almal wat in die buurt woon verbaas, en hulle sê onder mekaar: “Wat sal tog van hierdie kindjie word?”
Sagaria word nou met die heilige gees vervul en hy jubel: “Geloofd sy die Here, die God van Israel, omdat Hy sy volk besoek het en vir hulle verlossing teweeggebring het, en ’n horing van heil vir ons opgerig het in die huis van Dawid, sy kneg.” Hierdie “horing van heil” is natuurlik die Here Jesus, wat nog gebore moet word. Deur hom, sê Sagaria, sal God “gee dat ons, verlos uit die hand van ons vyande, Hom sonder vrees kan dien, ’n heiligheid en geregtigheid voor Hom, al die dae van ons lewe”.
Dan voorspel Sagaria aangaande sy seun, Johannes: “En jy, kindjie, sal ’n profeet van die Allerhoogste genoem word, want jy sal voor die aangesig van die Here uitgaan om sy weë reg te maak; om kennis van saligheid aan sy volk te gee in die vergifnis van hulle sondes, deur die innige barmhartigheid van onse God waarmee die opgaande Lig uit die hoogte ons besoek het, om te skyn oor die wat in duisternis en doodskaduwee sit, om ons voete na die pad van vrede te rig.”
Teen hierdie tyd kom Maria, wat skynbaar steeds ’n ongetroude vrou is, in Nasaret by die huis aan. Wat sal met haar gebeur wanneer dit duidelik word dat sy swanger is? Lukas 1:56-80; Levitikus 12:2, 3.
▪ Hoeveel ouer is Johannes as Jesus?
▪ Wat gebeur wanneer Johannes agt dae oud is?
▪ Hoe het God sy aandag op sy volk gevestig?
▪ Watter werk sou Johannes doen, soos voorspel is?